E Faapefea Ona Faatupu Lo‘u Fiafia i le Faitauina o le Tusi Paia?
Ua Fesili Mai Talavou
E Faapefea Ona Faatupu Loʻu Fiafia i le Faitauina o le Tusi Paia?
E faafia ona e faitauina le Tusi Paia? (Ia togi se tasi)
□ I aso taʻitasi
□ I vaiaso uma
□ O isi
Ia faauma fuaiupu lenei.
Pe a ou lē fiafia i le faitau Tusi Paia, e masani lava ona ou . . . (Ia togi pusa e fetaui)
□ Leai ni mea e fai
□ Le lē mautonu
□ Faigofie ona tosina ese
□ O isi
E TE lē naunau e faitau le Tusi Paia? Afai o le tulaga lenā, atonu e te ioe i le faamatalaga a Uili e 18 tausaga, lea na faapea mai, “E foliga mai e mafai ona oso aʻe le lē fiafia i le Tusi Paia.” Ae na ia toe faapea mai, “E faatoʻā tupu lava lenā mea pe a e lē iloa le auala e faitau ai.”
Aiseā e ao ai ona iloa faitau le Tusi Paia? O lea la, pe e te fia iloa atili le auala e
▪ faia ai faaiʻuga lelei?
▪ iai ni uō moni?
▪ feagai ai ma omiga?
E maua i le Tusi Paia ia ʻoa tautele, e pei o fautuaga atamai i nei mataupu ma isi foʻi. O lea la, o le mauaina o na ʻoa tautele, e manaʻomia ai ni taumafaiga. O taumafaiga e te faaaluina i inā, ua pei o loo e auai i le saʻilia o se ʻoa tautele: O le faigatā o na saʻiliʻiliga, o le manaia foʻi lea o le mea o le a maua!—Faataoto 2:1-6.
E faapefea ona e mauaina ʻoa o loo i le Tusi Paia? O le a fesoasoani le itulau lea e mafai ona e oti ese i le auala e ao ona e faitauina ai le Tusi Paia, ma i le isi ona itu, o le ā le faasologa o le a e faitauina ai. E lē gata i lea, ia faataʻitaʻi fautuaga o loo i le isi itu, e ono faaosofia ai lou naunau.
Pe a iai sau Initaneti, e mafai ona e faitauina le Tusi Paia (i le faa-Peretania) i le www.watchtower.org/e/bible
MEA E MAFAUFAU I AI
Ua faapea mai se manatu, e faalagolago mea e te maua mai se taumafaiga, i taumafaiga e te faia.
▪ E faapefea ona moni lenā manatu i le faitau Tusi Paia?
▪ O le ā se taimi e mafai ona e faaavanoaina mo lau faitauga Tusi Paia?
[Pusa i le itulau 25]
LE AUALA E FAITAU AI LE TUSI PAIA
A o leʻi amata lau faitau . . .
▪ Ia faamautinoa e leai ni mea e faalavelave ane ina ia mafai ai ona e uaʻi atu.
▪ Ia tatalo mo le malamalama.
A o e faitau . . .
▪ Ia faaaogā faafanua ma ata o tala o le Tusi Paia, ina ia mafai ai ona e faaataina tala o le Tusi Paia.
▪ Ia manatunatu i le faatulagaga, ma iloilo ona faamatalaga.
▪ Ia toe faitau faaopoopoga i lalo ma faamatalaga faasino.
▪ Ia fesili ifo iā te oe lava:
MEA MONI: O anafea na tupu ai lenei mea? O ai na tautala i nei upu? O ai na tusi atu i ai na upu?
UIGA: E faapefea ona ou faamatala atu lenei mea i se isi?
AOGĀ: Aiseā na faaaofia ai e Ieova le Atua lenei tala i lana Afioga? O le ā ua faaalia mai ai e faatatau i ona uiga po o le auala na te faia ai mea? O ā lesona e mafai ona ou faatatauina i loʻu olaga?
Pe a māeʻa ona e faitau . . .
▪ Ia toe faia nisi saʻiliʻiliga atili. Ia faaaogā meafaigaluega na lomia e Molimau a Ieova, e pei o le Insight on the Scriptures ma le “O Tusitusiga Paia Uma” e Moni Aʻiaʻi ma Aogā, pe a maua i la outou gagana.
▪ Ia toe tatalo. Ia taʻu atu iā Ieova mea na e aʻoaʻoina, ma lau fuafuaga i le auala e faatatau ai. Ia faafetai atu iā te ia mo lana Afioga, le Tusi Paia.
[Pusa/Ata i le itulau 26]
O LE Ā LE FAAGASOLOGA O LE A E FAITAU AI LE TUSI PAIA?
O manatu . . .
□ Ia faitau mai luma seʻia oo i tua.
□ Ia faitau faasolosolo, a lē i le faasologa na tusia ai tusi, po o faasologa o mea na tutupu.
