Le Manatu o le Tusi Paia

Pe Susunu Tagata Leaga i se Afi i Seoli?

O GERTRUDE, o se faifeʻau o le lotu Penetekoso, ma sa mautū lona talitonuga, e iai le afi i Seoli. O lona malamalama, e lē o se faamasinotonu pe a leai se nofoaga faapena. Na manatu o ia, e talafeagai ona iai se afi i Seoli e faasalaina ai tagata amioleaga. O le talitonuga maumaututū lenā o Gertrude. Na fai mai o ia, “Ou te lē fia tapuaʻi i le Atua pe afai e leai se afi i Seoli e susunu ai ē amioleaga.”

Pe moni e susunu tagata leaga i Seoli, e pei ona aʻoaʻoina e le tele o lotu? Afai e leai, o le ā la lo latou faasalaga?

Le Taimi Muamua na Faasala ai le Tagata Lē Faamaoni

E tusa ma le Tusi Paia, na lelei atoatoa le uluaʻi ulugalii na faia e le Atua. (Kenese 1:27; Teuteronome 32:4) Na ia tuu i laʻua i se faatoʻaga ua avea ma parataiso, faapea ma le avanoa e ola ai e faavavau. Peitaʻi, e iai se faasāsāga na avatu iā Atamu ma Eva. Na lapataʻi atu le Atua: ‘E mafai ona lua aai i laau uma o le faatoʻaga ma maoona ai. A o le laau e iloa ai le lelei ma le leaga, aua neʻi lua aai ai, auā o le aso e lua te aai ai, e lua te oti ai lava.’—Kenese 2:16, 17.

E faanoanoa ona na lē taulau o tatou uluaʻi mātua i lenā tofotofoga faigofie o le faamaoni ma le usiusitaʻi. O lea, na faasalaina i laʻua i le oti e Lē na Faia le tagata. ‘E lua te aai lua meaʻai ma le afu o o oulua mata seʻia lua toe foʻi atu i le eleele, auā na faia mai ai oulua. Auā o le efuefu oulua, e te lua toe foʻi atu lava i le efuefu.’—Kenese 3:19.

 Ana faapea e moni o le a susunuina Atamu ma Eva i Seoli, faamata e lē tatau ona lapataʻia muamua i laʻua e uiga i lenā faasalaga? O le mea moni e leʻi taʻua e le Atua lona faapuapuagatia o i laʻua i se afi pe a feoti. Ona e leai se vaega o i laʻua e ola pea pe a mavae le oti.

Ua silafia e Lē na faia i tatou mea uma e uiga i le ola ma le oti ona o ia o Lē foaʻi ola. Ua ia taʻu mai i lana Afioga e faapea, “o ē ua oti, latou te lē iloa se mea.” (Failauga 9:5) O le pogai lenā e lē o puapuagatia ai Atamu ma Eva i se afi i Seoli ina ua la feoti. Ae na toe foʻi atu i laʻua i le efuefu ma ua lē toe iai. Ua la ‘lē toe iloa se mea.’

Faamata e Tatou te Puapuagatia pe a Feoti?

Ua faapea mai le Tusi Paia i le Roma 5:12: Ua ‘oo mai le agasala i le lalolagi ona o le tagata e toʻatasi, o le oti foʻi ona o le agasala, ona oo mai ai lea o le oti i tagata uma.’ O lea la, pe e talafeagai ona manatu o loo puapuagatia tagata i le afi i Seoli ona o a latou agasala, a o Atamu lea na māfua ai ona oti tagata uma, sa na ona liu efuefu ina ua oti?—1 Korinito 15:22.

Ua aafia tagata uma i le tulafono lea na aafia ai Atamu. “Auā o le totogi o le agasala o le oti lea.” E lē gata i lea, a oti le tagata “ua magalo o ia mai i lana agasala.” (Roma 6:7, 23) Afai e oti tagata lelei faapea ma tagata leaga ma e leai se isi e susunuina i se afi i Seoli pe a oti, o le ā la le faasalaga e ao ona faasalaina ai e le Atua tagata amioleaga?

Le Faamasinogatonu a le Atua

Mai lava i le taimi na faia ai e le Atua le uluaʻi tagata ma faatonuina i laʻua e fanafanau ma tausia le lalolagi, o loo tumau pea lana fuafuaga mo tagata usiusitaʻi. (Kenese 1:28) E mautinoa e leʻi suia lana fuafuaga auā na ia folafola mai: “E fai lava le lalolagi mo ē e amiotonu, e nonofo ai pea i latou e oo i le faavavau.”—Salamo 37:29.

Mātau mai, o ē amiotonu o le a nonofo i lenei lalolagi. O le a ola i se olaga mālōlōina lelei atoatoa ma fiafia. O le a “taulau” lava le uluaʻi fuafuaga a le Atua, ia faatumuina le lalolagi i tagata amiotonu. O le a tupu lenei mea pe a suia e ia lenei faiga leaga o mea i se lalolagi fou.—Isaia 55:11; Tanielu 2:44; Faaaliga 21:4.

O le faitau piliona o tagata na maliliu ae leʻi iloa mea e faafinagaloina e le Atua, pe a latou toetutū mai, o le a maua aogā ma faatonuga i le auala e ola ai i le lalolagi fou a le Atua. (Isaia 11:9; Ioane 5:28, 29) Ae o lē e musu e ola e ōgatusa ma tulafono a le Atua, o le a faasalaina i le “oti faalua.” O lona uiga e lē toe ola mai i latou.—Faaaliga 21:8; Ieremia 51:57.

E manino mai, e lē faapuapuagatiaina e Ieova tagata i se afi i Seoli ona o ia o se Atua alofa. (1 Ioane 4:8) E lē faavavau foʻi ona faapalepale o ia i ē amioleaga. O lea ua faamautinoa mai ai e le Salamo 145:20: “E leoleoina e Ieova i latou uma o ē e alolofa iā te ia, ae e na te faaumatia o ē e amioleaga.” Pe lē o faaalia ai ea le alofa ma le faamasinotonu i lenei mea?

PO O E TAUMĀNATU EA I NISI TAIMI?

▪ O le ā e tupu pe a tatou feoti?—Kenese 3:19.

▪ O le ā le tulaga o ē ua maliliu?—Failauga 9:5.

▪ O le a faapefea ona faasala e le Atua ē amioleaga?—Salamo 145:20.

[Faamatalaga faaopoopo i le itulau 25]

“A o ē ua oti, latou te lē iloa se mea.”—Failauga 9:5

[Ē Ana le Ata i le itulau 24]

Ata: www.comstock.com