LE MANATU O LE TUSI PAIA
Le Oti
E eseese ma feteenaʻi manatu o lotu e faatatau i le mea e tupu i le tagata pe a oti. Peitaʻi, o loo manino ona faamatalaina mai i le Tusi Paia.
Pe e faaauau ona tatou feola i se isi nofoaga pe a tatou feoti?
TALA A TAGATA
O le toʻatele o tagata e talitonu o le a tatou toe feola i se isi nofoaga pe a feoti. O nisi e manatu o le a tatou toe feola mai i se isi tino fou faaletino. Ae o isi e talitonu a tatou feoti e ō i le lagi pe ō i le afi i seoli.
LE MANATU O LE TUSI PAIA
E lē o taʻua i le Tusi Paia a tatou feoti ona ō atu lea i se isi nofoaga. Peitaʻi, o loo taʻua ai e leai se vaega o le tino e ola pea pe a oti le tagata, auā ua toe foʻi atu i le efuefu. Ina ua faailoa atu le faasalaga o Atamu, na fetalai le Atua o le a toe foʻi atu o ia i le efuefu, ma e lē toe ola e pei o le efuefu lea na faia aʻe ai o ia.
“Auā o le efuefu oe, e te toe foʻi atu lava i le efuefu.”—Kenese 3:19.
O le ā e tupu i le tagata pe a oti?
LE MANATU O LE TUSI PAIA
Talu ai e pala o tatou tino pe a tatou feoti, o lea, “e leai se galuega, po o ni fuafuaga, po o le poto, po o le atamai i le Tuugamau.” (Failauga 9:10) Ua faailoa manino mai i le Tusi Paia, pe a oti se tasi, “e toe foʻi atu o ia i le eleele; e faaumatia i lea lava aso ona manatunatuga.” (Salamo 146:4) O le tagata ua oti, ua iai i se tulaga e lē mafai ona ia toe faia se gaoioiga. O le pogai lea e masani ai ona faatusa e le Tusi Paia le oti i le “moe.”—Mataio 9:24.
AISEĀ E TĀUA AI?
Pe a maliliu ē e pele iā te oe, e masani ona e fia iloa tali o fesili e pei o nei: O fea o iai i latou? O le ā ua tupu iā i latou? Po o puapuagatia? Talu ai ua faamautinoa mai i le Tusi Paia o ē ua maliliu ua lē toe iloa se mea, e mafai la ona faamāfanafanaina i tatou i le iloaina, e lē o toe mafatia ē e pele iā i tatou ua maliliu.
“O ē ua oti, latou te lē iloa se mea.”—Failauga 9:5.
Pe e iai se faamoemoe mo ē ua feoti?
LE MANATU O LE TUSI PAIA
Ua folafola mai e le Atua, o le a toetutū mai i latou ua maliliu o loo ia manatua pea, i se lalolagi fou amiotonu. O ē o le a toetutū mai e ao ona iai pea i le tuugamau seʻia oo i le taimi e toe faatutūina mai ai i latou e le Atua. E naunau le Atua e ona le malosi uma lava ina ia faaaogā lona mana e toe faatutū mai ai ē ua maliliu. E faamāfanafanaina foʻi i tatou i le iloaina, ua folafola mai e Ieova o le a ia toe fafagu mai ē o loo momoe i le oti, i se taimi i le lumanaʻi.—Isaia 26:19.
E te Ono Fiafia Foʻi
LE OLOMATAMATA
Le Pepelo e Sauā le Atua
E toʻatele e talitonu e faasala e faavavau e le Atua tagata e agasala. Pe e faia e le Atua se mea leaga? O le ā le mea moni e tupu pe a oti le tagata?
TALIINA O FESILI FAALE-TUSI PAIA
O le ā le Toetū?
E te ono maofa iā i latou o le a toe faatutūina mai i le lumanaʻi.
TALIINA O FESILI FAALE-TUSI PAIA
O le ā le Agaga?
Po o se vaega i totonu o le tagata? Pe o le a ola pea pe a e oti?
LE OLOMATAMATA
