Ua Fesili Mai Talavou

O le ā le Ituaiga o Tagata e Iai Aʻu?

Ua vaai atu Mikaele iā Pati ma ua ia iloa lelei le mea o le a tupu. Ua fai atu Pati: “Malo Mikaele, avatu lau tasi lea!” Ua tuu mai le lima o Pati ma ua iloa atu e Mikaele se mariuana, ma o le mea tonu lava lea na ia faatalitalia. E leʻi manaʻo o ia e talia le mariuana, ae e lē o manaʻo foʻi e foliga atu e palaai. Ua musumusu atu Mikaele: “Vaai, seʻi oo i se isi taimi . . . ua e iloa?”

Ua vaai atu Jessica ua sau Pati, ma ua sauni o ia i le mea o le a tupu. Ua faapea mai Pati: “Malo Jess, avatu lau tasi lea!” Ua tuu mai le lima o Pati ma ua iloa atu e Jessica se mariuana, ma o le mea tonu lava lea na ia faatalitalia. Ua tali atu ma le mautinoa Jessica: “Leai faafetai, o lea ou te fia ola umi. Na ou faapea o oe o se tagata poto e lē mafai ona e ulaula!”

I TALA o loo taʻua i luga, aiseā na faigofie ai ona teena e Jessica le faaosoosoga? Ona sa iā te ia se mea e lē o iai iā Mikaele. E te iloa o le ā lenā mea? O le ituaiga o tagata e iai o ia. Na fesoasoani lenā mea iā te ia e tetee atu i so o se faaosoosoga e tulaʻi mai, ma mafai ai ona pulea lona olaga nai lo o le pulea e isi. E faapefea ona e maua lenā mautinoa? O le taliina o fesili o loo mulimuli mai o le a fesoasoani iā te oe.

1 O Ā NI TALENI O IĀ TE AʻU?

Le māfuaaga e aogā ai: O le iloaina o ou tomai ma ou uiga lelei o le a faamalosia ai lou mautinoa.

Ia mātau: E tofu tagata uma ma meaalofa eseese. O se faaaʻoaʻoga, e talenia nisi tagata i le tusi ata po o le musika, a o isi e lelei i taaloga. E lelei Raquel i le fai taavale. * Ua faapea mai o ia: “Ina ua 15 oʻu tausaga, na ou manaʻo e avea aʻu ma inisinia.”

Faaaʻoaʻoga i le Tusi Paia: Na tusi le aposetolo o Paulo: “Afai foʻi ou te valea i le upu, ou te lē valea lava i le poto.” (2 Korinito 11:6) O le malamalama lelei o Paulo i le Tusi Paia, na mafai ai ona tumau o ia ina ua tauemu ane tagata. E na te leʻi faatagaina amioga lē lelei a na tagata e faavaivaia ai lona mautinoa.—2 Korinito 10:10; 11:5.

Ia iloilo oe lava: Ia tusi i lalo sau taleni po o sou tomai o iai.

․․․․․

Ia faamatala sou uiga lelei o iai. (O se faaaʻoaʻoga, po o oe o se tagata manatu mamafa, aaofoaʻi, maufaatuatuaina, pe e tausi taimi?)

․․․․․

 “Ou te taumafai e fesoasoani i isi pe a latou manaʻomia. Pe afai e fia talanoa se tasi ae o loo oʻu pisi, e tuu laʻu mea o loo fai ae faalogologo atu iā te ia.”—Brianne.

Pe afai e te lē o iloa ni au taleni o iai, ia mafaufau i se auala ua faaleleia ai ou uiga talu mai lou laʻitiiti ma ia tusi i lalo.—O ni faaaʻoaʻoga, tagaʻi i le pusa “Tala a Isi Talavou.”

․․․․․

2 O Ā OʻU VAIVAIGA?

Le māfuaaga e aogā ai: E iai ni āuga leaga i le ituaiga o tagata e iai oe pe afai e te faataga ou vaivaiga e pulea lou olaga.

