I LE silia i le 3,000 tausaga ua mavae, na iloa ai e le augātamā o Iopu e tele mea e faailoa mai e manulele o le lagi iā i tatou e faatatau i galuega a le Atua. Ua talafeagai foʻi a latou amioga e faaaogā i faataʻitaʻiga ma faaupuga valiata. O le tele o taimi e taʻua ai manulele o le lagi i le Tusi Paia, e tatou te aʻoaʻoina mai ai ni lesona aogā e faatatau i le olaga ma la tatou faiā ma le Atua. Seʻi o tatou vaai la i nisi o faaaʻoaʻoga.

E masani lelei tagata na nonofo i Ierusalema i peʻapeʻa, ona sa masani ona fai o latou faamoega i faatautau o fale. O nisi peʻapeʻa na fai o latou faamoega i le malumalu o Solomona. E foliga mai o peʻapeʻa na fai o latou faamoega i le malumalu i tausaga taʻitasi, na latou maua se nofoaga saogalemu e tausia aʻe ai a latou toloaʻi.

O le tusitala o le Salamo 84 o se tasi o atalii o Koru. Na ia auauna i le malumalu i le tasi le vaiaso i totonu o le ono masina, ma na ia vaaia ai nei faamoega i le malumalu. Na ia fia pei o le peʻapeʻa lea na iai lona faamoega tumau i le fale o Ieova. Na ia faapea mai: ʻIeova o ʻau e, e maʻeu lava le matagofie, o lou faleʻie paia sili! Ua ou naunau lava ma ua ou lailoa i le fia alu atu i lotoā o Ieova. E oo lava i le manulele ua maua se mea e nofo ai, ua maua foʻi e le peʻapeʻa se ofaga mo ia, e tuu ai foʻi i inā lana toloaʻi — O lou fata faitaulaga sili, Ieova o ʻau e, o loʻu Tupu ma loʻu Atua!’ (Salamo 84:1-3) Pe e faapena o tatou lagona ma a tatou fanau, o le naunau lea ma talisapaia le faatasitasi e lē aunoa ma tagata o Ieova i le faapotopotoga?​—Salamo 26:8, 12.

Na tusi le perofeta o Ieremia: ʻE iloa lelei e le kasita ona taimi atofaina.’ E mautinoa na ia malamalama lelei i femalagaaʻiga a kasita i le Nuu Folafolaina. I le tau e totogo ai mea, e silia i le 300,000 kasita papaʻe e felelei mai i Aferika agaʻi i Europa e ui atu i le vanu o Ioritana. O le auala na foafoaina ai i latou, e latou te iloa ai ua oo i le tau māfanafana ma ua tatau ona latou toe foʻi ina ia tuufua. E pei lava le kasita o isi manufelelei e toe foʻi e tuufua, e latou te ʻiloa lelei le taimi e taʻitasi ai ma ō mai.’​—Ieremia 8:7.

Ua taʻua i le Collins Atlas of Bird Migration: “O le itu e mataʻina ai nei feleleaʻiga ona o le tomai faalenatura.” Na tuuina e Ieova le Atua le tomai i manufelelei e latou te iloa ai tau, ae na ia tuuina i tagata le tomai e latou te malamalama ai i taimi ma tau. (Luka 12:54-56) E ese mai i le tomai faalenatura o le kasita, o le poto e faatatau i le Atua o le auala autū lea ua malamalama ai le tagata i le tāua o mea o loo tutupu i le taimi o loo tatou ola ai. E leʻi malamalama tagata Isaraelu i aso o Ieremia i na faailoga. Na faamatala e le Atua le faafitauli ina ua ia faapea mai: “Ua latou teena le afioga a Ieova,  ma o le ā foʻi se atamai o iā i latou?”​—Ieremia 8:9.

I aso nei, e tele faamaoniga e iloa ai ua tatou ola i le vaitaimi ua taʻua i le Tusi Paia “o aso e gata ai.” (2 Timoteo 3:1-5) Po o le a e faataʻitaʻi i le kasita ma mātauina “taimi”?