□ I aso taʻitasi, ia faitau mai vaega eseese o le Tusi Paia.
Aso Gafua: O talafaasolopito e faaosofia ai le naunau (Kenese i le Eseta)
Aso Lua: O le soifuaga o Iesu ma ana aʻoaʻoga (Mataio e oo iā Ioane)
Aso Lulu: Uluaʻi faapotopotoga Kerisiano (Galuega)
Aso Tofi: O valoaga ma taʻiala mo amioga tatau (Isaia i le Malaki, Faaaliga)
Aso Faraile: O solo ma pese faagaee loto (Iopu, Salamo, Pese a Solomona)
Aso Toonaʻi: Taʻiala mo le olaga (Faataoto, Failauga)
Aso Sa: O tusi i faapotopotoga (Roma e oo iā Iuta)
O le ā lava le faasologa e te filifilia, ia faamautinoa o loo e mulimuli i mea o loo e faitauina! Ia tuu se ✔ i autafa o mataupu taʻitasi pe a māeʻa, po o le faia foʻi o se isi auala e faamaumau ai mataupu ua uma ona e faitauina.
Ia faapipii le itulau lenei i lau Tusi Paia!
[Pusa/Ata i le itulau 26]
IA OLA MEA UA E FAITAU I AI!
Saʻili ni auala e faaosofia ai le naunau i tala o loo e faitau ai. O se faataʻitaʻiga:
□ Ia faia se ata o le gafa o le aiga mai le lisi o igoa.
□ Ia tusia ni ata. O se faataʻitaʻiga, a o e faitau e faatatau i se tagata faamaoni, ia fesootaʻi atu uiga ma gaoioiga a lenā tagata, i faamanuiaga na ia mauaina.—Faataoto 28:20.
[Siata]
Uō a le Atua
↑ Usiusitai
↑ Faamaoni
↑ ↑
Aperaamo
□ Ia tusia ni ata e faamatala ai le tala.
□ Ia tusia se faasologa o ata, o ni ata e faamatala ai le faagasologa o mea na tutupu. Ia faamatala mea o loo tutupu i vaaiga taʻitasi.
□ Ia fau sina ata faataʻitaʻi o se mea, e pei o le vaa o Noa.—O se faataʻitaʻiga, tagaʻi i le Ala Mai! o Aperila-Iuni 2007, itulau e 22.
□ Faitau leotele ma uō po o tagata o lou aiga. O se fautuaga: Ia tofia se tagata e toʻatasi e faitaua le tala. E mafai ona fai e isi vaega a tagata o loo aofia ai.
□ Ia filifili se tala, ma ia faia e pei o se tala fou. Ia lipotia mai tala i ni auala eseese, ma faaaofia ai ma ni “faatalatalanoaga” ma tagata autū o le tala ma ē na molimau.
□ Ia vaai faalemafaufau i se tala na faia ai e se tagata se filifiliga lē atamai, ma mafaufau i se faaiʻuga ese! O se faataʻitaʻiga, seʻi mafaufau i le faafitia e Peteru o Iesu. (Mareko 14:66-72) Sa faapefea ona ono tali lelei atu Peteru i omiga?
□ Matamata pe faalogologo foʻi i tala faale-Tusi Paia ua māeʻa ona puʻeina.
□ Tusi sau lava tala. Ia faaaofia ai lesona e mafai ona aʻoaʻoina mai le tala.—Roma 15:4.
O SE MANATU: Ia faatino lenei tala ma se vaega toʻaitiiti o au uō.
[Pusa/Ata i le itulau 27]
AUALA E FAATUPU AI LE NAUNAU
▪ Ia faatū se sini! Ia tusi i lalo le aso e te manaʻo e amata ai lau faasologa o le faitauga Tusi Paia.
․․․․․
▪ Ia filifili se vaega o le Tusi Paia e te fiafia i ai. (Tagaʻi i le pusa “O le ā le Faasologa o le a E Faitau ai le Tusi Paia?”) Ona tusi lea i lalo o le vaega muamua o le Tusi Paia o le a e faitauina muamua.
․․․․․
▪ Ia amata i le faia i sina taimi pupuu. E sili atu pe a faaalu sina 15 minute e faitau ai le Tusi Paia, nai lo le leai o se taimi. Ia tusi i lalo po o le ā le tele o le taimi e mafai ona e faaavanoaina mo lenei faiga.
․․․․․
O se fautuaga: Ia iai sau lava Tusi Paia e faapitoa mo au suʻesuʻega. Ia tusia ai au faamaumauga. Ia faailogaina mau e sili ona aogā iā te oe.
[Pusa/Ata i le itulau 27]
O TALA A AU UŌ
“Ou te taumafai e faitau se vaega itiiti o le Tusi Paia ae ou te leʻi moe. O le faia faapea, e maua ai se mea matagofie ou te mafaufau i ai a o oʻu moe.”—Mega.
