“O le ā saʻu mea sesē na fai?” O le fesili lenā na mafatia ai le mafaufau o Mikaele a mai i Aferika i Saute. E tusa po o le ā lona taumafai e avea ma tamā lelei, ae pe a vaai atu i le fouvale o lona atalii e 19 tausaga, ona tuufesili lea o lona mafaufau, po o ā nisi auala sa ono ia faia e avea ai o se tamā lelei.

I se faaeseesega, e foliga mai na taulau se tamā e igoa iā Terry mai i Sepania, i le auala na tausia ai lona atalii. Na faapea mai lona atalii o Aneterea: “Ou te manatua lava taimi a o ou laʻitiiti, e faitau mai e loʻu tamā se tusi iā te aʻu, e ma te taaalo faatasi, pe e alu foʻi ma ave aʻu i se mea e ma te tafafao ai. E lē soona inainā le auala e aʻoaʻo mai ai.”

O le mea moni, e lē faigofie le avea ma se tamā lelei, ae ua saunia mai e le Tusi Paia ni fautuaga e fesoasoani iā te oe e avea ma tamā lelei. Ua toʻatele tamā ua maua e o latou aiga aogā ona o le usitaʻia o fautuaga atamai mai le Tusi Paia. O lea, seʻi o tatou iloilo nisi o na fautuaga aogā.

I le avea ai o se tamā, e faapefea ona e faailoa atu i lau fanau e tāua i latou? E tele mea e mafai ona e faia mo lau fanau, e aofia ai le faataulaga o le taimi mo le tausiga o le aiga. E te faia na mea uma ona e tāua lau fanau iā te oe. Ae afai e lē lava le taimi e te faaaluina ma i latou, o le a manatu la o loo sili atu iā te oe isi mea e pei o lau galuega, uō, ma mea e te fiafia i ai, nai lo o i latou.

O le ā le taimi e amata ai ona atiaʻe le faiā a se tamā ma lana fanau? E amata ona atiaʻe e le tinā lana faiā ma le pepe a o iai i le manava. I le 16 vaiaso talu ona afuafua se pepe, ona mafai lea ona faalogo. Ma o le taimi foʻi lea e mafai e le tamā ona atiaʻe se faiā ma le pepe e leʻi fanau mai, e ala i le faalogologo atu i le tātā o lona fatu, o si ana aa mai, ma talatalanoa pe e pese i ai.

Mataupu Silisili o le Tusi Paia: I taimi o le Tusi Paia, na iai foʻi i tamā le matafaioi o le aʻoaʻoina o le fanau. Na faalaeiauina foʻi tamā ina ia faaalu lo latou taimi ma a latou fanau, e pei ona faamaonia mai i le Teuteronome 6:6, 7 e faapea: “Ia teu i lou loto upu ia ua ou poloaʻi atu ai iā te oe i le asō; ia e matuā aʻoaʻo soo ai i lau fanau, ia e tautala ai pe a e nofo i lou fale, pe a e savali i le ala, pe a e taoto pe a e tulaʻi foʻi.”

Ina ia māfana lau faiā ma lau fanau, e manaʻomia ona e atiaʻe le tomai o le faalogologo lelei e aunoa ma le vave faasalavei atu.

Pe a mātauina e lau fanau ou uiga maitaita ma faamasinosino, e latou te lē naunau foʻi la e faailoa atu mea o loo i o latou loto. Ae a e faalogo lelei, o le a faailoa atu ai lou naunau moni iā i latou, ma o le a faigofie foʻi la ona latou talanoa mai iā te oe.

Mataupu Silisili o le Tusi Paia: Ua faamaonia le aogā o fautuaga a le Tusi Paia i o tatou olaga i aso faisoo. O se faataʻitaʻiga, ua faapea mai le Tusi Paia: “Ia faalogologo lelei tagata uma, ae aua le vave ona tautala, ma aua foʻi le vave ona ita.” (Iakopo 1:19) O tamā e faatatauina lenei mataupu silisili, ua mafai ona latou maua ni faiā lelei ma a latou fanau.

E tusa lava pe e te lagona le ita, ae e tatau ona avatu i se auala alofa lau aʻoaʻiga, ina ia mafai ona aogā i le olaga atoa o lau fanau. O aʻoaʻiga, e aofia ai  fautuaga, faasaʻoga, aʻoaʻoga, ma se faasalaga pe a manaʻomia.

E lē gata i lea, e sili atu ona aogā aʻoaʻiga pe a fai ma masani a le tamā le faamālō atu i le fanau. Ua faapea mai se faataoto: “O le upu e fai atu i le taimi tatau, e pei o apu auro i totonu o mea siliva ua togitogiina.” (Faataoto 25:11) O le faamālō atu i le fanau, o le a fesoasoani iā i latou e atiaʻe ai uiga lelei. E maua foʻi e fanau le maufaatuatuaina pe a latou mātauina, o loo faatāua i latou e mātua. O le faamālō atu o le tamā i so o se taimi, o le a fesoasoani ai i le fanau e atiaʻe le maufaatuatuaina, ma uunaʻia i latou e aua le fiugofie e fai le mea saʻo.

Mataupu Silisili o le Tusi Paia: “O outou tamā, aua le faaonoono i a outou fanau, ina neʻi lotovaivai i latou.”​—Kolose 3:21.

O le auala e feutagaʻi ai le tamā ma le tinā, e iai sona aafiaga i le fanau. Na faamatalaina e se tasi o faalapotopotoga faapitoa i le tausia o fanau e faapea: “O se tasi o mea sili e faia e se tamā mo lana fanau, o le faaaloalo lea i lo latou tinā. . . . E mafai ona lagona e le fanau le saogalemu ma le alofa, pe a mātauina o latou mātua e faaaloalo le tasi i le isi.”​—The Importance of Fathers in the Healthy Development of Children. b

Mataupu Silisili o le Tusi Paia: “O outou tane, ia faaauau ona alolofa atu i a outou avā, . . . Ia taʻitasi outou ma alofa i lana lava avā e pei ona ia alofa iā te ia lava.”​—Efeso 5:25, 33.

E mafai e tamā e alolofa moni i le Atua ona tuuina atu i a latou fanau se tofi sili ona tāua, o se faiā māfana lea ma lo latou Tamā i le lagi.

Ina ua mavae le faitau sefulu o tausaga o tausia lana fanau e toʻaono, na maua ai e Atonio, o se tasi o Molimau a Ieova, se tusi mai i sona afafine e faapea: “Mo loʻu tamā peleina, e momoli atu laʻu faafetai ona o lou tausia aʻe o aʻu ina ia avea o se tagata lelei, ma ia ou alofa iā Ieova le Atua faapea oʻu tuaoi. Na e faailoa mai lou alofa iā Ieova ma lou manatu mamafa mai iā te aʻu. Faafetai lava tamā mo lou faamuamua o Ieova i lou olaga, ma le tausia o lau fanau, o ni meaalofa ia mai i le Atua!”

Mataupu Silisili o le Tusi Paia: “Ia e alofa atu foʻi iā Ieova lou Atua ma lou lotoatoa, ma lou ola atoa, ma lou malosi atoa. Ia teu i lou loto upu ia ua ou poloaʻi atu ai iā te oe i le asō.”​—Teuteronome 6:5, 6.

E tele atu isi mea e mafai ona e faia e avea ai oe ma tamā lelei, e ese mai i vala e lima na talanoaina. O le mea moni, e lē mafai ona lelei atoatoa taumafaiga a se tamā, ae pe a e faatatauina nei mataupu silisili i se auala paleni ma alofa, o le a mafai lava ona avea oe o se tamā lelei. c