E nonofo Kenneth ma Filomena i Curaçao. I le aoauli o se tasi Aso Sa, na la asiasi atu ai e faia se suʻesuʻega a se tasi o ulugalii.

Na taʻua e Kenneth: “Ina ua ma taunuu na ma vaaia ua loka le fale ma ua leai se taavale. Ae na iai se mea na uunaʻia ai aʻu ina ia vili le telefoni a le fafine.”

Na tali mai e le fafine le telefoni ma faapea mai o loo faigaluega lona toʻalua. Ae ina ua ia iloa o loo i fafo o le fale ia Kenneth ma Filomena, na ia valaaulia loa i laʻua i totonu.

Na vave ona la iloa e pei sa tagi le fafine. Ae ina ua amata e Kenneth le suʻesuʻega i se tatalo, na toe tagi le fafine. O lea, na fesili atu ma le agalelei Kenneth ma Filomena iā te ia po o le ā le mea ua tupu.

Na faamatala atu e le fafine o lea sa ia sauni e pule i lona ola i lea lava aoauli, ma a o ia tusia se tusi e faamavae ai i lona toʻalua ae vili atu loa Kenneth. Na ia faapea atu o loo aafia o ia i le lotomafatia, o lea na faasoa atu ai e Kenneth ma Filomena ni manatu faamāfanafanaloto mai i le Tusi Paia. Na avea na manatu faalaeiau o se faasaoola.

Na faapea mai Kenneth: “E ma te faafetai iā Ieova i le faatagaina o i maʻua e fesoasoani i lenei fafine lotomafatia, aemaise le uunaʻia o i maʻua e vili lana telefoni, atonu e ala mai i se agelu po o Lona agaga paia.” *

Pe e talafeagai iā Kenneth ma Filomena ona talitonu na fesoasoani mai le Atua, e ala i se agelu, Lona agaga paia po o Lona mana galue? Po o le mea na teʻi lava ua filifili Kenneth e vili le telefoni?

E tatou te lē mautinoa. Ae ua tatou mautinoa e faaaogā e le Atua ana agelu e fesoasoani i tagata i le itu faaleagaga. O se faaaʻoaʻoga, o loo taʻua i le Tusi Paia na faaaogā e le Atua se agelu e taʻitaʻia le faievagelia Kerisiano o Filipo, e fesoasoani i se tagata tāua mai i Aitiope o lē na saʻilia se taʻitaʻiga faaleagaga.​—Galuega 8:26-31.

E talitonu le tele o lotu i foafoaga agaga, ma ua faamatalaina nisi o nei foafoaga agaga e agalelei, o ē e faia le finagalo o le Atua pe leoleoina foʻi tagata. E toʻatele isi e talitonu e iai agelu ma e iai aafiaga lelei iā i tatou. Peitaʻi, e lē talitonu isi e iai ni agelu.

Pe e iai moni ni agelu? Pe afai o le tulaga lenā, o le ā lo latou amataga mai? O le ā le mea moni e faatatau i agelu? O le ā lo latou aafiaga i lou olaga? Seʻi o tatou iloilo ni faamaoniga.