O SE tasi o vala mai i le anoanoaʻi o mea ua mafai ona ola ai le tagata, o le mafai lea e le tino ona tapē manuʻa ma toe faafou le aano ua faaleagaina. O lenei faasologa e amata i le taimi lava e lavea ai.

Ia Mātau: E mafai ona pē se manuʻa e ala i ni gaoioiga a ni sela lavelave se tele:

• E mafai e sela faatoʻa toto o loo pipii i aano i autafa o se manuʻa, ona faia aʻe se potopotoi toto ma taofia ai le alu o le toto mai i le alātoto ua aafia.

• O le fula i autafa o le manuʻa, e puipuia ai le manuʻa mai i siama ma aveesea ai mea leaga na māfua mai i le manuʻa.

• Pe a mavae ni nai aso, e amata ona toe faafou e le tino le aano na manuʻa, ma faasolo ina pē le manuʻa, ma toe faaleleia alātoto na faaleagaina.

• Mulimuli ane, e suia ma toe faamalosia e le ʻafuʻafu o le maʻila, le vaega o le tino na manuʻa.

O lenei faiga o le faatoʻaina o le toto, ua taumafai tagata suʻesuʻe e faataʻitaʻi i ai e ala i le faia o se una e mafai ona toe faaleleia ona lava vaega ua faaleagaina. E iai i lenei una ni tamaʻi paipa se lua e faalalava i ona itu, ma o loo iai i nei paipa ni vailaau se lua e sau i fafo pe afai e taʻe se vaega o le una. Pe a fefiloi nei vailaau e lua, o le a maua ai se mea faapipii e pei o se kelū, e sosolo atu i le vaega ua faaleagaina ma toe poloka ai le vaega ua taʻe. A o faasolo ina malō le mea faapipii, o le a maua mai ai se mea malō lea e toe faafoʻisia ai le malosi o le una i le malosi sa iai i le amataga. Ua taʻua e se tagata suʻesuʻe, o loo faagasolo pea ona faaleleia atili lenei faiga, ma ua faataʻitaʻi ai i le auala e toe faaleleia ai e meafaiola o latou tino pe a manunuʻa.

O le ā sou manatu? Pe na teʻi lava ua mafai e le tino o le tagata ona tapē se manuʻa? Pe na foafoaina?