E tele taimi o loo taʻua ai le aeto i le Tusi Paia, ma o se tasi o manu sa taatele i le Nuu Folafolaina. E vaavaai mai le aeto mai i lona faamoega i le mea maualuga i luga o se papa ina ia ʻsaʻili ni meaʻai, e vaavaai atu pea foʻi ona mata i le mea mamao.’ (Iopu 39:27-29) E malolosi mata o le aeto, ma ua lipotia e mafai ona vaaia e le aeto se lapiti i le mamao e ʻafa maila (1 km).

E pei ona vaavaai atu le aeto i le “mea mamao,” e mafai foʻi e Ieova ona iloa mamao atu le lumanaʻi. O lea ua faailoa mai ai e Ieova le Atua: “O Lē ua taʻu mai talu mai le amataga le iʻuga, ma taʻu mai foʻi talu mai aso anamuā mea e leʻi faia.” (Isaia 46:10) O le utagia o fautuaga a Ieova, e mafai ai ona tatou maua aogā mai i lona tofā mamao ma lona atamai e lē mafaatusalia.​—Isaia 48:17, 18.

Ua faatusa foʻi e le Tusi Paia i latou e faatuatua i le Atua i aeto: “O ē e faamoemoe iā Ieova e toe malolosi i latou. E latou te ō aʻe e pei ua iā i latou ni apaʻau o aeto.” (Isaia 40:31) E faalagolago le aeto i faaputuga o ʻea māfanafana a o lele. Pe a iloa e le aeto se faaputuga o ʻea māfanafana, ona faaloloa lea o ona apaʻau ma faataamilomilo ai i lenā faaputuga o ʻea, ma atili ai ona maualuga lana lele. E lē faalagolago le aeto i sona lava malosi ina ia mafai ai ona lele i se mea mamao. I se tulaga talitutusa, o i latou e maufaatuatuaina Ieova e latou te faalagolago iā te ia, auā ua ia folafola mai e mafai ona ia foaʻi mai “le mana lea e sili atu i le malosi o tagata.”​—2 Korinito 4:7, 8.

A o toeitiiti maliu Iesu, na ia silasila atu ai i le aai o tagata Iutaia. Na ia faapea ifo: “Ierusalema e, Ierusalema e, o lē na fasiotia le ʻauperofeta ma fetogi i maa o ē na aauina atu iā te ia. Ua tele lava loʻu manaʻo e faapotopoto faatasi lau fanau, e pei ona ofaofataʻi e se moa lana toloaʻi i lalo o ona apaʻau! Ae peitaʻi ua outou lē mananaʻo i ai.”—Mataio 23:37.

O se tasi o vala e sili ona mataʻina ai manu e iai apaʻau, o lo latou faanaunauga lea e puipuia a latou toloaʻi. O manu e iai apaʻau ia e tuufua i le laueleele e pei o moa, e tatau ona latou mataala i lamatiaga. Pe a vaaia e le matuāmoa le manulele e taʻua o le hawk, ona kokoʻē leotele lea e lapataʻia ai lana toloaʻi, ona latou taufetuli atu lea e lalafi i lalo o ona apaʻau. O lalo o na apaʻau e maua ai e tamaʻi moa le puipuiga mai i le vevela o le lā ma le mamafa o timuga. Na faapena le naunau o Iesu e avatu le puipuiga faaleagaga iā i latou na nonofo i Ierusalema. I aso nei, ua valaaulia i tatou e Iesu e ō atu iā te ia ina ia maua ai le puipuiga ma le faafouina, mai i avega mamafa ma popolega o le olaga i aso taʻitasi.​—Mataio 11:28, 29.

O le mea moni, e tele mea e tatou te aʻoaʻoina mai i manu e iai apaʻau. A o e mātauina a latou amioga, ia taumafai e manatua ni faamatalaga a le Tusi Paia o loo faasino atu i ai. Tau ina ia fesoasoani le peʻapeʻa iā te oe e talisapaia ai le maota mo le tapuaʻiga iā Ieova. Ia e saʻili atu i le Atua mo le malosi lea e mafai ai ona e lele e pei o se aeto. Tau ina ia e saʻili atu iā Iesu mo upu moni faaleagaga, lea e puipuia ai oe e pei ona puipuia e le matuāmoa lana toloaʻi. Tau ina ia fesoasoani foʻi le kasita iā te oe e manatua ai le tāua o le mataala i mea o loo tutupu i le lalolagi, e iloa ai le taimi ua tatou ola ai.