Le Manatu o le Tusi Paia

Le Māfuaaga e Tatou te Lelei pe Leaga Ai

O LE ita ma le faamasaa toto, ua faatumulia ai faamaumauga o le talafaasolopito. Ae peitaʻi, o mea mataʻutia e tutupu ua masani ona tulaʻi mai ai ni gaoioiga agalelei a tagata e maofa ai, mo le lelei o isi. Aiseā e fasioti tagata ai ma le lē alofa se tasi, ae e iai uiga alofa faapelepele i le isi? Aiseā e aliaʻe ai amioga faamanu i tagata i nisi taimi?

Le Lē Lelei Atoatoa ma le Lotofuatiaifo

Ua taʻu saʻo mai i le Tusi Paia: “E leaga faanaunauga o le loto o le tagata mai lava i lona laʻitiiti.” (Kenese 8:21) O lea ua māfuli atu ai tamaiti e fai mea valea. (Faataoto 22:15) O i tatou uma e ono faanaunau atu e fai ni mea sesē mai lava i le taimi na tatou fananau mai ai. (Salamo 51:5) E manaʻomia ni taumafaiga pe a tatou mananaʻo e fai mea lelei, e pei o le taumafai e alo se vaa agaʻi i galu o loo fafati mai.

Ae peitaʻi, ua iā i tatou se lotofuatiaifo. O le lagona lenei na tatou fananau mai ma i tatou e iloa ai le mea saʻo ma le mea sesē, e taaʻina ai le toʻatele o i tatou e gaoioi e fai mea ia e manatu le toʻatele o mea e tonu. E oo lava iā i latou e leʻi aʻoaʻoina i amioga tatau, atonu e mātaulia i o latou uiga agalelei. (Roma 2:14, 15) Ae peitaʻi, e pei ona taʻua i luga, o lo tatou faanaunauga e fai le mea sesē e tulaʻi mai ai se feteenaʻiga i totonu o i tatou. O le ā se isi mea e taaʻina ai i tatou i la tatou tauiviga e faia le mea lelei ma le mea leaga?

Se Siʻomaga Leaga

E suia le lanu o se pili ina ia tutusa ma le siʻomaga o loo iai. E faapena foʻi ona avea se tagata ma sē e solitulafono, ona o tagata solitulafono o loo latou auaumea faatasi. Ua lapataʻi mai le Tusi Paia: “Aua e te mulimuli i le toʻatele ina ia faia mea leaga.” (Esoto 23:2) I le isi itu, o le faifaimea soo ma i latou e faamaoni ma tonu a latou amio, e uunaʻia ai le faia o mea lelei.—Faataoto 13:20.

Ae peitaʻi, e lē faapea ai ua tatou saogalemu mai mea leaga ona e tatou te lē o faifaimea faatasi ma i latou o faia na amioga. Ona o lo tatou tulaga lē lelei atoatoa, e ono iai pea ni manatu sesē i o tatou mafaufau, lea e faatalitali i se avanoa e aliaʻe ai. (Kenese 4:7) E lē gata i lea, e mafai ona oo mai le leaga i o tatou aiga e ala i le ʻaufaasalalau. O taaloga vitiō, polokalame i televise, faapea ma ata, e masani ona viiviia ai faiga sauā ma gaoioiga tauimasui. E oo lava i le matamata i tala o mea e tutupu i le lalolagi po o tala i vaifanua, e mafai ona tatou lē toe lagona ai le leaga o faiga o loo pagatia ai tagata, ma mea o loo matuā faanoanoa ai.

O le ā le māfuaaga o nei siʻomaga leaga? Ua tali mai le Tusi Paia: “O le lalolagi atoa o loo nofo toʻilalo i le pule a lē o loo leaga.” (1 Ioane 5:19) O “lē o loo leaga,” o Satani le Tiapolo, o loo faaalia i le Tusi Paia o sē e pepelo ma o se fasioti tagata. (Ioane 8:44) Ua ia faatuputeleina le leaga e ala i taaʻiga a lana lalolagi.

O nei vala uma ua taaʻina ai a tatou amioga ma gaoioiga e fai, ua faapea mai ai nisi e lē tuuaʻia i latou ona o a latou gaoioiga leaga. O le ā tonu le mea o loo tupu? E pei ona pulea e le foeuli o le taavale le itulagi e alu i ai, pe faatonutonuina foʻi e le foeuli o se vaa lona ālā vaa, e faapena ona pulea e le mafaufau le tino.

Po o le Lelei pe Leaga—O Lau Lea Filifiliga

O gaoioiga uma e fai ma le iloa, pe lelei pe leaga, e muamua ona mafaufau i ai. O le iai o  mafaufauga ma manatu lelei e selesele ai āuga lelei. E faapena foʻi pe a tuu ai pea lagona manatu faapito e tupu aʻe i le mafaufau, e tele ni gaoioiga leaga e ono tutupu mai ai. (Luka 6:43-45; Iakopo 1:14, 15) O lea la, e mafai ona faapea atu, e mafai ona lelei pe leaga le tagata e tusa ai ma lana lava filifiliga e fai.

O le mea e fiafia ai, ona ua faamatalaina i le Tusi Paia, e mafai ona aʻoaʻoina le faia o mea lelei. (Isaia 1:16, 17) O le alofa o le malosi lea i le faia o le mea lelei, ona “e lē agaleaga le alofa i lona tuaoi.” (Roma 13:10) Pe a tatou faatupuina le alofa mo tagata, e lē faigofie ona tatou mafaufau e fai se mea leaga i se tasi.

O le mea lenā na iloa e Ray, mai Pennsylvania, i le Iunaite Setete. Na aʻoaʻoina o ia mai lona laʻitiiti e fusu, ma na vave ona maua lona igoa valaau—o Tuʻi. Na tauivi foʻi o ia ma le vaivaiga o le itagofie. Ae o le faatatauina o taʻiala o le Tusi Paia, na faifai mālie ai ona faia suiga i lona olaga. Ae e leʻi faigofie. E iai taimi na ia lagona ai e pei o le tusitala o le Tusi Paia o Paulo: “Pe a ou loto atu e fai le mea lelei, ae ua iā te aʻu le leaga.” (Roma 7:21) O le taimi nei, ina ua mavae le tele o tausaga o taumafaiga maumauaʻi, ua mafai e Ray ona ‘faatoʻilaloina le leaga i le lelei.’—Roma 12:21.

Aiseā e aogā ai le “savali . . . i le ala o tagata lelei”? (Faataoto 2:20-22) Ona o le a oo ina manumalo le lelei i le leaga. Ua taʻua i le Tusi Paia: “E faaumatia o ē e fai mea leaga . . . Ua toeitiiti lava ona lē toe iai lea o le tagata amioleaga . . . A o ē e agamalu, e fai mo i latou le lalolagi, e matuā faafiafiaina foʻi i latou ona o le tele o le filemu.” (Salamo 37:9-11) O le a aveesea e le Atua mea uma e faapogaia le leaga. Maʻeu se lumanaʻi matagofie o le a iai mo i latou e taumafai ma le filigā e faia mea lelei!

PO E TAUMĀNATU EA I NISI TAIMI?

● O ai e tuuaʻia i a tatou gaoioiga e fai?—Iakopo 1:14.

● Pe mafai ona suia o tatou ala?—Isaia 1:16, 17.

● Po o le a faamutaina mea leaga?—Salamo 37:9, 10; Faataoto 2:20-22.

[Ata i le itulau 31]

E mafai ona lelei pe leaga le tagata e tusa ai ma lana filifiliga e fai