Ua Fesili Mai Talavou

Po Ou te Manaʻomia ni Uō e Sili Ona Lelei?

“Pe a ou ita, ou te manaʻomia se tasi e faasasao atu i ai. Pe a ou faanoanoa, ou te manaʻomia se tasi e faamalosiau mai. Pe a ou fiafia, ou te manaʻo e tufa atu i se tasi. Iā te aʻu, e tatau ona iai ni uō.”—Brittany.

UA FAAPEA mai, e manaʻomia e le fanau laiti ni ē e latou te taaalo, ae e manaʻomia e tagata matutua ni uō. O le ā le eseesega?

O se tasi e lua te taaalo, o se tasi lea e lua te toʻalua.

O le uō, o se tasi e tutusa mea e te lua fiafia i ai.

E lē gata i lea, o loo faapea mai le Tusi Paia, e “alofa le uō i aso uma lava; a e fanau le uso mo le aso vale.” (Faataoto 17:17) Atonu o loo faamatala mai i inei se ituaiga faauōoga e māfana atu nai lo o au uō tou te taaalo!

O mea moni: A o agaʻi ina avea oe ma tagata matua, e te manaʻomia ni uō, o ē

(1) E iai ni uiga tausaafia.

(2) E ola e tusa ma tapulaa aogā.

(3) E avea o se taaʻiga lelei iā te oe.

Fesili: E faapefea ona e iloa o le a faataunuu e au uō nei tapulaa? Seʻi o tatou iloiloina taʻitasi nei mea.

O Mea Moni i se Faigāuō #1—Uiga Tausaafia

O mea e tatau ona e iloa. E lē o i latou uma e faapea mai o uō, e iai ni uiga e avea ai o se uō moni. O loo faapea mai foʻi le Tusi Paia, “o le tagata ua fai ana uō, e iʻu ina tigāina ai o ia.” (Faataoto 18:24) Atonu e uiga ese lenā tulaga. Seʻi manatu foʻi: Pe na iai sau “uō” na faaaogā sesē lou agalelei? Ae ā se uō na feaveaʻia ni tala sesē ma le taufaaleaga e uiga iā te oe? Pe a tupu se mea faapena, o le a faigatā ona e toe talitonuina ni au uō. * Ia e  manatua, pe a faia ni au uō, e sili atu le tāua o ni uō e faamaoni, nai lo le tele o uō!

Le mea e ao ona e faia. Ia filifili ni au uō e iai ni uiga lelei e aogā ona e faataʻitaʻi i ai.

“E fiafia tagata uma i laʻu uō o Fiona. Ou te manaʻo foʻi ina ia fai e tagata ni tala lelei e uiga iā te aʻu. Ou te manaʻo ia taʻuleleia loʻu igoa e pei o ia. Iā te aʻu, o se uiga tausaafia lenā.”—Leveti, 17.

Faataʻitaʻi mea nei.

1. Faitau le Kalatia 5:22, 23.

2. Ia fesili ifo iā te oe, ‘Po o faaalia e aʻu uō uiga ia e faia aʻe ai “le fua o le agaga”?’

3. Ia tusi i lalo igoa o au uō mamae. I autafa o igoa taʻitasi, ia tusi i lalo uiga e sili ona faamatalaina ai lenā tagata.

Igoa Uiga

․․․․․ ․․․․․

․․․․․ ․․․․․

․․․․․ ․․․․․

Sina fautuaga: Pe afai e na o uiga lē lelei e faaata mai ai lau uō, atonu o le taimi lenei e toe suʻe ai ni au uō lelei!

