E te fiafia e taalo, ae e fiafia lau paaga e faitau tusi. E te fai mea māeʻaeʻa ma maopoopo, ae e lē faapena lau paaga. E te fiafia e faifaimea faatasi ma isi, ae e fiafia lau paaga e te lua faifaimea na o oulua.

E te ono faapea ane, ʻE matuā lē tutusa lava i maʻua! Aiseā na ma lē mātauina ai lenei tulaga a o ma feoaʻi?’

Atonu na e mātauina, ae e te leʻi amanaʻia i lenā taimi, ma o le uiga lenā ua sili ona manaʻomia i le taimi lenei, auā ua uma ona lua faaipoipo. O le a fesoasoani lenei mataupu iā te oe e faia faapea. Peitaʻi, seʻi o tatou iloilo muamua nisi o mea moni e faatatau i vala e te lua eseese ai.

O nisi mea e eseese ai e tugā. O le mea e sili ona taulaʻi i ai se tama ma se teine a o feoaʻi, o le mātau lea o mea e la te tutusa ai. O lea, pe afai e iloa ane ni tulaga tugā e la te eseese ai, o le toʻatele lava e faauma ai loa se faigāuō nai lo o le ulu atu i se faaipoipoga e eseese manatu ma tulaga. Ae faapefea eseesega lāiti ia e lē maʻalofia i so o se faaipoipoga?

E leai ni tagata se toʻalua e tutusa lelei. O lea, o se tulaga masani i se ulugalii le eseese i se mea se tasi pe sili atu i mea nei:

Mea e Fiafia Ai. Ua faapea mai Anna, * ʻOu te fiafia lava aʻu e nofo i le fale, ae o laʻu tane e fiafia tele e aʻe i mauga aisa ma faimalaga i le togāvao mo ni aso.’

Masaniga. Ua faapea mai Brian, “E tuai ona moe laʻu avā i le pō, ae vave ona ala i le tā o le 5 i le taeao. Peitaʻi ou te manaʻo e moe mo le fitu pe valu itula, ae afai ou te vave ala o le a ou itaita gofie.”

Uiga. Atonu o oe o se tagata e matamuli, ae o lau paaga e talanoa lava i so o se tasi. Ua faapea mai se tane e igoa iā Tavita: “Na ou ola aʻe e lē masani ona talanoa i isi i mataupu e fitoitonu iā te aʻu, ae o laʻu avā e sau mai i se aiga e leai se mea e lilo.”

E mafai ona aogā mea e eseese ai. Ua faapea mai se avā  e igoa iā Elena: “Atonu e saʻo laʻu auala, ae e lē faapea ai ua na o le pau lea o le auala e taulima ai le mataupu.”

Ia avea o sē e lagolagosua. Na faapea mai se tane e igoa iā Atamu: ʻE mātua augapiu ma se fiafia o laʻu avā o Karen i ni taaloga. Ae e iai lava taaloga e ma te ō ma matamata ai. E fiafia tele Karen e matamata i ata i fale mataaga, o lea e ma te ō ai ma faaalu lo ma taimi i inā i le tele e manaʻo ai o ia. Ou te taumafai malosi lava ia fiafia i ata tusi ona e tāua tele i laʻu avā.”—Mataupu silisili o le Tusi Paia: 1 Korinito 10:24.

Ia faalautele atu lau vaaiga. E lē faapea e sesē le vaaiga a lau paaga i mea pe a faapea e lē o tutusa ma le auala o loo e manatu i ai. O le lesona lenā na aʻoaʻoina e se tane e igoa iā Aleki. Na faapea mai o ia. “Na ou manatu e na o le tasi lava le auala saʻo e taulima ai se mea, ma o isi auala uma e sesē. Ae ina ua ou faaipoipo, na ou iloa ai e tele auala e mafai ona taulima ai se mea, ma e tofu le auala ma lona itu e lelei ai.”—Mataupu silisili o le Tusi Paia: 1 Peteru 5:5.

Ia malamalama i le tulaga o mea. O le ioe faatasi i ni mea e lē faapea ai ua tutusa lelei ni tagata se toʻalua. O lea, aua e te manatu ua sesē le tagata ua e faaipoipo i ai, ona o ni eseesega lāiti. Ua taʻua i le tusi The Case Against Divorce: “O le toʻatele o tagata ua faia le faamolemolega e faapea, ʻNa faatauasoina aʻu i le alofa.’” Peitaʻi ua taʻua atili i le tusi, “o aso uma lava e te lua fiafia faatasi ai, ua faaalia mai ai e mafai ona alofa le tasi i le isi, e tusa pe e iai ni mea e te lua eseese ai.” Ia taumafai e “faaauau ona onosaʻi le tasi i le isi, . . . pe afai ua faia e se tasi se mea e tigā ai le isi.”—Kolose 3:13.

Ia faataʻitaʻi: Ia tusi i lalo mea e te fiafia ai i lau paaga. Pe a māeʻa ona tusi lea i lalo o mea e te lua eseese ai. O lenā lisi atonu o le a e iloa ai, o mea e te lua eseese ai e le tugā tele e pei ona e manatu i ai. O le a faaalia ai foʻi mea e manaʻomia ona e malamalama lelei ma lagolagosua ai i lau paaga. Ua faapea mai se tane e igoa iā Keneti, “Ou te matuā talisapaia pe a fetuutuunaʻi mai laʻu avā iā te aʻu, ma ou te iloa e na te talisapaia foʻi pe a ou faia faapea iā te ia. E tusa lava pe e manaʻomia ai ona ou faia ni faataulaga, ae e ese loʻu olioli pe a vaai atu o loo fiafia o ia.”—Mataupu silisili o le Tusi Paia: Filipi 4:5.