TALA A TAGATA

O nisi e manatu o le Parataiso ua na o se talafatu. E talitonu isi o se nofoaga e pei o se faatoʻaga e moomoo i ai, e ola ai e faavauvau tagata lelei, olioli faatasi ma faia galuega aogā.

LE MANATU O LE TUSI PAIA

O le upu “parataiso,” e faasino atu i le uluaʻi aiga o le fanau a tagata, le faatoʻaga i Etena. (Kenese 2:7-15) O loo taʻua i le Tusi Paia lenā faatoʻaga, o se nofoaga moni na soifua ai le uluaʻi ulugalii e aunoa ma ni maʻi ma le oti. (Kenese 1:27, 28) Ae ona o lo la lē usiusitaʻi i le Atua, na leiloa ai lo la aiga parataiso. E ui i lea, e tele valoaga o le Tusi Paia o loo faamatala ai se lumanaʻi o le a olioli ai tagata, i le Parataiso o le a toe faafoʻisia.

AISEĀ E TĀUA AI IĀ TE OE?

Afai e alofa le Atua, e talafeagai la ona faapea atu, o le a ia tauia tagata tapuaʻi faamaoni i se olaga lelei i le Parataiso. E na te faailoa atu foʻi i tagata mea e ao ona latou faia, ina ia maua ai lona finagalo malie. Ua taʻua i le Tusi Paia e te maua le finagalo malie o le Atua, e ala i le aʻoaʻoina o le poto e uiga iā te ia, ma usitaʻia ana poloaʻiga.​—Ioane 17:3; 1 Ioane 5:3.

“Ua totōina foʻi e Ieova le Atua le faatoʻaga i Etena . . . ona ia tuu ai lea i inā o le tagata na ia faia.”​—Kenese 2:8.

TALA A TAGATA

E talitonu isi o le Parataiso e i le lagi, ae manatu isi o le a faavaeina i le lalolagi i le lumanaʻi.

LE MANATU O LE TUSI PAIA

O le uluaʻi Parataiso mo le fanau a tagata sa i luga o le lalolagi, ma na faatulaga e le Atua e fai ma aiga tumau o le fanau a tagata. Ua taʻua i le Tusi Paia na faia e le Atua lo tatou paneta ia tumau e faavavau. (Salamo 104:5) Ua taʻua i le Salamo 115:16: ʻO le lagi e iā Ieova lea, a ua tuuina mai e ia le lalolagi i le fanau a tagata.’

E lē o se mea la e faateʻia ai le taʻua i le Tusi Paia o le folafolaga e uiga i le Parataiso i le lalolagi, lea o le a faamanuia ai e le Atua tagata i le ola e faavavau. O le a olaola le autasi ma le filemu, lē toe iai ni tigā ma puapuaga, ma o le a olioli tagata i mea ofoofogia o le lalolagi paneta.​—Isaia 65:21-23.

“Ua iai i tagata le faleʻie o le Atua, . . .  e lē toe iai se oti, po o se faanoanoa, po o se tagiauē, e lē toe iai foʻi se tigā.”​—Faaaliga 21:3, 4.

TALA A TAGATA

E aʻoaʻo i le tele o lotu e na o tagata lelei o le a ola i le Parataiso. Ae e lē o mautonu tagata, po o le ā e ao ona fai ina ia avea ai se tasi ma tagata “lelei.” E manatu isi, a toʻaga i le lotu ma fai tatalo faatauloto, ua lava lenā.

LE MANATU O LE TUSI PAIA

Ua aʻoaʻoina i le Tusi Paia o le a ola “ē e amiotonu” i le Parataiso. Ae o ai ē e amiotonu i le silafaga a le Atua? E lē o se tagata e auai i tū masani a lana lotu ae lē amanaʻia le finagalo o le Atua. Ua taʻua i le 1 Samuelu 15:22: “Pe e sili ea le fiafia o Ieova i taulaga mū ma isi taulaga, i le fiafia i le usiusitaʻi i le siʻufofoga o Ieova? Faauta! E sili atu le usiusitaʻi i lo o le taulaga.” Pe a faafaigofie, o “ē e amiotonu” o le a ola e faavavau i le Parataiso, o i latou ia e usiusitaʻi i poloaʻiga a le Atua o loo i le Tusi Paia.

LE MEA E AO ONA E FAI

E tele mea e aofia ai i le usitaʻia o poloaʻiga a le Atua nai lo o le tau ina auai i lotu. E te ono faafiafia pe faatigā i le Atua, i au amio i aso taʻitasi. E mafai ona e faafiafiaina le Atua e ala i le iloilo totoʻa o le Tusi Paia, ma e lē faigatā ona faafiafia o ia auā “e lē mamafa ana poloaʻiga.” (1 Ioane 5:3) E naunau Ieova e tauia lou usiusitaʻi, e ala i le talia o oe e ulu atu i le Parataiso.

“E fai lava le lalolagi mo ē e amiotonu, e nonofo ai pea i latou e oo i le faavavau.”​—Salamo 37:29.