Le Tusi Paia—O se Tusi o Valoaga e Saʻo Aʻiaʻi Vaega 1
Le Tusi Paia—O se Tusi o Valoaga e Saʻo Aʻiaʻi
Vaega 1
“Ou te Faia Oe ma Nuu Tele”
I lenei mataupu faasolo e valu vaega, o le a talanoaina ai i le “Ala Mai!” se vala mataʻina o le Tusi Paia—o valoaga. O le a fesoasoani mataupu iā te oe ina ia taliina ai fesili nei: Po o valoaga o le Tusi Paia ua na o ni tusitusiga a ni tagata atamamai? Pe e faamaonia na faagaeeina e le Atua nei valoaga? E matou te valaaulia oe ia iloilo faamaoniga.
O LE masalosalo ma le lē talitonu—ua taatele nei uiga i o tatou taimi, ma ua atagia mai ai le vaaiga a nisi tagata e uiga i le Tusi Paia. O le itu e faanoanoa ai, e toʻatele tagata e latou te lē o faaaluina se taimi e iloilo totoʻa ai le Tusi Paia. O loo faavae o latou manatu i tala e faalogo i ai. E matou te faamoemoe e lē o lou manatu lenā. Pe afai o lea, ia iloilo faatasi ma i matou mea na tutupu i aso ua mavae, lea o le a fesoasoani e faasusulu mai ai le malamalama e uiga i mea moni e faamaonia ai le saʻo aʻiaʻi o le Tusi Paia.
E amata mai la tatou iloiloga i se tagata o loo faaaloalogia pea e Kerisiano, tagata Iutaia ma Musalimi. O ia o se Eperu ma na ola mai i le 2018 i le 1843 T.L.M. * O lona igoa o Aperaamo. *
O nisi o uluaʻi valoaga na faamauina i le Tusi Paia sa taulaʻi atu iā Aperaamo—o valoaga o loo aafia ai foʻi i tatou i aso nei. (Tagaʻi i le pusa “O se Faamanuiaga mo ʻNuu Uma.’”) E tusa ai o le tusi o Kenese, o nei valoaga e aofia ai mea nei: (1) O le a avea le fanau a Aperaamo ma nuu malosi. (2) A o faasolo ina avea ma nuu malosi, o le a faapologaina i latou i se nuu ese. (3) O le a faasaʻolotoina i latou ma fai ma o latou tofi le laueleele o Kanana. Seʻi o tatou iloiloina atili nei faamatalaga.
Valoaga Mataʻina e Tolu
Valoaga 1: “Ou te faia oe [Aperaamo[ ma nuu tele.”—Kenese 12:2.
Faataunuuga: Sa avea ē na tupuga mai iā Aperaamo e ala mai iā Isaako ma Iakopo (lea sa taʻua foʻi o Isaraelu), ma nuu anamua o Isaraelu—o se malo sa iai ni ona lava pulega tautupu.
Mea ua faaalia mai i le talafaasolopito:
● O loo faamatala auʻiliʻili mai i le Tusi Paia le gafa o le aiga o Aperaamo, e aofia ai ē na tupuga mai iā te ia e ala mai iā Isaako, Iakopo ma ona atalii e toʻa 12. O loo aofia ai foʻi i le gafa le toʻatele o tupu o ē na pule i Isaraelu po o Iuta. O le toʻa 17 o na tupu o loo taʻua i ni faamaumauga e lē mai i le Tusi Paia, e ōgatusa ma faamaumauga a le Tusi Paia e tusa ai o le auala na avea ai ma nuu ē na tupuga mai iā Aperaamo, e ala mai iā Isaako ma Iakopo. *
Valoaga 2: ʻO le a aumau lau fanau Aperaamo i se atunuu e lē o so latou atunuu, e nofo pologa lau fanau iā i latou. Ae e toe foʻi mai lau fanau i le augātupulaga lona fā.’—Kenese 15:13, 16.
