I le aso na e faaipoipo ai, na e faia ai se tautoga e mo le olaga atoa. O se filifiliga e lua te faatasi ma lau paaga ma fofō faafitauli o le a tulaʻi mai.

Ae a o faagasolo tausaga, ua amata ona aafia le lua faiā ona o feeseeseaʻiga. Po o iai lava ou faalogona mo lau paaga e pei ona iai i le amataga?

O le tautoga o se vaifofō ae e lē o se faafitauli. O le toʻatele o tagata i aso nei e lē mautonu i le faia o se tautoga o le faaipoipoga. Ua faatusatusa e nisi le tautoga o le faaipoipoga i le saisaitia o oe i se filifiliga sesē sa e faia. Peitaʻi, ia manatu i le tautoga o se taula e faatumauina ai le faaipoipoga. Na faapea mai se avā e igoa iā Megan, “O se tasi o vala lelei o le tautoga o le faaipoipoga, e tusa pe e iai ni feeseeseaʻiga, ae e te iloa e leai se tasi o oulua o le a tuua le faaipoipoga.” * O lou mautinoa o loo malosi le fusi o le faaipoipoga, e ui e iai ni vala patino e lē o sologa lelei, o le a maua ai se auala e fofō ai a oulua faafitauli.​—Tagaʻi i le pusa “ Faamalosia le Tautoga ma ia Faamaoni.”

Manatu autū: Pe afai o loo iai ni faafitauli i lau faaipoipoga, o le taimi la lenei e faamalosia ai le tautoga, ae lē o le fesiligia. E faapefea?

Iloilo ou manatu. “Faaipoipo mo le olaga atoa.” Pe a e faalogo i lenei faaupuga, pe e te lagona ua leai sou saʻolotoga, pe e te lagona le malupuipuia? Pe a tulaʻi mai ni faafitauli, pe e masani ona e mafaufau e tuua loa lau paaga? Ina ia faamalosia lau tautoga, e tatau ona e vaai i lau faaipoipoga o se feagaiga e tumau.​—Mataupu silisili o le Tusi Paia: Mataio 19:6.

Iloilo lou talaaga. E ono aafia lau vaaiga i le tautoga o le faaipoipoga, ona o mea na e mātauina mai i ou mātua. Na faapea mai se avā e igoa iā Lea, “Na teteʻa oʻu mātua a o oʻu laʻitiiti, ma ou te popole neʻi sesē ai laʻu vaaiga i le faaipoipoga.” Ia e mautinoa e mafai ona ese mai lau faaipoipoga. Aua neʻi manatu o le a e faia foʻi le mea sesē na faia e ou mātua!​—Mataupu silisili o le Tusi Paia: Kalatia 6:4, 5.

Iloilo au tala e fai atu. Pe a lua feeseeseaʻi ma lau paaga, ia ʻalofia le lafo o faamatalaga e mulimuli ane e toe salamō ai, e pei o le “Ua uma taʻua!” pe “O le a ou alu e suʻe se isi e alofa moni iā te aʻu!” O faamatalaga faapena e lē faamalosia ai le tautoga o le faaipoipoga pe fofō ai le faafitauli, ae e na o taugāupu e iʻu i ai. Nai lo le faaaogā o upu faatigā, e te ono faapea atu: “E ta te lē o fiafia uma. E faapefea ona ta foʻia lenei faafitauli?”​—Mataupu silisili o le Tusi Paia: Faataoto 12:18.

Ia iloagofie atu lou alofa i lau paaga. Ia tuu se ata o lau paaga i luga o lau kesi i le galuega. Ia talanoa ma le fiafia i isi e faatatau i lau faaipoipoga. Ia fai ma au masani le vili atu i lau paaga i aso uma pe a lua valavala. Ia fai ma faaaogā faaupuga e pei o “maʻua ma si oʻu toʻalua.” O lou faia faapea, o le a iloa ai e isi ma oe lava, o loo malosi pea le faavae o lau tautoga.

Faaaʻoaʻo i faaaʻoaʻoga lelei a isi. Ia e faaaʻoaʻo i ulugalii matutua, o ē ua taulau i le foʻiaina o faafitauli i a latou faaipoipoga. Ia fesili i ai, “O le ā le uiga o le tautoga o le faaipoipoga iā te oe, ma ua faapefea ona fesoasoani i lau faaipoipoga?” Ua taʻua i le Faataoto 27:17: “E faamaʻai le uʻamea i le uʻamea. E faapena foʻi ona faamaʻai e le tasi tagata foliga o le isi tagata.” E tusa ai o lenei mataupu silisili, e mafai ona e maua aogā mai i fautuaga a ē o loo taulau a latou faaipoipoga.