Ia Faamalosi Uunaʻiga o Lou Loto

“O lau filifiliga mautū e tuu le ulaula, o le vala lea e sili ona tāua o taumafaiga a tagata ulaula o ē ua taulau.”—Mai i le tusi “Stop Smoking Now!” (Tuu Nei Loa le Ulaula)

AFAI ua e manaʻo e tuu lau ulaula, e tatau ona iai se uunaʻiga malosi e tuu ai. E faapefea ona e maua lenā uunaʻiga? O se tasi o mea ia e manatua, e aogā le tuu o lau ulaula.

E faasao ai au tupe. A tasi le pepa sikaleti i le aso, e faitau afe talā e maʻimau ai i le tausaga. “Ou te leʻi iloaina muamua le tele o tupe ua faamaʻimau i le tapaa.”—Gyanu mai Nepale.

O le a sili ona fiafia lou olaga. “Na pei lava ua faafouina loʻu olaga, ina ua tuu laʻu ulaula.” (Regina mai i Aferika i Saute) E sili atu ona faaleleia lagona o tagata e pei o le tofo ma le sogisogi, pe a tuu le ulaula, ma ua sili atu foʻi ona malolosi ma aulelei.

E faaleleia ai foʻi lou soifua mālōlōina. “Pe a tuu le ulaula, e vave ona aogā i le soifua mālōlōina o alii ma tamaʻitaʻi, pe matutua pe laiti.”—Faalapotopotoga e Puipuia Faamaʻi i Amerika.

E fiafia ai. “Na tuu laʻu ulaula ona ou te leʻi manaʻo e pulea aʻu e le tapaa. Ou te manaʻo ou te pule lava aʻu iā i loʻu tino.”—Henning mai i Tenemaka.

E aogā i lou aiga ma au uō. “E faaleaga . . . e le ulaula . . . le soifua mālōlōina o ē pele iā te oe. Ua faaalia i suʻesuʻega, e faitau afe ua maliliu i tausaga taʻitasi ona o le kanesa o le māmā ma le maʻi fatu, talu ai ua aafia i le asu o tapaa.”—Sosaiete o le Kanesa i Amerika.

E fiafia ai Lē na faia oe. ‘Le ʻaupele e, seʻi o tatou faamamā iā i tatou mai i mea uma e faaleagaina ai le tino.’ (2 Korinito 7:1) “Ia tuuina atu o outou tino . . . e paia, ma e mālie i le Atua.”—Roma 12:1.

“O le taimi lava na ou iloa ai e lē fiafia le Atua i mea e leaga ai le tino, na tuu ai loa laʻu ulaula.”—Silivia mai i Sepania.

Peitaʻi, e lē lava le tau ina iai o se uunaʻiga. E tatou te manaʻomia foʻi le fesoasoani a isi, e aofia ai aiga ma uō. E faapefea ona latou fesoasoani mai?