Le Manatu o le Tusi Paia

Pe e Tatau Ona Tatalo i Sagato?

Sa manatu Maria ma Telesia, o i laʻua o ni Katoliko faamaoni. E talitonu i laʻua uma i sagato. E manatu Maria e maua le fesoasoani pe a tatalo i sagato. E masani ona tatalo Telesia i aso o le sulufaga o le sagato o lo latou aai. E tatalo foʻi i le sagato lea e faaigoa ai o ia.

E FAITAU miliona tagata i le lalolagi e pei o Maria ma Telesia, o loo tatalo i sagato mo se faamanuiaga. E tusa ai ma le lomifefiloi New Catholic Encyclopedia, “o sagato, e fautua mo tagata,” ma “ʻe tatau’ ona ōle atu iā i latou . . . mo ni faamanuiaga mai i le Atua.”

Ae o le ā le silafaga a le Atua i lenei mataupu? Pe e finagalo o Ia e tatou te tatalo atu iā te ia e ala atu i sagato? Seʻi iloilo le mea ua fai mai ai le Tusi Paia.

Pe e Tatau Ona Ōle Atu i Sagato mo Faamanuiaga?

I le Tusi Paia, o le upu Eleni ua faaliliuina “sagato,” e uiga foʻi i “tagata paia.” Peitaʻi, e lē o taʻua i le Tusi Paia se tagata tapuaʻi faamaoni i le Atua, na ōle atu i se tagata paia. Aiseā? Ua faapea mai le New Catholic Encyclopedia, e faatoʻā “manino i le senituri lona tolu le manaʻomia e tagata ona ōle atu i sagato.” E tusa lenā ma le 200 tausaga talu ona maliu Keriso. O lea la, o lenei aʻoaʻoga, e leʻi faavaeina e Iesu po o tusitala o le Tusi Paia, o ē na tusia faamatalaga e uiga i lana faiva. Aiseā?

O loo aʻoaʻo mai pea i le Tusi Paia, e na o le Atua e tatau ona tatou tatalo atu i ai e ala i le suafa o Iesu Keriso. Na fetalai Iesu: “O aʻu nei le ala, ma le upu moni, ma le ola; e le alu atu lava se tasi i le Tamā, pe a le ui mai ia te aʻu.” (Ioane 14:6, Jerusalem Bible a le Katoliko) Ua ōgatasi na upu ma aʻoaʻoga a Iesu o loo i le Mataio 6:9-13. Na fetalai Iesu i ona soo a o aʻoaʻo atu e uiga i tatalo: “Ia faapea ona outou tatalo: Lo matou Tamā e o i le lagi, ia faapaiaina lou suafa. . . . ” (Mataio 6:9) O lea la, e na o lo tatou Tamā o i le lagi e tatau  ona tatou tatalo atu i ai. Ua talafeagai lenei manatu ma aʻoaʻoga faavae o le Tusi Paia.

Tatalo—O se Vaega o le Tapuaʻiga

Ua taʻua i le World Book Encyclopedia, “O le tatalo, o le talanoa atu lea ma le migao i le Atua, ni atua, atua fafine ma isi mea e masani ona tapuaʻi i ai. . . . O le tatalo o se vala tāua o tapuaʻiga i le toetoe lava o lotu uma o le lalolagi.” (O upu faasisipa e a matou.) Seʻi fesili ifo, ʻPe e talafeagai ona tapuaʻi ma tatalo atu i se isi, e ese mai i Lē na Faia mea ma Foaʻi maia le ola?’ (Salamo 36:9) Na fetalai Iesu: “O ē o loo i le tapuaʻiga moni, latou te tapuaʻi i le Tamā i le agaga ma le upu moni, auā o loo saʻilia e le Tamā tagata faapena e tapuaʻi atu iā te ia.” (Ioane 4:23) Ua faapea mai le Tusi Paia, o le finagalo o Lē na faia mea uma, ia “tapuaʻi atu tau lava o ia.”​—Teuteronome 4:24; 6:15.

