UA TAʻUA e Sara * mai i Ghana, o lē ua 17 tausaga talu ona faaipoipo iā Iakopo: “E masani ona ma misa ona o tupe. Ou te ita ona e tele mea ou te faia e tausia ai lo ma aiga, ae e lē taitai talanoa mai Iakopo e faatatau i a ma tupe. O nisi taimi e faitau vaiaso e ma te lē fetalanoaaʻi.”

Ua tali mai Iakopo: “E saʻo e iai taimi e felaasaʻi ai a ma upu pe a ma misa. E tele lava ina māfua ona o le lē femalamalamaaʻi ma le leai o ni fesootaʻiga lelei. E māfua foʻi ona ma vevesi ona o le soona faamamafa naʻuā o mea e tutupu mai.”

Na faamatala e Natano, o se tane e leʻi leva ona faaipoipo i Initia, se mea na tupu i se tasi aso ina ua avaavau atu le tamā o lana avā i le tinā o lana avā. Na taʻua e Natano, “Na lē fiafia le loomatua ma alu ese mai i le fale. Ina ua ou fesili atu i le toeaina pe aiseā na soona avaavau ai, na manatu o ia ua ou lē faaaloalo iā te ia. Na sosoo ai loa ma le avaavau faasoloatoa mai iā i matou uma.”

Atonu ua e mātauina pe faapefea i upu e lē logoleleia e fai atu i se taimi lē talafeagai, ona faapogaia ai ni misa i le aiga. Atonu e amata i se fefaaaliaʻiga o manatu, ae emo ane ua faaiʻu i ni taugāupu. O i tatou uma lava e iai le taimi e sesē ai a tatou faamatalaga, o lea e ono faigofie ai ona faauiga sesē faamatalaga po o uunaʻiga a isi. E ui i lea, e mafai lava ona maua le filemu ma le fealofani i le aiga.

O le ā e te faia pe a tulaʻi mai ni taugāupu aasa? O ā auala e mafai ona e faia ina ia toe maua ai le filemu i le aiga? E faapefea ona faatumau le filemu i aiga? Seʻi faaauau lau faitau faamolemole.