O LE uiga o le igoa Honduras i le faa-Sipaniolo, o le “Loloto.” I le talafatai i sasaʻe o Honduras, o loo iai le sami o le Atalani, ma atonu sa faaaogā e Christopher Columbus le upu “loloto” e faamatala ai lenei sami. Ua faapea mai nisi o le auala lea na maua ai le igoa o Honduras.

E faatāua tele e tagata Honduras le faamaoni ma le felagolagomaʻi i le aiga. O se faaaʻoaʻoga, e masani ona faia e le tane ma le avā filifiliga i mataupu tāua, e pei o tupe faaalu a le aiga ma aʻoaʻoga a le fanau.

O le toʻatele o tagata Honduras o mestizos, o tagatānuu moni o le nuu ae e iai foʻi o latou pito Europa. O loo iai pea ni vaega o tagatānuu moni, e pei o le vaega ua taʻua o Chortí. O isi tagatānuu o Honduras, e pei o Garifuna, e ese atunuu na tupuga mai ai o latou tuaa.

 O le ituaiga o Garifuna e tupuga mai i tagata Aferika ma Amerika Initia, o ē na muaʻi nofoia le motu o St. Vincent. Pe tusa o le 1797, na taunuu ai tagata Garifuna i Islas de la Bahía (Bay Islands). Mulimuli ane, na latou nofoia le talafatai i sasaʻe o Amerika Tutotonu, lea e iai le sami o le Karipiane. O i inā na amata ai loa ona salalau atu tagata Garifuna i isi vaega o Amerika Tutotonu ma Mātū.

E fiafia tele tagata Garifuna e sisiva a o tā tagipalau e fai mai i laupapa. O se vaega foʻi o lo latou aganuu le ofuina o laʻei e lanu sesega, faamatala fagogo, ma kuka meaʻai e pei o le ereba (o se keke telē ae manifinifi e fai mai i le aa o le manioka).

E pe ā ma le 400 faapotopotoga o Molimau a Ieova i Honduras. E faia sauniga i gagana Sipaniolo, faa-Peretania, Garifuna, Mandarin Chinese, Miskito, ma le gagana Fai Taga a Honduras.