O taimi uma e tulaʻi mai ai se feteenaʻiga i le lua va ma lau paaga, e te lua felafoaʻi faamatalaga e faitioina ai e le tasi le isi. Ua oo ina avea ma a oulua “masani” le faaaogā o upu faatigā pe a talanoa.

Afai o le tulaga lenā o loo iai lau faaipoipoga, e mafai ona e taofia lea masaniga. Peitaʻi, e ao ona e iloilo muamua le pogai o le faafitauli, ma le māfuaaga e tāua ai ona faia ni suiga.

Siʻomaga na ola aʻe ai. O le toʻatele o tane ma avā na ola aʻe i aiga ua masani i le felafoaʻi o upu faatigā. E ono faaaogā la e se tasi o le ulugalii po o i laʻua uma le ituaiga gagana sa tautatala ai foʻi o la mātua.

Faafiafiaga. Ua masani ona faalogo tagata o faaaogā gagana masoā i ata tifaga ma ata fai mea mālie i le televise, ma ua manatu ai e lē leaga ae e mālie.

Aganuu. O nisi atunuu ua manatu o se tane e toa e pulepuletutū, pe manatu e tatau ona lotoa se fafine ina ia avea ai o sē e lototele. O lea, pe a tulaʻi se feteenaʻiga i ulugalii e iai na uiga, e manatu le tasi i le isi o se fili ae lē o se paaga, ma e la te faaaogā upu faatigā nai lo o upu e logolelei.

Po o le ā lava le māfuaaga, ae o upu faatigā e iʻu ai ina tatala se faaipoipoga ma aafia ai i maʻi o le tino. Ua faapea mai nisi e sili atu ona tigā upu nai lo o le sauāina o le tino. O se faaaʻoaʻoga, na taʻua e se avā sa sasa e lana tane ma sauāina i upu: “E sili atu ona tigā upu nai lo o le sasa o le tino. Iā te aʻu, e sili ai pe a fasi aʻu nai lo o le fai mai o upu faatigā.”

O le ā e te faia pe afai ua faaleagaina le lua mafutaga ona o upu faatigā?

Ia magafagafa. Ia tuu oe i le tulaga o lau paaga, ma taumafai e iloa ona faalogona e tusa ai o au upu. Mafaufau i se tulaga patino sa lagona ai e lau paaga le tigā ona o au upu. Aua e te mafaufau i au tala na fai atu, ae ia mafaufau i faalogona o lau paaga ona o au tala na fai. Mafaufau i ni auala e suia ai upu faatigā i upu agalelei. Ua taʻua i le Faataoto 15:1: “O le tali filemu e liliueseina ai le ita, a o le upu faatigā e tupu ai le ita.”

Talanoa i ulugalii ua fai ma faaaʻoaʻoga lelei. Afai ua aafia le auala e te talanoa ai ona o faaaʻoaʻoga lē lelei a nisi, ia saʻili i ē ua fai ma faaaʻoaʻoga lelei. Talanoa atu i ulugalii o loo avea ma faaaʻoaʻoga lelei i upu e tautatala ai.​—Taʻiala faale-Tusi Paia: Filipi 3:17.

Talanoa e uiga i mea lelei. O upu faatigā e masani lava o se faafitauli e pogai mai i le loto ae lē o le gutu. O lea, taumafai e teuloto manatu ma faalogona lelei e uiga i lau paaga. Faamanatu i ai mea sa lua olioli faatasi ai. Toe matamata i ata tuai. O ā mea mālie ma uiga na māfua ai ona tosina le tasi o oulua i le isi?​—Taʻiala faale-Tusi Paia: Luka 6:45.

Faailoa atu ou faalogona. Nai lo o le osofaʻi atu o lau paaga i upu, faailoa atu i ai le aafiaga o ou faalogona. O se faaaʻoaʻoga, aua e te faapea atu, “O lau masani a lenā, e te faia a fuafuaga ae lē talanoa mai iā te aʻu.” Nai lo o lea, o le a ia tali lelei mai pe a e faapea atu, “Ou te lagona e pei ua e lē amanaʻia soʻu manatu, pe a fai au fuafuaga e aunoa ma le talanoa mai iā te aʻu.”—Taʻiala faale-Tusi Paia: Kolose 4:6.

Ia iloa le taimi e lē toe tali atu ai. Pe afai ua amata ona pasae aʻe le ita ma felafoaʻi faamatalaga, e sili ona lelei pe a taofi le talanoaga. E lē sesē le savali ese mai i se finauga aasa, seʻi toʻafilemu ona toe talanoa lea.​—Taʻiala faale-Tusi Paia: Faataoto 17:14.