O se Fesili e Sili Ona Faigatā

“AISEĀ?” Ua masani ona fesili tagata i lea fesili i taimi o puapuaga ma tigā. E pei o taimi e agi ai se afā ma ua toʻatele e maliliu ai, faapea ma mea ua faaleagaina. E fesili foʻi i taimi e matuā faaleagaina ai lava se aai ona o se mafuiʻe, po ua tele le mataʻu ma faiga sauā talu ai osofaʻiga a ē faatupu faalavelave, po ua maliu se isi e pele ona o se faalavelave.

O se mea e faanoanoa ai ona ua lavevea fua ai nisi, ma aafia ai ma ē vaivai. I lenei vaitaimi, ua matuā faateleina mafatiaga, ma ua toʻatele i latou e alalaga i le Atua, “Aiseā?” O manatu nei ua faaalia e nisi:

▪“Le Atua e, aiseā ea ua e tuu mai ai lenei mala? O le ā sa matou sala ua māfua ai?” Na taʻua e tala fou mai Reuters e faapea, o le fesili na a se olomatua mai Initia, ina ua faaleagaina lo latou nuu e le galulolo o le sunami.

▪“A o fea o iai le Atua? Afai o ia e pule i mea uma, aiseā ua ia tuu ai lenei mea e tupu?” O fesili ia na lāgā e se nusipepa i Texas, i Amerika, ina ua tafana e se tagata se ʻaulotu a o fai le latou lotu, ma na lavevea ma maliliu ai nisi o le ʻaulotu.

▪“Aiseā ua lē taofia ai e le Atua le oti mai iā te ia?” O le fesili lea a se fafine ina ua maliu lana uō i le kanesa, ae tuua lona toʻalua ma le la fanau e toʻalima.

Ua lē na o nei tagata ua iai le manatu e faapea, o le Atua le pogai o mala. O se faataʻitaʻiga, na faaalia i se saʻiliʻiliga na faia, e tusa ma le ʻafa o tagata na fesiligia ua manatu e faapea, ua aumai e le Atua mala faalenatura, e iai afā. O le ā le māfuaaga o le manatu faapea o le toʻatele?

Le Fenuminumiaʻi o Lotu

E lē maua i taʻitaʻi lotu se tali faamalieloto, ae ua na o le faateteleina ai o le fenuminumiaʻi o tagata. E tolu ni faamatalaga e masani ona fai e taʻitaʻi lotu o le a tatou talanoaina.

Muamua lava, ua fai mai taʻitaʻi lotu ua aumai e le Atua mala e faasala ai ē faalogogatā. O se faataʻitaʻiga, i le Iunaite Setete, ina ua mavae atu le afā o Katrina lea na agi i New Orleans, i Louisiana, na fai mai nisi faifeʻau o le faasalaga lea mai le Atua, ona ua tele le piʻopiʻo, pelētupe, ma amioga leaga i le nuu. Sa aumaia e nisi ni faamaoniga mai le Tusi Paia, ma taʻu mai le faaumatiaina e le Atua o tagata amioleaga e ala i le lolo, po o le afi. Ae ua taʻusesēina le Tusi Paia e nei faamatalaga.—Tagaʻi i le pusa “Galuega a le Atua?”

Lona lua, ua fai mai nisi faifeʻau, o loo i le Atua māfuaaga e aumaia ai mala i tagata, ae aua tatou te suʻesuʻe fua pe aiseā. Ua lē o faamalieina le toʻatele i lea faamatalaga. Ua latou manatu e faapea, ‘Faamata e faia e se Atua alofa ni mea lē alofa e aunoa ma lona faamalamalama mai i ē o fia maua se faamāfanafanaga, ma o loo fia iloa pe “aiseā” ua tupu ai?’ Auā o loo fai mai le Tusi Paia: “O le Atua, o le alofa lava ia.”—1 Ioane 4:8.

Lona tolu, ua manatu nisi faifeʻau ailoga e lava le mana o le Atua e taofi ai, ma e lē  alofa foʻi. Ae ua lāgā ai nei fesili tāua. Pe moni e lē mafai e Lē na “faia mea uma,” e aofia ai ma lo tatou vateatea matagofie, ona taofia puapuaga i lenei lalolagi? (Faaaliga 4:11) Pe faapefea e Lē na tuuina le alofa i o tatou loto, ma o loo taʻua i lana Afioga o le alofa lava ia, ona lē ootia pe a tagaʻi i mafatiaga o tagata?—Kenese 1:27; 1 Ioane 4:8.

O le mea moni, e lē na o le pau ia o manatu o tagata e tusa o le māfuaaga ua tuu ai e le Atua puapuaga e oo mai, ma o se mea ua loa o fia malamalama i ai tagata o loo fia mauaina tali i ia fesili. I le mataupu o sosoo mai, o le a tatou talanoa i le aʻoaʻoga a le Tusi Paia e tusa o lenei mataupu tāua, ma ua fetaui ma o tatou taimi. O le a manino ai le mata o le vai i faamatalaga moni mai le Tusi Paia. Ua iai foʻi i le Tusi Paia se faamāfanafanaga tele mo i latou uma o loo mafatia.

[Pusa/Ata i le itulau 4]

Galuega a le Atua?

Po o faapea mai le Tusi Paia, o le Atua e māfua ai mala faalenatura? E leai! Auā o loo faamatalaina i le Tusi Paia, e iai le eseesega o faasalaga mai le Atua, ma mala faalenatura. Ua silafia e le Atua mea o i loto o tagata, ma e na te faaumatia na o ē e tatau i ai. (Kenese 18:23-32) E lē gata i lea, e aumai muamua e le Atua lapataʻiga ina ia sao ai i latou e amiotonu.

Peitaʻi ane, e lē iloa le oo mai o mala faalenatura, ma e aafia ai tagata uma. A fua i ai, ua faateteleina le leaga o mala ua oo mai ona ua faaleagaina e tagata le siʻosiʻomaga, ma ua faamautū i mea e ono tutupu ai mafuiʻe, lologa, faapea vaipanoa ua matuā faalētonu ai lava le tau.

[Ē Ana le Ata]

SENA VIDANAGAMA/AFP/Getty Images

[Ata i le itulau 4]

Ua tele le mau faamatalaga fenuminumiaʻi mai taʻitaʻi lotu