Faataunuuga: Talu ai ona o se oge i Kanana, o lea na nonofo ai i Aikupito tupulaga e fā o ē na tupuga mai iā Aperaamo, i le taimi muamua o ni ē e aumau, ae mulimuli ane o ni pologa na tofia e faia piliki mai le ʻele ma vao mamago. Seʻi manatu i le gafa o le aiga e tasi—le atalii o le atalii o le atalii o Aperaamo o Levi, o lē na siitia atu i Aikupito ma lona tamā ua matua—o tupulaga e fā o (1) Levi, (2) lona atalii o Koato, (3) le atalii o lona atalii o Amaramo, ma lona (4) o le atalii o le atalii o lona atalii o Mose. (Esoto 6:16, 18, 20) I le 1513 T.L.M., na taʻitaʻiina ese mai ai e Mose le nuu o Isaraelu mai i Aikupito.—Tagaʻi i le faasologa i le pito i lalo ma le pusa “O le Tausi Taimi Saʻo Aʻiaʻi.”
Mea ua faaalia mai i le talafaasolopito:
● Na taʻua e James K. Hoffmeier, le polofesa o le Feagaiga Tuai ma suʻesuʻega i toega o mea i le eleele, ua faamaonia mai i tusitusiga a Aikupito ma suʻesuʻega o toega o mea o le eleele, sa faatagaina le ituaiga o Semi (e pei o tagata Eperu anamua) e ō atu i Aikupito ma a latou lafumanu i le taimi o le oge. Ae pe na avea tagata Isaraelu ma pologa i inā, o ē na tofia e faia piliki?
● E ui lava e lē o taʻua patino i faamaumauga a Aikupito tagata Isaraelu, ae o ata e vali i tuugamau o tagata Aikupito ma tusi tāʻai, ua faamaonia ai na faaaogā e Aikupito tagata ese ina ia faia piliki mai le palapala ma vao mamago. I le ōgatusa ai ma le Tusi Paia, ua faaalia foʻi i faamaumauga a Aikupito sa iai i ē pule e vaavaaia galuega, ni lisi o aofaʻiga o piliki e ao ona fai i aso taʻitasi. (Esoto 5:14, 19) Ua faapea mai Hoffmeier: “Ua faamaonia mai i tusi a Aikupito, sa faamalosia tagata ese e faia galuega a pologa . . . i le taimi atoa ina ua sauāina ma le lē alofa tagata Isaraelu. I le aotelega, o le ulufale atu i Aikupito o tagata Eperu anamua . . . i le taimi o le oge ma le faapologaina o i latou mulimuli ane, e foliga mai e moni.”
Valoaga 3: ʻOu te avatua i lau fanau le laueleele atoa o Kanana.’—Kenese 17:8.
Faataunuuga: E ui lava sa taʻitaʻia ese e Mose le nuu fou o Isaraelu mai i Aikupito, ae o Iosua, le atalii o Nuno, na taʻitaʻia atu le nuu i le laueleele o Kanana i le 1473 T.L.M.
Mea ua faaalia mai i le talafaasolopito:
● E ui atonu e eseese aso e taʻua e le ʻau eli eleele, ae na tusi K. A. Kitchen, le polofesa i tala a Aikupito e faapea, “e tatau ona tatou talanoa e uiga i se tagata Isaraelu na ulu atu i Kanana ma nofo ai.”
● O loo taʻua i le Tusi Paia ʻna susunu e Iosua le aai Kanana o Hasora i le afi.’ (Iosua 11:10, 11) I mea na faaleagaina o le aai, na eli e le ʻau eli eleele malumalu e tolu o Kanana na faatamaʻia. Na latou maua foʻi faamaoniga e faapea na susunuina le aai i vaitausaga o le 1400 T.L.M. E ōgatusa lelei nei faamatalaga ma le Tusi Paia.
● O le isi aai mataʻina o Kanana, o Kipeona, lea sa tū i le tusa ma le ono maila [9.6 km] mai i Ierusalema. Sa mātaulia e le ʻau eli eleele le aai ina ua latou mauaina le tusa ma le 30 ʻau o fagu ma o loo vane ai le igoa o le aai. I le lē pei o tagata na nonofo i Hasora, sa faia e tagata Kipeona anamua se leleiga ma Iosua. Ona ia tuu atu lea iā i latou e galulue o ni ē e “asu vai.” (Iosua 9:3-7, 23) Aiseā na tofia ai i lenei galuega? Ua faaalia i faamatalaga o loo i le 2 Samuelu 2:13 ma le Ieremia 41:12, sa faamanuiaina Kipeona i vai e tele. O lea la, i le ōgatusa ai ma faamatalaga a le Tusi Paia, ua taʻua i le Archaeological Study Bible, New International Version e faapea: “O le vala e sili ona mataʻina e uiga i le aai o Kipeona, o le tele o vai ina ia maua ai le suāvai: e tasi le vai tele ma tamaʻi vai e fitu.”
