PE E faigatā iā te oe ona suʻesuʻe e lē aunoa le Tusi Paia? Pe e te manatu i ai o se mea e te lē fiafia e fai? Atonu e iai taimi e oo ai iā i tatou uma na faalogona. Ae seʻi mafaufau foʻi i isi mea e masani ona tatou faia e lē aunoa, e pei o le tāʻele. E moni e manaʻomia ai le taimi ma taumafaiga, ae e uma ane ua lagona le faafouina. E faapena foʻi le faafouina e maua mai i le suʻesuʻeina o le Tusi Paia, e pei ua “faatāʻele i le vai e ala i le upu.” (Efe. 5:26) Seʻi mātau nisi o fautuaga nei:

• Fai se faasologa. O le suʻesuʻeina o le Tusi Paia e le tagata lava ia, o se tasi o “mea e sili ona tāua” i le olaga o se Kerisiano. (Fili. 1:10) Ina ia fesoasoani iā te oe e pipii i lau faasologa, o se mea lelei le tusi i lalo o le aso ma le taimi e fai ai, ma tuu i se mea e faigofie ona iloa atu e pei o le pusa aisa. E lelei foʻi ona fai se faamanatu i lau telefoni ina ia tatagi, a o toeitiiti oo i le taimi ua faatulaga e fai ai au suʻesuʻega i le Tusi Paia.

• Ia fua i lou tulaga. Pe e faigofie iā te oe pe a uumi taimi o au suʻesuʻega pe pupuu? Talu ai e sili atu ona e iloa le mea e fetaui ma oe, o lea ia fetuunaʻi le uumi o au suʻesuʻega e fua i lou tulaga. Pe afai e te faatalatū e fai au suʻesuʻega i le taimi lea ua uma ona faatulaga e fai ai, aiseā e te lē taumafai ai e fai mo na o le sefulu minute? E sili atu le fai o au suʻesuʻega mo le sefulu minute, nai lo o le leai o se suʻesuʻega. Atonu e uma ane le sefulu minute, ua e fiafia e faaauau pea.—Fili. 2:13.

• Ia muaʻi filifili ni mataupu. Pe afai e faatoʻā e mafaufau i se mataupu e suʻesuʻe ae ua oo i le taimi o au suʻesuʻega, atonu la e te lē o “faaaogā tatau le taimi.” (Efe. 5:16) Ia taumafai e fai se lisi o mataupu e te manaʻo e suʻesuʻe i ai. Pe afai e iai se fesili po o se manatu e te lē o malamalama atoatoa i ai, ia faaopoopo i lau lisi. Pe a uma au suʻesuʻega taʻitasi, ia tusi i lau lisi ni mataupu e mafai ona e suʻesuʻe i ai i le isi vaiaso.

• Ia fetuutuunaʻi. Ia taumafai e fetuunaʻi lau faasologa e pei o le tele o le taimi e faaalu mo au suʻesuʻega, faapea ma mataupu e te iloiloina. E lē tāua le taimi, o le umi po o mataupu e te suʻesuʻeina, ae ia faia e lē aunoa au suʻesuʻega.

O le mea moni, e tatou te maua aogā mai i le suʻesuʻe e lē aunoa o le Tusi Paia. O le a tatou mafuta vavalalata atu ai iā Ieova, gaoioi ma le atamai, ma lagona ai le faafouina.—Iosua 1:8.