“Ou te uaʻi atu i se fuaiupu mo le 15 minute. Ou te faitauina uma faamatalaga i lalo, suʻe mau faasino, ma faia ni saʻiliʻiliga faaopoopo. O nisi taimi e lē uma ona ou iloiloina se fuaiupu i se pō, ae e tele aogā ou te maua mai le faia faapea!”—Kolio.
“Sa ou faitauina le Tusi Paia i le 10 masina. I le tele vave lenā, na ou iloa atu ai sootaga i vaega eseese o le Tusi Paia, lea na ou lē mātauina muamua.”—Ioane.
[Pusa i le itulau 27]
O OE E FILIFILIA!
□ Filifili se Mea na Tupu. E tele tala moni e faaosofia ai le naunau o loo i le Tusi Paia. Ia filifili se tala e te fiafia i ai, ma ia faitau mai i lona amataga seʻia oo i le iʻuga.
O se manatu: Mo ni manatu ina ia maua ai nisi aogā mai i le tala, tagaʻi i le itulau e 292 o le tusi Questions Young People Ask—Answers That Work, Volume 2, lomia e Molimau a Ieova.
□ Filifili se Evagelia. Faitau le Mataio (o le uluaʻi Evagelia na tusia), Mareko (ua iloga i le faamatalaina o le tele o tala mataʻina), Luka (lea e uaʻi faapitoa atu i tatalo ma fafine), po o Ioane (lea e itiiti lava mea o loo faamatala mai ai, ae o loo taʻua i isi Evagelia).
O se manatu: A o leʻi amata lau faitauga, ia iloilo puupuu faamatalaga e faatatau i le tusi o le Tusi Paia ma lē na tusia, ina ia faigofie ai ona e malamalama i le tulaga e mataʻina ai lenā Evagelia.
□ Filifili se Salamo. O se faaaʻoaʻoga:
Pe a e lagona le tuua toʻatasi ma le leai o ni uō, faitau le Salamo e 142.
Pe a e lotovaivai ona o ou vaivaiga, faitau le Salamo e 51.
Pe a e masalosalo i le aogā o tapulaa a le Atua, faitau le Salamo e 73.
O se manatu: Ia fai sau lisi o Salamo na e faitau ai, lea na matuā faalaeiauina ai oe.
[Pusa i le itulau 28]
IA SAʻILIʻILI ATILI
▪ Uaʻi atu i le siʻomaga. Ia iloilo le taimi, nofoaga, ma le siʻomaga i le mea o loo tutupu ai na mea.
Faaaʻoaʻoga: Faitau le Esekielu 14:14. Faamata e fia tausaga o Tanielu ina ua taʻua o ia e Ieova o se faaaʻoaʻoga lelei e ese mai iā Noa ma Iopu?
O se manatu: Na tusia le Esekielu mataupu e 14 i le lima tausaga mulimuli ane, ina ua ave faapagota o ia i Papelonia, a o talovou lava.
O le ʻoa natia: Pe na laʻitiiti tele ia Tanielu e mātauina ai e Ieova lona faamaoni? O ā faaiʻuga lelei na oo atu ai i le tele o faamanuiaga mo ia? (Tanielu 1:8-17) E faapefea ona fesoasoani le faaaʻoaʻoga a Tanielu iā te oe e faia ai faaiʻuga lelei?
▪ Iloilo faamatalaga. O nisi taimi e uigā se upu e tasi pe lua.
Faaaʻoaʻoga: Faatusatusa le Mataio 28:7 ma le Mareko 16:7. Aiseā na faaaofia ai e Mareko le manatu faapea, o le a faaali atu Iesu i ona soo “ma Peteru”?
O se manatu: E leʻi avea Mareko ma molimau o nei mea; e ui i lea, na maua mai ana faamatalaga iā Peteru.
O le ʻoa natia: Aiseā na lagona ai e Peteru le mautinoa, ina ua ia faalogo, o loo manaʻo Iesu e la te toe feiloaʻi? (Mareko 14:66-72) Na faapefea ona avea Iesu ma uō moni a Peteru? E faapefea ona e faaaʻoaʻo iā Iesu ma avea ai oe ma uō moni i isi?
▪ Ia toe faia nisi saʻiliʻiliga. Ia faaaogā lomiga faale-Tusi Paia mo faamalamalamaga.
Faaaʻoaʻoga: Faitau le Mataio 2:7-15. O le ā le taimi na asiasi atu ai le ʻausuʻesuʻe i fetu iā Iesu?
O se manatu: Tagaʻi i le Olomatamata o Ianuari 1, 2008, itulau e 31, lomia e Molimau a Ieova.
O le ʻoa natia: E faapefea ona tausia e Ieova ia manaʻoga faaletino o le aiga o Iesu, a o latou iai i Aikupito? E faapefea ona fesoasoani le faatuatua i le Atua iā te oe, e te fesagaʻia ai omiga?—Mataio 6:33, 34.