O Mea Moni i se Faigāuō #2—Tapulaa Aogā

O mea e tatau ona e iloa. O le tele o lou popole mo ni uō, e foliga mai o le a e filifili ai ni uō sesē. Ua faapea mai le Tusi Paia: ‘O lē e uō ma ē valelea, e leaga ai lava o ia.’ (Faataoto 13:20) O le faaupuga o “ē valelea,” e lē o faasino atu i tagata e leai se mafaufau. Nai lo o lea, o loo faamatalaina ai i latou o ē e teena fautuaga aogā, ae mulimuli atu i le ala sesē o amioga leaga, o ituaiga uō na e tatau ona e ʻalofia!

Le mea e ao ona e faia. Nai lo le faauō atu i so o se tasi lava e taliaina oe, ia e faautauta. (Salamo 26:4) E leai, e lē o faapea e tatau ona e faailoga tagata. O lona uiga i inei, o le faautauta, o loo mafai ona e iloa atu le “eseese [o] lē amiotonu ma lē amio leaga; e ese lē ua auauna i le Atua, ma lē ua lē auauna iā te ia.”—Malaki 3:18.

E lē faailoga tagata le Atua, ae e faautauta o ia pe a oo i mataupu po o ai e na te taliaina e avea ma ‘malo i lona fale fetafaʻi.’ (Salamo 15:1-5) E mafai foʻi ona e faia faapea. O le ola e tusa ma tapulaa amiotonu, ma isi o ē o loo taumafai e faia faapea, e foliga mai o le a latou maua foʻi oe. O le iʻuga, o le a latou maua ai ni uō aupito sili ona lelei!

“Ou te faafetai i oʻu mātua, ona o la laʻua fesoasoani mai iā te aʻu ina ia ou maua ni uō, o ē matou te tupulaga o loo lelei le agaʻigaʻi i luma faaleagaga.”—Kilisi, 13.

 Faataʻitaʻi mea nei.

Tali fesili o loo sosoo mai:

▪ Pe a ou faatasi ma aʻu uō, po ou te popole neʻi o latou uunaʻia aʻu ou te faia se mea ou te iloa e sesē?

□ Ioe □ Leai

▪ Po ou te musu e faailoa atu aʻu uō i oʻu mātua, ina neʻi lē fiafia oʻu mātua iā te i latou?

□ Ioe □ Leai

Sina fautuaga: Afai o lau tali i fesili o i luga o le ioe, ia vaavaai la ni uō e maualuluga atu a latou tapulaa. Aiseā e lē amata ai ona saʻili iā i latou e matutua teisi atu iā te oe, o ē e faataatitia ni faaaʻoaʻoga lelei i le olaga faa-Kerisiano?

O Mea Moni i se Faigāuō #3—Taaʻiga Lelei

O mea e tatau ona e iloa. Ua faapea mai le Tusi Paia: “O aumea leaga, e leaga ai uiga lelei.” (1 Korinito 15:33, Today’s English Version) Na faapea mai se talavou e igoa iā Laura: “Sa talia aʻu e aʻu uō, pe afai ou te faia mea e latou te mananaʻo ou te faia. Sa ou lagonaina le leai o ni uō, ma na ou filifili ai loa e gaoioi e pei o i latou, ina ia latou talia ai aʻu.” Na iloa e Laura, pe a e lolo atu i a latou tapulaa, ua pei oe o maa o le mu, e latou te feaveaʻia solo oe i le mea e mananaʻo i ai. E tatau ona e faia mea e sili atu, nai lo le faia o oe faapena!

Le mea e ao ona e faia. Ia motusia fesootaʻiga ma i latou o ē e tausisi mai faapea, ia sui oe ia ōgatusa ma o latou olaga. Pe afai e te faia lenei laasaga, o le a lelei ai ou faalogona e uiga iā te oe lava, ma tatala ai le avanoa mo ni uō e sili ona lelei, o uō o le a taaʻina oe i se auala lelei.—Roma 12:2.

“O laʻu uō o Kilini, e faautauta ma o se tagata malamalama, ma o le iʻuga, ua avea o ia ma faalaeiauga sili mo aʻu.”—Nese, 21.

Faataʻitaʻi mea nei.

