Saʻo ma le Sesē: Se Filifiliga e Tatau Ona E Faia
E faalagolago le fiafia o o tatou olaga, i tapulaa tauamio e tatou te filifili e ola ai. E silafia lelei e Ieova le Atua lenā mea, ma o le māfuaaga lenā e finagalo ai e tatou te ola e tusa ai ma ana tapulaa.
E finagalo Ieova ia tatou maua se olaga filemu ma fiafia.
“O aʻu o Ieova, o lou Atua, o Lē o loo aʻoaʻo oe i mea e aogā iā te oe, o Lē e taʻitaʻiina oe i le ala e ao ona e ui ai. E lelei pe a e faalogo mai i aʻu poloaʻiga! Ona pei ai lea o se vaitafe lou filemu, ma lau amiotonu e pei o galu o le sami.”—Isaia 48:17, 18.
Talu ai o le Atua na foafoaina i tatou, e na te silafia la le auala sili e ao ona tatou ola ai. E finagalo o ia e tatou te usitaʻi i lana taʻitaʻiga, ona e mo lo tatou lelei. Pe a tatou usitaʻia ana faatonuga, o le a lē fesiligia la pe iʻu lelei a tatou filifiliga. E mautinoa o le a tatou faia le filifiliga saʻo, lea e iʻu atu ai i le filemu ma le fiafia.
E lē faatalitalia e Ieova se mea e tatou te lē gafatia.
“E lē faigatā lenei poloaʻiga ua ou poloaʻi atu ai iā te oe i le asō pe mamao foʻi.”—Teuteronome 30:11.
O le ola e tusa ai ma tapulaa tauamio a le Atua, e ono manaʻomia ai ona faia ni suiga i le auala e tatou te mafaufau ma gaoioi ai. Peitaʻi, e lē faatalitalia mai e Ieova se mea e tatou te lē mafaia. Talu ai na ia foafoaina i tatou, e na te silafia la le mea e gata ai lo tatou malosi. Pe a tatou iloa lelei Ieova, o le a tatou iloa ai foʻi “e lē mamafa ana poloaʻiga.”—1 Ioane 5:3.
Ua folafola mai e Ieova o le a ia fesoasoani i ē e filifili e ola i ana tapulaa.
“Auā o aʻu o Ieova lou Atua, o loo uuina lou lima taumatau, o Lē e fai atu iā te oe, ʻAua e te fefe. O le a ou fesoasoani iā te oe.’”—Isaia 41:13.
E mafai ona tatou ola e tusa ma tapulaa tauamio a le Atua, ona o le a ia fesoasoani mai iā i tatou. E na te faia faapea e ala mai i lana Afioga le Tusi Paia, lea e aumaia ai faalaeiauga ma se faamoemoe.
E faitau miliona tagata i le lalolagi aoao ua faaleleia o latou olaga, ona o le ola e tusa ma tapulaa a le Tusi Paia. E faalaeiauina oe ina ia aʻoaʻo atili e faatatau i fautuaga aogā o loo i le Tusi Paia. E mafai ona e faia faapea e ala i le iloiloina o le lomiga faale-Tusi Paia Se Olaga Fiafia e Faavavau! lea e maua i le jw.org e aunoa ma se totogi. O loo iai i lenei lomiga lesona nei:
-
E Faapefea Ona Fesoasoani le Tusi Paia iā te Oe?
-
Ua Faailoa Mai i le Tusi Paia se Faamoemoe
-
Pe Mafai Ona E Maufaatuatuaina le Tusi Paia?
A o suʻesuʻeina le Afioga a le Atua, o le a e iloa ai o loo aogā pea ma “e maufaatuatuaina pea i le taimi nei e oo i le faavavau.” (Salamo 111:8) O le auala sili e ola ai, o le usitaʻi lea i tapulaa tauamio o loo i le Tusi Paia. Peitaʻi, e lē faamalosia e le Atua i tatou e faia faapea. (Teuteronome 30:19, 20; Iosua 24:15) O le filifiliga lenā e tatau ona faia e tagata taʻitoʻatasi.