Ia mātau: E leai se isi e lelei atoatoa. (Roma 3:23) E tofu tagata uma ma se uiga e manaʻo e faaleleia. Na fesili se teineitiiti e igoa iā Seija: “Aiseā ou te ita ai fua i nai mea lāiti? E oo lava i mea lāiti ou te ita ai, ma vave ai ona lē pulea oʻu faalogona!”

Faaaʻoaʻoga i le Tusi Paia: Na iloa lelei e Paulo ona vaivaiga. Na tusi o ia: “Ou te matuā naunau i le tulafono a le Atua e tusa ma le tagata i totonu, ae ua ou iloa i loʻu tino se isi tulafono, o loo feteenaʻi ma le tulafono a loʻu mafaufau, ma ua faapologaina ai aʻu i le tulafono a le agasala.”—Roma 7:22, 23.

Ia iloilo oe lava. O ā vaivaiga e manaʻomia ona e pulea?

․․․․․

“Ua ou mātauina, pe a uma ona ou matamata i ata tifaga o faigāuō, e masani ona ou faanoanoa ma manaʻo e maua saʻu uō. O lea la ua ou iloa e tatau ona ou faaeteete i na ituaiga o faafiafiaga.”—Bridget.

3 O Ā OʻU SINI?

Le māfuaaga e aogā ai: Pe afai e iai ni ou sini, ua iai la se faamoemoe ma se fuafuaga o lou olaga. O le a e ʻalofia foʻi tagata ma tulaga e ono faafaigatā ai ona e faataunuuina mea ua e filifili e fai.

Ia mātau: Po o le a e alu i se taavale laʻupasese ma e fai i le avetaavale e alu faataamilo le taavale i se poloka seʻia oo ina uma le penisini? E matuā valea lenā mea ma e taugatā foʻi. E fesoasoani ou sini ina ia e taulau manuia ai i lou olaga. E te iloa le mea o loo e agaʻi iai ma ua e fuafuaina le auala e te taunuu ai i inā.

Faaaʻoaʻoga i le Tusi Paia: Na tusi Paulo: “E lē o faalētonu laʻu tamoʻe.” (1 Korinito 9:26) Nai lo o le fesouaʻiina i mea na tutupu i le olaga, na faataatitia e Paulo ni sini ma ola e tusa ai ma na sini.—Filipi 3:12-14.

Ia iloilo oe lava: Ia tusi i lalo ni sini se tolu o loo e manaʻo e ausia i le tausaga o loo sosoo mai.

1 ․․․․․

2 ․․․․․

3 ․․․․․

 Ia vaai po o fea o na sini e sili ona tāua iā te oe, ma ia tusi mea e mafai ona e faia i le taimi lenei ina ia ausia ai.

․․․․․

“Ua ou iloa e leai se aogā o loʻu olaga pe afai ou te lē pisi. E sili ai le faataatitia o ni sini ma taumafai e ausia.”—José.

4 O Ā MEA OU TE TALITONU I AI?

Le māfuaaga e aogā ai: Pe a aunoa ma le iloa o mea e te talitonu i ai, o le a e lē faia la ni faaiʻuga manino. E pei o se pili e fesuisuiaʻi lona lanu, o le a e suia oe lava ina ia fetaui ma le tulaga o au uō, ma ua faaalia ai lou lē iloa o le ituaiga o tagata e iai oe.

Ia mātau: Ua faalaeiauina Kerisiano e le Tusi Paia ina ia ʻfaamaonia e i latou lava po o le ā le finagalo o le Atua, lea e lelei, e mālie, ma lelei atoatoa.’ (Roma 12:2) Pe a faavae au gaoioiga i mea e te talitonu iai, o lenā la o loo e ola e tusa ma le ituaiga o tagata e iai oe, e tusa lava po o ā mea o loo faia e isi.