● O le mea moni, o le toʻatele o tagata o loo taʻua i le Tusi Paia o loo faamaonia e isi faamaumauga o le talafaasolopito. E pei ona taʻua muamua, o lenei lisi o loo aofia ai igoa o tupu e toʻa 17 o ē na tupuga mai iā Aperaamo, ma avea ma tupu i Isaraelu ma Iuta. E aofia ai iā i latou na Aapo, Aasa, Tavita, Esekia, Manase ma Usia. E manino mai, o le iai o le gafa ma le aiga tautupu, o le faamaoniga malosi lea e faapea na ulu atu le malo e taʻu o Isaraelu i le laueleele o Kanana ma nofoia.
● I le 1896, na maua ai e tagata suʻesuʻe le maa faamanatu a Merneptah i Tese i Aikupito. O loo iai i lenei maa faamanatu upu faamaualuga a Farao Merneptah, i le manumalo a lana ʻautau a o agaʻi atu i Kanana i le pe tusa o le 1210 T.L.M. O loo iai foʻi i lenei maa faamatalaga e leʻi maua muamua e uiga i le nuu o Isaraelu, ma ua atili ai ona faamaonia sa iai moni lava lenei nuu.
Le Aogā o Faamatalaga Saʻo
E pei ona tatou iloaina, e anoanoaʻi faamatalaga maʻoti o loo i le Tusi Paia e faatatau i tagata, nofoaga ma mea na tutupu. O na faamatalaga maʻoti ua mafai ai ona tatou faatusatusa mea o fai mai ai le Tusi Paia ma faamatalaga e lē mai le Tusi Paia, ona fesoasoani lea iā i tatou e faamaonia ai le faataunuuina o valoaga o le Tusi Paia. E tusa ai o Aperaamo ma lana fanau, ua faaalia i mea moni e faapea na faataunuuina folafolaga a le Atua—sa avea le fanau a Aperaamo ma nuu, sa faapologaina i latou i Aikupito, ma na mulimuli ane latou nofoia le laueleele o Kanana. Ua faamanatu mai ai i inei iā i tatou upu a le tusitala o le Tusi Paia o Peteru, o lē na faamaonia mai ma le lotomaulalo: “E lē o loto o tagata na aumai ai valoaga, ae na tautatala tagata i mea na faailoa mai e le Atua e ala i le taʻitaʻiga a le agaga paia.”—2 Peteru 1:21.
I senituri mulimuli ane ina ua nofoia e Isaraelu Kanana, sa iai se suiga telē i le malo ma iʻu ai i ni āuga mataʻutia. Sa valoia foʻi e tusitala o le Tusi Paia nei āuga, e pei ona o le a faaalia i le mataupu o loo sosoo mai.
[Faaopoopoga i lalo]
^ pala. 5 O le “T.L.M.” o lona uiga o le “Tausaga a o Lumanaʻi le Mesia.”
^ pala. 5 Sa igoa muamua Aperaamo iā Aperamo.
^ pala. 11 Tagaʻi i le 1 Nofoaiga a Tupu 1:27-34; 2:1-15; 3:1-24. I le taimi o le nofoaiga a Reopoamo le atalii o le tupu o Solomona, na vaeluaina ai Isaraelu i le malo i mātū ma le malo i saute. Mulimuli ane, na pule faatasi na tupu e toʻalua i Isaraelu.—1 Tupu 12:1-24.
[Pusa i le itulau 15]
O SE FAAMANUIAGA MO “NUU UMA”
Na folafola mai e le Atua o le a faamanuiaina tagata o “nuu uma” e ala mai i le fanau a Aperaamo. (Kenese 22:18) O le māfuaaga autū na faia ai e le Atua le fanau a Aperaamo e avea ma nuu, ina ia ala mai ai le Mesia, o lē o le a ofo atu lona soifua mo tagata uma. * O lea la, o loo aofia ai oe i le folafolaga a le Atua iā Aperaamo! Ua faapea mai le Ioane 3:16: “O le alofa tele o le Atua i le lalolagi, na ia foaʻi mai ai lona Atalii e toʻatasi, ina ia lē fano tagata uma e faatuatua iā te ia, a ia maua le ola e faavavau.”
