O LE ā sou manatu, pe e mafai ona fesoasoani le Tusi Paia i le tausia o le filemu i le aiga? Faamolemole faatusatusa le manatu o le Tusi Paia ma faamatalaga a nisi na faatalanoa o loo mulimuli mai, i auala na fesoasoani iā i latou. Iloilo po o lē fea manatu e ono fesoasoani iā te oe e ʻalofia ai misa, faatumau le filemu, ma faamalosia ai faiā.

IA ATIAʻE SE VAAIGA SAʻO O LE TASI I LE ISI.

“Ia aua lava neʻi faia se mea ma le finauvale ma le faasausili, ae ia faia ma le lotomaulalo, i le manatu ua sili isi iā te outou, ia vaavaai ma le naunau e lē gata i au lava mea, ae i mea foʻi e lelei ai isi.”—Filipi 2:3, 4.

“Ua ma iloa o se mea lelei le vaai i lau paaga o sē e sili atu ona tāua nai lo o oe ma isi.”—C. P., ua 19 tausaga talu ona faaipoipo.

IA FAALOGOLOGO LELEI MA SE MAFAUFAU E FETĀLAʻI.

“Ia faamanatu atu pea iā i latou ina ia . . . aua le faatupu vevesi, ia magafagafa, ma ia matuā agamalu i tagata uma.”—Tito 3:1, 2.

“E mafai ona ʻalofia misa pe afai e tatou te lē tali atu i a tatou paaga i se leo soona inainā. E tāua ona faalogologo lelei e aunoa ma le faia o se faaiʻuga, ma ia amanaʻia ona manatu e tusa pe e tatou te lē ioe i ai.”—P. P., ua 20 tausaga talu ona faaipoipo.

IA ATIAʻE LE ONOSAʻI MA LE AGAMALU.

“O le onosaʻi e faaōleōle ai se taʻitaʻiʻau, ma le laulaufaiva agamalu e gau ai se ivi.”—Faataoto 25:15.

“E iai lava feeseeseaʻiga, ae e faalagolago le iʻuga i uiga e tatou te faaalia. E matuā manaʻomia ona tatou onosaʻi. Pe a faia faapea, o le a sologa lelei mea uma.”—G. A., ua 27 tausaga talu ona faaipoipo.

AUA LE FAIA UPU SAUĀ PE FAAOOLIMA.

“Ia outou tuu ese mai iā te outou le lotoa, o le ita, o le leaga, o upuleaga, ma e lē tatau ona sau se upu masoā mai i o outou gutu.”—Kolose 3:8.

“Ou te talisapaia le uiga pulea totino o laʻu tane. E toʻafilemu o ia i taimi uma ma e lē taitai ona soona ʻeʻē pe lafo mai ni upu faatigā iā te aʻu.”—B. D., ua 20 tausaga talu ona faaipoipo.

IA NAUNAU E FAAMAGALO ATU MA VAVE ONA FAALELEIA FEESEESEAʻIGA.

“Ia faaauau ona onosaʻi le tasi i le isi, ma ia fefaamagaloaʻi ma le lotoatoa pe afai ua faia e se tasi se mea e tigā ai le isi.”—Kolose 3:13.

“E lē faigofie ona toʻafilemu pea i taimi e lagona ai le lē fiafia, ma e ono vave ai ona e faia se tala po o se gaoioiga e faatigā ai i lau paaga. I taimi faapena, e tāua le faamagalo atu. E lē mafai ona taulau manuia se faaipoipoga pe a aunoa ma le faamagalo.”—A. B., ua 34 tausaga talu ona faaipoipo.

IA FAI MA MASANI LE FETUFAAʻI MA LE LĒ MANATU FAAPITO.

“Ia outou foaʻi atu pea, ona foaʻi mai lea o tagata iā te outou. . .  Auā o le fua tou te fuaina atu, e toe fuaina mai iā te outou.”—Luka 6:38.

“E iloa lelei e laʻu tane mea ou te fiafia ai, ma e tele mea lelei e na te faia e faateʻia ai aʻu. O lea, e masani ona ou mafaufau, ʻE faapefea ona ou faafiafia o ia?’ O le iʻuga, e ma te taliē faatasi i le tele o taimi, ma o loo faaauau lava ona ma faia faapea.”—H. K., ua 44 tausaga talu ona faaipoipo.

AUA LE FIU I LE TAUSIA O LE FILEMU I LE AIGA

O sui o aiga na faatalanoa e le Ala Mai! ua na o nisi ia mai i le faitau miliona i le lalolagi aoao ua fesoasoani i ai le Tusi Paia, ina ia atiaʻe uiga ia e mafai ona saosaolaumea i le mauaina o le filemu i le aiga. * E tusa lava pe e iai nisi sui o o latou aiga e foliga mai e lē o taumafai e tausia le filemu, ae ua latou iloa e tauia a latou taumafaiga ina ia avea ma ē e tausia le filemu, auā ua folafola mai i le Tusi Paia: “E olioli i latou ua fautuaina le filemu.”—Faataoto 12:20.