Pe a Aveesea Atoatoa le Feitagaʻi!
E tusa lava pe mafai ona tatou liaʻiese le ita mai i o tatou loto, ae e lē mafai ona tatou pulea uiga ma gaoioiga a isi. Ua faaauau pea ona afāina tagata lē sala ona o le feitagaʻi. O lea, o ai la e mafai ona aveesea atoatoa le feitagaʻi?
E na o Ieova le Atua e mafai ona ia aveesea atoatoa le feitagaʻi o loo tatou vaaia i aso nei. O le mea lenā o loo taʻua i le Tusi Paia o le a ia faia.—Faataoto 20:22.
O LE A AVEESEA E LE ATUA MEA O LOO FAAPOGAIA AI LE FEITAGAʻI
-
1. SATANI LE TIAPOLO. O le agelu fouvale o Satani, o ia o le pogai autū o le feitagaʻi i aso nei. O le a faaumatia e le Atua Satani ma i latou uma e faaalia le feitagaʻi e pei o ia.—Salamo 37:38; Roma 16:20.
-
2. LE LALOLAGI AMIOLEAGA A SATANI. O le a tafiesea e le Atua mea leaga uma o lenei lalolagi, e aofia ai faiga faapolotiki faapiʻopiʻo ma taʻitaʻi lotu o loo faaauilumaina le feitagaʻi. O le a faaumatia foʻi e le Atua faiga faapisinisi matapeʻapeʻa ma piʻopiʻo.—2 Peteru 3:13.
-
3. LE TULAGA LĒ LELEI ATOATOA O TAGATA. Ua taʻua i le Tusi Paia, ua tuufaasolo mai le tulaga lē lelei atoatoa i tagata, lea ua māfua ai ona leaga o latou gaoioiga, mafaufauga ma faalogona. (Roma 5:12) O le teulotoina ma le gaoioi ma le ita, e māfua mai ona o le tulaga lē lelei atoatoa. O le a fesoasoani le Atua i tagata e manumalo mai i le tulaga lē lelei atoatoa, ma aveesea atoatoa le feitagaʻi.—Isaia 54:13.
UA FOLAFOLA MAI E LE TUSI PAIA SE LALOLAGI E AUNOA MA LE FEITAGAʻI
-
1. O LE A LĒ TOE IAI NI FAIGA LĒ TONU. O le a pulea le lalolagi e le Malo o le Atua, o se faigāmalo e amiotonu ma tumau o loo i le lagi. (Tanielu 2:44) O le a lē toe iai le faailoga tagata. O le a faasaʻo e le Atua faiga lē tonu uma o loo feagai ma tagata i aso nei.—Luka 18:7.
-
2. O LE A MAUA E TAGATA UMA LE FILEMU. O le a lē toe mafatia se tasi ona o faiga sauā ma taua. (Salamo 46:9) O le a tausia e tagata uma i le lalolagi le filemu, ma o le a avea o se nofoaga saogalemu.—Salamo 72:7.
-
3. O LE A OLA E FAAVAVAU TAGATA UMA I SE TULAGA LELEI ATOATOA. O le a alolofa tagata uma i le lalolagi o le tasi i le isi. (Mataio 22:39) O le a lē toe mafatia se tasi, e lē toe iai foʻi ni mafaufauga leaga po o ni mea leaga e manatua. (Isaia 65:17) Pe a aveesea atoatoa le feitagaʻi, o le a “matuā faafiafiaina foʻi [tagata] ona o le tele o le filemu.”—Salamo 37:11.
Po o e moomoo e te ola i se lalolagi faapena? I aso nei e toʻatele ua aʻoaʻoina le auala e liaʻiese ai le feitagaʻi, e ala i le faatatauina o mataupu silisili o le Tusi Paia. (Salamo 37:8) O le mea lenā o loo faia e le faitau miliona o Molimau a Ieova i le lalolagi aoao. E ui e eseese a latou aganuu ma talaaga, ae e latou te autasi ma alolofa o le tasi i le isi.—Isaia 2:2-4.
E fiafia Molimau a Ieova e faasoa atu mea ua latou aʻoaʻoina i le auala e onosaia ai faiga lē tonu ma le faailoga tagata. O mea e te aʻoaʻoina o le a mafai ona fesoasoani iā te oe e faasolosolo ona liaʻiese le ita, ae atiaʻe le alofa. E mafai ona e aʻoaʻoina le auala e faaalia ai le alofa i tagata uma, e oo lava iā i latou e lē talisapaia au gaoioiga pe tali mai foʻi i le ita. O le iʻuga, o le a e maua ai le fiafia i le taimi lenei, ma o le a faaleleia ai lau faiā ma isi. A o le mea sili ona tāua, o le a e aʻoaʻoina ai pe e faapefea ona e ola i lalo o le pulega o le Malo o le Atua, pe a aveesea atoatoa le feitagaʻi.—Salamo 37:29.
E te Ono Fiafia Foʻi
LE OLOMATAMATA
O le ā o le a Faataunuuina e le Malo o le Atua?
Na silafia lelei e Iesu e na o le Malo o le Atua le faigāmalo e mafai ona foʻia faafitauli o le lalolagi. O ā mea ua faataunuuina e lenā Malo lea e faamalosia ai lo tatou mautinoa?
ISI MATAUPU
Po o le a i ai i le Lalolagi se Faamasinogatonu?
O loo faaalia e le Tusi Paia, e mai i le Atua le faamasinoga tonu, e tutusa iā te ia le tāua o tagata uma.
ALA MAI!
Faailoga Tagata—Se Vaifofō Tumau
O ā auala e fā o le a faia e le Malo o le Atua, e aveese ai le faailoga tagata?