Seʻi tagaʻi i le faaaʻoaʻoga a le aposetolo o Ioane. Ina ua ia maua vaaiga mataʻina o loo taʻua i le tusi o Faaaliga, na matuā maofa le aposetolo ma “faapaʻū ai lea i vae o le agelu [o lē na faaali atu nei mea iā te ia] e tapuaʻi iā te ia.” Ae o le ā le tala a le agelu? “Ia e faaeteete! Aua e te faia lenā mea! Ua na o aʻu o se uso a pologa iā te oe. . . . Ia tapuaʻi i le Atua.” (Faaaliga 22:8, 9) Ioe, ua toe faamamafa mai foʻi e le Tusi Paia, e na o Ieova le Atua e tatau ona tapuaʻi i ai.

E tusa ma manatu na taʻua muamua, e na o le Atua ua taʻua o le “Faafofoga tatalo.” (Salamo 65:2) E lē gata i lea, ona o Ia e ona le malosi uma lava, e na o ia e iai le pule, atamai, ma le mana e tali mai ai i a tatou talosaga mo so o se manaʻoga talafeagai. (Iopu 33:4) E oo lava foʻi ia Iesu, na ia fetalai, e iai mea e gata ai lona mafai. (Mataio 20:23; 24:36) E ui i lea, ua tuuina atu iā Iesu Keriso le tele o le pule, e aofia ai ma le matafaioi o le avea ma Faufautua mo tagata.

O se Faufautua e Malamalama

Ua faapea mai le Tusi Paia e uiga iā Iesu: “Ua mafai ai ona ia faaolaina atoatoa i latou e faalatalata atu i le Atua e ala iā te ia, auā o loo soifua pea o ia e ʻaiʻoi atu mo i latou.” (Eperu 7:25) O lona uiga, e avea Iesu ma Faufautua agaalofa mo ē e “faalatalata atu i le Atua e ala iā te ia.” E lē faapea e tatou te tatalo iā Iesu ona ia faaooina atu lea o a tatou talosaga i le Atua. Peitaʻi, o le uiga o lea faaupuga, e tatou te tatalo i le Atua i le suafa o Iesu, e faaalia ai lo tatou amanaʻia o le pule a Iesu. Aiseā ua fetaui lelei ai le avea o Iesu ma Faufautua?

O se tasi o māfuaaga, ona sa soifua Iesu o se tagata ma e malamalama lelei i mafatiaga o tagata. (Ioane 11:32-35) E lē gata i lea, na faaalia lona alofa i tagata i le faamālōlōina o ē mamaʻi, faatutūina o i latou mai i le oti, ma fesoasoani i ē na fia malamalama e uiga i le Atua. (Mataio 15:29, 30; Luka 9:11-17) Na ia faamagaloina foʻi agasala. (Luka 5:24) O lea e tatou te mautinoa ai, “ua iā i tatou le fesoasoani faatasi ma le Tamā,” o lē e amiotonu, o Iesu Keriso lea.​—1 Ioane 2:1.

E tatau ona tatou faataʻitaʻi i uiga alofa o Iesu. E moni e lē o i tatou o ni faufautua, ae e mafai ona tatou tatalo mo isi. O le alofa e uunaʻia ai i tatou e faia faapea. Na tusi Iakopo, ia “tatalo le tasi mo le isi,” ona “e malosi tele le tatalo faatauanau a le tagata amiotonu.”​—Iakopo 5:16.

Na aʻoaʻoina e Maria ma Telesia nei upu moni tāua e ala i le suʻesuʻeina o le Tusi Paia. Ua valaaulia foʻi oe e Molimau a Ieova e faia faapea. Na fetalai Iesu “o ē e tapuaʻi atu [i le Atua], e tatau ona tapuaʻi i le agaga ma le upu moni.”​—Ioane 4:24.

PO O E TAUMĀNATU EA I NISI TAIMI?

● E na o ai na fetalai Iesu e tatau ona tatou tatalo i ai?​—Mataio 6:9.

● O le ā le matafaioi a Iesu?​—Eperu 7:25.

● Pe e tatau ona tatou tatalo i le Atua mo le lelei o isi?​—Iakopo 5:16.