PE AFAI ua maliu se tasi e pele iā te oe, atonu na e lagona foʻi faalogona eseese e pei o le faanoanoa, tuua toʻatasi ma le leai o se faamoemoe. Atonu na e lagona foʻi le ita, nofosala, fefe ma oo lava ina e mafaufau e leai se tāua o le ola pea.

Ia e mautinoa o le faavauvau e lē o se faailoga o le lotovaivai. Ae e faailoa atu ai lou matuā alofa i lē ua maliu. Peitaʻi, pe e mafai ona e maua se mapusaga mai i lou tulaga faavauvau?

E ui e foliga mai o le a iai pea ni faalogona tigā, ae e ono faamāfanafanaina oe i fautuaga o loo mulimuli mai:

IA FAAALU SE TAIMI E FAAVAUVAU AI

E lē o tagata uma e tutusa auala ma le umi e faavauvau ai. Peitaʻi, e mafai e le tagi ona faaleo mai ai faalogona tigā. Na faapea mai Vanessa lea o loo taʻua i le amataga o le mataupu: “E na o loʻu tagi lava; sa manaʻomia ona faamatuu atu oʻu faalogona tigā.” Na faapea mai Sofía lea na maliu faafuaseʻi lona uso: “E matuā tigā le mafaufau e uiga i le mea na tupu. E pei o le toe tatala ma fufulu o se manuʻa. E ui ina matuā tigā, ae e toe lelei ai le manuʻa.”

IA TALANOA E FAATATAU I OU MANATU MA FAALOGONA

O le mea moni, e iai taimi e te ono manaʻo ai e tuua na o oe. Ae o lou onosaia toʻatasi o le faavauvau e tai  pei o loo e tauaveina se mea e matuā mamafa. Na faapea mai Jared e sefulu fitu ona tausaga, o lē ua maliu lona tamā: “Na ou talanoa i isi e uiga i oʻu faalogona. Ailoga na iai se uiga o aʻu faamatalaga, ae o le mea e lelei ai ona sa mafai ona ou faamatala atu oʻu faalogona i isi.” Na faaopoopo mai Janice lea na taʻua i le mataupu amata: “O le talanoa ma isi o se matuā faamāfanafanaga. Na ou lagona o loo malamalama isi i oʻu faalogona ma sa leʻi manaʻomia ona ou onosaia na o aʻu.”

IA TALIA LE FESOASOANI

Na faapea mai se fomaʻi: “O tagata faavauvau o ē faataga a latou uō ma tauaiga e fesoasoani atu i le uluaʻi taimi e maliu ai sē e pele, e masani lava ona faigofie mo i latou ona onosaia ma foʻia na faalogona.” Ia faailoa atu i au uō mea e mafai ona latou faia e fesoasoani mai ai; atonu o loo latou mananaʻo e faia faapea ae e lē o iloa le auala e faatino ai.​—Faataoto 17:17.

IA MAFUTA VAVALALATA ATU I LE ATUA

Ua faapea mai Tina: “Ina ua maliu faafuaseʻi laʻu tane i le kanesa, na lē toe mafai ona ou talanoa iā te ia e uiga i oʻu faafitauli, popolega, ma faalogona, o lea na ou faamatala atu ai i le Atua mea uma! Na amata aso taʻitasi i laʻu talosaga atu iā te ia mo se fesoasoani, a o faagasolo galuega masani o le aso. Na fesoasoani mai le Atua i ni auala e sili atu nai lo o mea na ou faatalitalia.” Na faapea mai Tarsha e 22 ona tausaga ina ua maliu lona tinā: “O le faitauina o le Tusi Paia i aso taʻitasi na faamāfanafanaina ai aʻu. Na aumaia ai se manatu faalaeiau ou te mafaufau loloto i ai.”

IA FAAĀTA LE TOETŪ

Na faaopoopo atili mai Tina: “I le taimi muamua, sa leʻi faamāfanafanaina aʻu i le faamoemoe o le toetū ona sa ou manaʻomia laʻu tane, ma sa manaʻomia foʻi e laʻu fanau tama lo latou tamā. Peitaʻi, ua fa nei tausaga talu ona maliu laʻu tane, ae o loo oʻu taofimau pea i lenei faamoemoe. E fesoasoani lenā faamoemoe ia ou uaʻi atu ai i se lumanaʻi fiafia ma ou onosaʻi ai. Pe a ou faaāta le toe vaai atu iā te ia, e maua ai le filemu ma le olioli!”

E moni o le a lē mafai ona faaleleia ou faalogona faanoanoa i se taimi vave. Peitaʻi, e maua le faamautinoaga i le mea na tupu iā Vanessa. Na ia faapea mai, “E te mafaufau o le a lē mafai ona faaleleia ou faalogona, ae o le a faasolosolo ona faaitiitia ai le faanoanoa.”

Ia manatua, e ui e lē mafai ona mou atu faalogona o le misia o le tagata ua maliu, ae e tāua le ola pea. O le fesoasoani alofa a le Atua, e mafai ai ona e olioli i faigāuō māfana ma se olaga e iai lona fuafuaga. E lē o toe umi ona faatutūina lea e le Atua o ē ua maliliu. E finagalo o Ia e te toe opo mai ē e pele iā te oe. O le a mou atu e faavavau faalogona tigā o loo i lou loto!