“Faafetai Atu Ona o lo Outou Alolofa Tele i Tagata”

TUSIA E LE TUSITALA O LE ALA MAI! I RUSIA

▪ I Chita, o se aai i sasaʻe o Siberia, sa faaaogā e se faapotopotoga a Molimau a Ieova se potu aʻoga mo a latou sauniga seʻia oo ina siitia i le latou Maota fou mo Sauniga. Na tusia e faatonu o le aʻoga se tusi faafetai i le faapotopotoga ona sa latou faamamā le potu aʻoga, faalelei mea na leaga, ma faaalia le agalelei ma le faaaloalo.

Ua faapea mai se vaega o le tusi: “Faafetai atu ona o lo outou alofa tele i tagata, ma ua manino lea tulaga i tagata uma e tou te feiloaʻi, faapea ma la outou talaʻiga ma galuega lelei ua faia mo tagata lautele. E lē mafaagaloina mea ua matou aʻoaʻoina mai iā te outou a o tatou galulue faatasi, ma ua faaalia ai o ē talitonu i le Atua o tagata e lelei, e faamaoni, e agalelei, ae sili ai o tagata e iai se sini faatasi ma le faatuatua ma se fuafuaga i le olaga.” Ua talisapaia e Molimau a Ieova faamatalaga faapea.

▪ Na valaaulia se sui o le lālā o Molimau a Ieova i Rusia i se sauniga faapitoa na faia e le pulega o le itumalo o St. Petersburg, e tusa ma le 3,500 maila (5,500 kilomita) le mamao i le itu i sisifo o Chita. Aiseā? Ona i taimi e liusuavai ai le kiona i tausaga uma, e fesoasoani tagata Molimau o lea vaipanoa e faamamā le otaota o loo paepae ai i le auala e lē mamao ma le lālā, e tusa ma le 40 maila (60 kilomita) le umi. Na faaalia e le alii o le malo lona talisapaia o galuega ua latou faia auā le lelei lautele, ma tuuina atu loa le tusi faamaonia i le sui o le lālā. Na patipati fiafia i latou uma na auai. O le mea e mālie ai, ona ina ua sesē le taʻu o le suafa o Ieova e le failauga o le sauniga, na vave ona faasaʻo o ia e ni tagata e lē o ni Molimau sa auai, ma ua faaalia ai e latou te masani i le suafa o le Atua, faapea ma i latou o loo tauaveina lea suafa.

O le pogai autū ua latou masani ai, ona i Rusia o loo faia ai e Molimau pe tusa e 150,000 le galuega talaʻi. O lo latou sini ia faaalia pea le “alofa tele i tagata” e ala i le faailoa atu o le feʻau faamāfanafana mai le Tusi Paia i ē uma e fia faalogo.—Mataio 22:39.

[Ata i le itulau 30]

Na tuuina atu i le lālā i Rusia se tusi faamaonia