Pe e lē o mafai e oe ma lau paaga ona foʻia lua feeseeseaʻiga i se auala toʻafilemu? Pe e te lagona le popole ona e te iloaina, o le tala o le a e fai atu e ita ai lou toʻalua ma lua misa ai?

Afai o le tulaga lenā, e mafai lava ona faaleleia. Ae e manaʻomia ona e iloa muamua le pogai e te lua misa soo ai.

Lē femalamalamaaʻi.

Na taʻutino mai se avā e igoa iā Jillian a: “O nisi taimi e fai atu ai saʻu tala i se auala ou te leʻi mafaufauina, pe ou te mafaufau foʻi ua uma ona ou taʻu atu se tala i loʻu toʻalua, ae o le mea moni e leai.”

Eseese Manatu.

E tusa lava pe e foliga mai e talafeagai lelei oe ma lau paaga, ae o le mea moni e iai nisi mea e eseese ai. Aiseā? Ona e lē mafai ona tutusa ni tagata se toʻalua, ma o lenā tulaga e mafai ona iʻu atu ai i se faaipoipoga fiafia pe e faanoanoa. O le tele lava o ulugalii, o le iʻuga e oo i ai o le faanoanoa.

Faaaʻoaʻoga leaga.

Na faapea mai se avā e igoa iā Rasela: “E masani ona misa oʻu mātua ma lafo e le isi upu lē faaaloalo i le isi. O lea, ina ua ou faaipoipo, sa ou talanoa atu i loʻu toʻalua i le auala lava e tasi lea na talanoa atu ai loʻu tinā i loʻu tamā. Ou te leʻi faaalia atu le faaaloalo.”

Māfuaaga moni.

E masani lava ona amata se finauga aasa i se mataupu e lē fesootaʻi atu i le māfuaaga moni o le lē fiafia o se tasi. O se faataʻitaʻiga, e amata se finauga i le faapea atu, “E te tuai mai lava oe ia!” Peitaʻi, e lē māfua lona ita ona o le tuai mai o lana paaga, ae e māfua ona ua manatu ua lē amanaʻia o ia e lana paaga.

Po o le ā lava le māfuaaga, ae o le misa soo e afāina ai le soifua mālōlōina, ma e mafai ona iʻu atu ai i le teteʻa. E faapefea ona ʻalofia le tauaʻimisa?

O le auala sili e ʻalofia ai le misa soo, o le taumafai lea e saʻili le māfuaaga moni e te lua misa ai. Pe a sologa lelei tulaga o mea, ia galulue ma lou toʻalua e faatino vala nei.

1. Ia tofu oulua ma se pepa e tusi ai le māfuaaga na lua misa ai talu ai nei. O se faataʻitaʻiga, e ono tusi e le tane le manatu e faatatau i lana avā, “E te alu i le aso atoa e tafao ma au uō, ae leai ma sou vili mai po o fea o e i ai.” Ae e ono tusi e le avā le manatu e faapea, “Na e lē fiafia ona o loʻu alu e tafao ma aʻu uō.”

2. Ia talanoaina na manatu i se mafaufau e fetālaʻi ma fesili ifo: Po o se mataupu matuiā pe faatauvaa? Ina ia tausia le filemu, e lelei ona lua iloa e iai lava mea e eseese ai lua manatu, ma ufiufi mea uma i le alofa.​—Mataupu silisili o le Tusi Paia: Faataoto 17:9.

Pe a uma ona lua iloilo le mataupu ma iloa ane ua na o se mea e faatauvaa, e sili la ona faatoese le tasi i le isi, ma ia aua neʻi toe mafaufau i ai.​—Mataupu silisili o le Tusi Paia: Kolose 3:13, 14.

Ae pe afai e matuiā tele le mataupu i se tasi o oulua, po o oulua uma foʻi, ia faatino la le isi auala lenei.

3. Ia tusi i lalo lua faalogona i le taimi na lua misa ai. O se faataʻitaʻiga, e ono tusi e le tane e faapea: “Ou te lagona ua sili atu lou faifaimea i au uō nai lo o aʻu.” Ae atonu e tusi mai le avā: “Na ou lagona ua pei aʻu o se tamaʻi teineitiiti e tau suʻe mai lava e loʻu tamā.”

4. Fesuiaʻi lua pepa ma lou toʻalua, ona faitau lea e le isi manatu o le isi. O ā faalogona moni o lou toʻalua i le taimi na lua misa ai? Ia iloilo i se auala filemu le māfuaaga moni o le faafitauli.​—Mataupu silisili o le Tusi Paia: Faataoto 29:11.

5. Talanoa po o le ā se lesona ua lua maua mai i lenei iloiloga. E faapefea ona lua faaaogā na lesona e foʻia pe ʻalofia ai le tulaʻi mai o se isi feeseeseaʻiga?