[Faaopoopoga]
^ pala. 34 I le Vaega 3 ma le 4 o lenei faasologa o mataupu, o le a iloiloina ai valoaga e fesootaʻi patino atu i le faailoga e iloa ai le Mesia.
[Pusa i le itulau 15]
O LE TAUSI TAIMI SAʻO AʻIAʻI
O se faataʻitaʻiga o le tāua o le saʻo aʻiaʻi ona faamauina o taimi i le Tusi Paia, o loo faaalia mai i le 1 Tupu 6:1, lea e faasino atu i le taimi na amata ai e le tupu o Solomona le galuega o le malumalu i Ierusalema. E faitauina e faapea: “I le fā selau valu sefulu tausaga [479 tausaga atoatoa] talu ona tuua e le fanauga a Isaraelu le nuu o Aikupito, o le tausaga lona fā [o le nofoaiga a Solomona] i le masina lona lua o Sefa, ina ua faia Solomona ma tupu o Isaraelu, na amata ai ona ia faia le fale mo Ieova.”
I taimi o mea na tutupu i le Tusi Paia, o loo faamauina ai o le tausaga lona fā o le nofoaiga a Solomona, o le 1034 T.L.M. Pe a faitau tausaga atoatoa e 479 agaʻi i tua e amata mai i lenā aso, e tatou te taunuu ai i le 1513 T.L.M., le tausaga o le faigāmalaga a Isaraelu.
[Pusa i le itulau 16]
O APERAAMO O SE TAGATA MONI NA SOIFUA
● O loo tusia i papamaa ʻele mai i le amatamataga o le meleniuma lona lua T.L.M., aai e tutusa lelei ma igoa o tauaiga o Aperaamo. O nei aai e aofia ai Peleko, Seruka, Nakori, Tara ma Karana.—Kenese 11:17-32.
● I le Kenese 11:31, e tatou te faitau ai e faapea na siitia atu Aperaamo ma lona aiga i “Uro i Kaletaia.” Sa maua i saute i sasaʻe o Iraq toega o mea na faaleagaina o lenei aai. Ua taʻua foʻi i le Tusi Paia na maliu le tamā o Aperaamo, o Tara, i le aai o Karana, lea atonu o loo iai i aso nei i Turkey, ma na maliu Sara le avā a Aperaamo i Heperona, o se tasi o aai pito i leva o Sasaʻe Tutotonu o loo aināina pea.—Kenese 11:32; 23:2.
[Siata i le itulau 14]
(Tagaʻi i le lomiga mo le ata atoa)
FAASOLOGA O LE FANAU A APERAAMO MA LE FAIGĀMALAGA A ISARAELU
O tupulaga e fā na tupuga mai iā Aperaamo
Levi
Koato
Amaramo
Mose
(T.L.M.)
1843 Maliu Aperaamo
1728 Siitia atu e Iakopo lona aiga i Aikupito
1711 Maliu Iakopo
1657 Maliu Iosefa
1593 Fanau mai Mose
1513 Taʻitaʻi ese mai e Mose le nuu o Isaraelu mai Aikupito
1473 Maliu Mose. Taʻitaʻi atu e Iosua le nuu o Isaraelu i le laueleele o Kanana
Taimi o Faamasino
1117 Faauu e Samuelu Saulo e avea ma tupu muamua o Isaraelu
1107 Fanau mai Tavita
1070 Avea Tavita ma tupu o Isaraelu
1034 Amata ona fausia e Solomona le malumalu
[Ata]
O lenei maa o le manumalo, o loo tusia ai le faamatalaga “Fale o Tavita,” o se tasi o faamaoniga o loo taʻua ai tupu o ē na tupuga mai iā Aperaamo ma pule i Isaraelu po o Iuta
[Ē Ana le Ata]
© Israel Museum, Jerusalem/The Bridgeman Art Library International