Faaaʻoaʻoga i le Tusi Paia: A o talavou le perofeta o Tanielu, na “maumauaʻi . . . i lona loto” e na te tausia tulafono a le Atua, e ui lava na mamao ese mai i lona aiga ma uso tapuaʻi. (Tanielu 1:8) O le faia faapea, ua tumau ai ona faamaoni o ia e tusa ai ma le ituaiga o tagata e iai o ia. Na ola Tanielu e tusa ma ona talitonuga.

Ia iloilo oe lava: O ā mea e te talitonu i ai? O se faaaʻoaʻoga:

● Pe e te talitonu i le Atua? Pe afai o lea, aiseā? O ā faamaoniga ua e talitonu ai o loo soifua o ia?

● Pe e te talitonu o tapulaa tau amio a le Atua e mo lou lelei? Pe afai o lea, aiseā? O se faaaʻoaʻoga, aiseā ua e talitonu ai, o le usitaʻia o tapulaa a le Atua e faatatau i feusuaʻiga, o le a sili ai ona e fiafia nai lo o le faataʻitaʻi i olaga “tuufau” o au uō?

E lē tatau ona faatopelau ona taliina nei fesili. Ia faaalu se taimi e iloilo ai māfuaaga o ou talitonuga. O le faia faapea, o le a e nofosauni ai e tali atu e tusa ai ma ou talitonuga.—Faataoto 14:15; 1 Peteru 3:15.

“E ula mai tamaiti i le aʻoga i oʻu talitonuga, ma ou te lē manaʻo e vāai mai o oʻu lē mautonu e uiga i loʻu faatuatua. O lea la, na ou galue malosi ai e iloa māfuaaga manino ma maumaututū o oʻu talitonuga. Nai lo o le fai atu la i tagata, ʻE lē mafai ona ou faia lenā mea ona e faasā i laʻu lotu,’ ae e sili ai le faapea atu, ʻOu te manatu e lē saʻo lenā mea.’ O oʻu talitonuga na.”—Danielle.

O lea la, o lē fea mea e sili iā te oe, o le avea o oe e pei o se laulaau ua lelea solo i taimi uma e agi mai ai le savili, po o le avea o se laau malosi e mafai ona tatalia afā? Ia faamalosia le ituaiga o tagata e iai oe, ona mafai lea ona avea oe e pei o lenā laau. O le a fesoasoani lenā mea iā te oe ina ia tali ai le fesili, O le Ā le Ituaiga o Tagata e Iai Aʻu?

E maua nisi mataupu faa-Peretania o le faasologa, “Ua Fesili Mai Talavou” i le initaneti i le www.watchtower.org/ype

[Faaopoopoga i lalo]

[Pusa/Ata i le itulau 27]

TALA A ISI TALAVOU

“A o ou tuputupu aʻe, na ou iloaina ai e tatau ona iloilo itu uma pe a fai ni aʻu filifiliga, e tusa pe e tāua pe e lē tāua, ma ou ʻalofia ai le faia o mea e lē fiafia i ai le Atua.”

“A o oʻu laʻitiiti, na ou manatu o tagata e ese mai iā te aʻu, e ese lava i latou. I le taimi lenei, ua ou fiafia i le manatu e lē tutusa uma tagata, ma ua ou fiafia foʻi i manatu faaalia o isi.”

[Ata]

Ieremia

[Ata]

Jennifer

[Pusa i le itulau 28]

AISEĀ E LĒ FESILI AI I OU MĀTUA?

O ā taleni e te lua iloa o loo iai iā te aʻu? O ā uiga e te lua manatu e tatau ona ou galue ai? Na faapefea ona lua atiaʻe le talitonu i tapulaa a le Atua?

[Siata i le itulau 26]

(Tagaʻi i le lomiga mo le ata atoa)

TALENI

VAIVAIGA

SINI

TALITONUGA

[Ata i le itulau 28]

Pe afai e te iloa lelei le ituaiga o tagata e iai oe, o le a pei la oe o se laau ua mauaa e mafai ona tatalia afā malolosi