O Ai e Filifili po o Lē Fea Tapuaʻiga e Moni?

NA FAAMANINO mai e Iesu e faapea, e lē talia e le Atua tapuaʻiga uma. Na ia taʻua “perofeta pepelo,” ma faatusaina i latou i se laau e fua mai i fua leaga ma e ‘tipiina i lalo ma lafo i le afi.’ Na ia fetalai foʻi: “E lē ulu atu i le malo o le lagi i latou uma o ē fai mai iā te aʻu, ‘Le Alii e, le Alii e.’”—Mataio 7:15-22.

O le mea moni, na faapea mai Iesu e tusa o tagata ua fai mai o loo mulimuli iā te ia: “Ona ou taʻutino atu lea iā i latou: Ou te leʻi iloa lava outou! Inā ō ese ia iā te aʻu, o outou o ē faia mea leaga.” (Mataio 7:23) Na faatatau foʻi e Iesu i taʻitaʻi lotu o ona aso fetalaiga a le Atua iā Isaraelu liliuese e faapea: “E lē aogā la latou tapuaʻiga o loo fai mai iā te aʻu, auā ua faavae a latou aʻoaʻoga i mataupu a tagata.”—Mareko 7:6, 7.

Ua manino mai la, e lē talia e le Atua ma lona Alo tapuaʻiga uma. O lea la, e lē moni tapuaʻiga uma. Po o lona uiga o lea manatu, e na o le tasi le tapuaʻiga o loo aʻoaʻoina le upu moni? Po o le mea, o loo faaaogā e le Atua nisi tapuaʻiga ae teena isi tapuaʻiga? Ae i le isi itu, faamata o talia e le Atua tapuaʻiga a tagata mai lotu eseese, ae teena nisi tagata, e tusa lava po o ā mea o aʻoaʻoina e a latou lotu?

Na faagaeeina le aposetolo o Paulo e tusi mai e faapea: “Uso e, ou te apoapoaʻi atu iā te outou i le suafa o lo tatou Alii o Iesu  Keriso, ia outou autasi i a outou upu, ma ia leai ni fevaevaeaʻiga iā te outou, ae ia autasi o outou manatu ma mafaufauga.” (1 Korinito 1:10) Ua faapena foʻi ona apoapoaʻi mai le Tusi Paia i Kerisiano ina ia “tutusa o outou mafaufauga, ma tutusa lo outou alofa, ma ia lotogatasi, ma ia manatunatu i le mea e tasi.”—Filipi 2:2.

Pe afai e iai le autasi, ona iai foʻi lea o le tapuaʻiga e tasi. O lea ua faapea mai ai le Tusi Paia, “e tasi le Alii, e tasi le faatuatuaga, e tasi le papatisoga.”—Efeso 4:4, 5.

Le Mea ua Iloa Mai le Tusi Paia

Ua matuā manino mai lava i le Tusi Paia, e tasi le tapuaʻiga moni. Pe a suʻesuʻe i ai, ona iloa ai lea e na o le tasi le tapuaʻiga na ala mai ai fesootaʻiga a le Atua i ona tagata. I le amataga o le talaaga o le tagata, na feutagaʻi le Atua ma augātamā, po o tane o ē na avea ma ona sui. E iai i latou e pei o Noa, Aperamo (Aperaamo), Isaako, ma Iakopo. —Kenese 8:18-20; 12:1-3; 26:1-4; 28:10-15.

Na oo ina avea i latou na tupuga mai iā Iakopo ma pologa i Aikupito. Na matuā sauāina i latou a o iai i inā, ae na faatuputeleina lo latou aofaʻi, ua oo i le faitau miliona. Na laveaʻiina i latou e le Atua mai le nofo pologa, ma faavavega ona faasaoina i le Sami Ulaula. Na avea i latou ma ona tagata, ma tuuina atu iā i latou tulafono e ala iā Mose, o lē na avea ma puluvaga. Ma na avea ai Isaraelu anamua ma nuu o le Atua.—Esoto 14:21-28; 19:1-6; 20:1-17.

Ae mātau mai, e leʻi taliaina e le Atua tapuaʻiga a nuu na tuaoi ma Isaraelu. Ae sa ia faasalaina ona tagata, pe a latou tuua ana tulafono ae tapuaʻi i na tapuaʻiga.—Levitiko 18:21-30; Teuteronome 18:9-12.

Ae faapefea tagata mai isi nuu o loo fia tapuaʻi i le Atua moni? E ao ona latou tuu muamua a latou tapuaʻiga sesē, ae tapuaʻi faatasi ma tagata Isaraelu iā Ieova le Atua. Na maua e le toʻatele o i latou le finagalo malie o le Atua ma avea ma ana auauna faamaoni. Na aofia ai tagata e iai Raava le fafine mai Kanana ma Ruta le Moapi, o Uria le tagata sa Hetī ma Epetemeleka le Aitiope; faapea ma nuu atoa, e iai le ʻau Kipeona. Na tatalo ma le loto atoa Solomona le tupu o Isaraelu, mo i latou uma e pei o nei tagata, o ē ua aufaatasi atu i tagata o le Atua i le tapuaʻiga moni. *—2 Nofoaiga a Tupu 6:32, 33.

Ina ua Mavae le Afio Mai o Iesu

Mulimuli ane, ina ua mavae le afio mai o Iesu i le lalolagi, na avea ana aʻoaʻoga ma faavae o le tapuaʻiga moni, ma na matuā faamanino mai ai le finagalo o le Atua. Na taʻua mulimuli ane i latou na iai i le tapuaʻiga moni, o “Kerisiano.” (Galuega 11:26) O lea la, so o se tagata Iutaia na fia maua le finagalo malie o le Atua, sa tatau lava ona tuua le tapuaʻiga na iai. E leʻi tuu e filifili ia po o lē fea tapuaʻiga e manaʻo ai, pe tapuaʻi foʻi na o ia. Ae e pei ona tatou iloa mai le Afioga a le Atua, o tagata i le tapuaʻiga moni, na autasi i le ‘faatuatuaga e tasi.’—Efeso 4:4, 5.

I aso nei, atonu e foliga mai e lē logolelei le manatu e faapea, e na o le tasi le tapuaʻiga o loo feutagaʻi ai le Atua ma tagata. Ae o le manatu lenā o loo i le Tusi Paia. Ua tele tagata i le taimi ua mavae, sa latou tapuaʻi i la latou lava auala, ae na oo ina talia le mea moni. Na latou aufaatasi atu i ē tapuaʻi moni iā Ieova, ma na mou atu ai ni o latou masalosaloga, ae maua faamanuiaga e tele faapea ma le olioli. O se faaaʻoaʻoga, o loo taʻua i le Tusi Paia se tamāloa Aitiope, o lē na ‘alu ma le olioli tele’ ina ua ia talia le faa-Kerisiano ma papatisoina.—Galuega 8:39.

E faapena foʻi faamanuiaga o le a maua e se tasi e talia le tapuaʻiga moni, ma ola e tusa ai ma le tapuaʻiga moni. Ae, talu ai ua tele le mau tapuaʻiga ua iai, e faapefea la ona iloa po o lē fea le tapuaʻiga e moni?

[Faaopoopoga i lalo]

[Ata i le itulau 5]

O le ā e tupu i le tapuaʻiga e fuaina mai fua leaga?