Ia fesili ifo iā te oe i fesili nei:

▪ Po ua suia le auala e fai ai oʻu lavalava, tautala, po o le auala e faafiafia ai aʻu uō?

□ Ioe □ Leai

▪ Po o ou auai i nofoaga e ono lē talafeagai mo amioga tatau, ona o loo ō i ai aʻu uō?

□ Ioe □ Leai

Sina fautuaga: Afai o lau tali i fesili o loo i luga o le ioe, ia alu i ou mātua po o se isi tagata matua mo se fautuaga. Pe afai o oe o se Molimau a Ieova, e mafai ona e alu i se toeaina Kerisiano, ma faailoa atu iā te ia e te manaʻomia se fesoasoani i le filifilia o ni uō e taaʻina ai oe e faia mea lelei.

[Faaopoopoga i lalo]

MEA E MAFAUFAU I AI

▪ O ā uiga e te faatāuaina i se uō, ma aiseā?

▪ O ā uiga e manaʻomia ona atiina aʻe ina ia avea ai oe o se uō lelei?

[Pusa/Ata i le itulau 17]

MEA UA FAI MAI AI AU UŌ

“Ina ua taumafai oʻu mātua e faamuta aʻu fesootaʻiga ma se vaega o aʻu uō, na ou faapena ifo, e na o le pau nei o aʻu uō ou te fia tafao ai. E lelei le fautuaga a oʻu mātua, ma ina ua ou malamalama, na ou iloa ai e tele ni uō lelei e mafai ona maua.”—Lole.

“O le auai i le faiva faa-Kerisiano, o le auala sili lea mo aʻu e faamasani ai i tagata o le faapotopotoga. O i inā e matou te miomiō faatasi ai ma tagata eseese, o ē e talavou ma ē e matutua. Ma o loo matou auaufaatasi ma tagata e alolofa iā Ieova.”—Leveti.

“Sa ou tatalo mo ni uō, ae na ou iloa ai e leai ma saʻu gaoioiga o loo fai ina ia maua ai ni uō. Na amata loa ona ou tausolomua e talanoa atu i isi i sauniga faa-Kerisiano. E leʻi umi, ae tele ni aʻu uō fou na maua. Ua seāseā ou toe lagona le tuua toʻatasi.”—Samu.

[Ata i le itulau 18]

FAATAʻITAʻI NEI FAUTUAGA

Ia talanoa i ou mātua e faatatau i faigāuō. Fesili atu iā i laʻua i ituaiga o uō na la maua ina o la pei o oe. Pe na la faanoanoa i le filifilia o ni a la uō? Afai o lea, aiseā? Fesili atu iā i laʻua, i le auala e mafai ona e ʻalofia ai nisi faafitauli na la faafesagaʻia.

Faailoa atu au uō i ou mātua. Pe afai e te musu, ia fesili ifo iā te oe, ‘Aiseā ou te musu ai?’ Pe e iai ni uiga o au uō e te iloa e lē fiafia i ai ou mātua

? Afai o lea, e manaʻomia la ona e filifili lelei au uō.

[Ata i le itulau 18]

AUALA E TOLU E TAUSIA AI NI UŌ LELEI

▪ Ia faalogologo lelei. Ia naunau i le tulaga o lau uō ma mea o loo popole ai.—Filipi 2:4.

▪ Ia e loto faamagalo. Aua e te faatalitalia se tulaga lelei atoatoa. “E sesē i tatou uma i mea e tele.”—Iakopo 3:2.

▪ Ia tuu avanoa iā i latou. E lē manaʻomia ona pipii atu iā i latou i taimi uma. O uō moni o le a iai i inā pe a e manaʻomia i latou.—Failauga 4:9, 10.

[Ata i le itulau 16]

Pe a e lolo atu i isi ina ia fiafia mai i latou iā te oe, ua pei oe o maa o le mu, o loo feaveaʻi solo i le mea e mananaʻo i ai