Ua Fesili Mai Talavou . . .

O le ā se Auala Ou te Fesoasoani ai i Ē Manaʻomia le Fesoasoani?

“Ou te faamoemoe a uma laʻu aʻoga oʻu te galue o se fai eletise. Ou te manaʻo e galue i le fausia o Maota mo Sauniga.”—Tristan, 14.

“E 20 tālā lea e foaʻi atu mo le masini lomitusi fou. O le tupe mai oʻu mātua, ae ou te manaʻo e foaʻi mo le galuega.”—Abby, 9.

E UI ina tele tagata ua fai mai e manatu faapito talavou i nei aso, ae e tele talavou ua ese mai ai, e pei o talavou o loo taʻua i luga. E tele teine ma tama talavou Molimau a Ieova ua faaaogā lo latou taimi, malosi, ma mea e maua, e auauna ai mo isi. (Salamo 110:3) O nisi nei o faataʻitaʻiga.

O Jira, e fitu ona tausaga, na maua sana meaalofa e $50 mai le tamā o lona tinā, a o leʻi leva talu ona maliu le tinā o lona tinā. O le ā na faaaogā i ai le tupe a Jira? Na ia tuu atoa lea tupe i le pusa o foaʻi a le faapotopotoga. Aiseā? Na fai Jira i lona tinā, “O loo tele aʻu meataalo, ae e tasi lava si loomatua ua maliu atu nei. Ou te iloa o se mea lea e manaʻo i ai ou te faia, ona e alofa tele iā Ieova.”

O Hana, e lima ona tausaga, e mai Amerika, ma e fiafia tele o ia i solofanua. Na fia faatau sana solofanua meataalo, e tusa ma le $75 le tau. Na taumafai ona mātua ia iloa e Hana sefe le tupe e ala i le ave i ai o tupe e tuu i lana mea teutupe. E leʻi umi ae lava le tupe a Hana mo le solofanua.

O le taimi tonu foʻi lea na afātia ai vaega o Amerika (Gulf Coast) ona o le afā o Katrina. Ona o lona alofa iā i latou na afāina na ia lafo ai lana tupe uma na teu, e silia ma le $100. Na tusi Hana i le ofisa ulu o Molimau a Ieova e faapea: “O loʻu alofa mo Ieova ma  loʻu fia fesoasoani atu, ua ou avatu ai lenei tupe.” Po o silafia mai e Ieova ia gaoioiga agalelei? Ua faapea mai le Tusi Paia: “Aua le galo iā te outou ona agalelei ma alolofa atu; auā o taulaga faapena e fiafia ai le Atua.”—Eperu 13:16.

Ina ua mavae afā e lua na lavea ai Florida i le 2004, na avatu se tusi a se teine talavou Amerika e igoa iā Tiffany, i le ofisa ulu o Molimau a Ieova. Fai mai lana tusi, “O aʻu, ma loʻu tuagane o Timoteo, e fia foaʻi atu le $110. E leʻi tele se mea o le matou fale na leaga, ae ua ma vāai ua leaga tele fale o isi. Na amata sefesefe a ma tupe e fesoasoani atu ai. O le $10 a Timoteo, na maua ina ua fesoasoani e tala puipui o se fale, ae o laʻu $100 lenā na teu.” E 13 tausaga o Tiffany, ae faatoʻā atoa le 7 o Timoteo! O le ā e tupu pe a tatou faamuamua manaʻoga o isi? Ua fai mai le Faataoto 11:25: “O ia foʻi lē faasūsū i nisi, e faasūsūina lava o ia.”

Na faalogo ni talavou Molimau i Amerika, mai le 4 i le 15 tausaga le matutua, o loo manaʻomia e le ʻauuso i Aferika se fale mo sauniga, ma na faia loa se latou galuega. “Na maua le $106.54 mai masi ma tamaʻi keke na matou faatauina atu. Na matou faamatala i tagata le mea e faaaogā i ai le tupe, auā fale e fai ai sauniga i Aferika ina ia aʻoaʻoina tagata i le Tusi Paia. E toʻatele na alolofa mai. E iva itula na  alu i a matou taumafaiga, ae na aogā lava, auā na fai mo Ieova!”

E Mafai Foʻi Ona E Fesoasoani

Ua iloa e talavou o loo taʻua i luga le moni o le faamatalaga a Iesu: “E sili le manuia o le na te foaʻi atu, i lo le na te talia mai.” (Galuega 20:35) E mafai foʻi ona e tofo i lea ituaiga o fiafia. E faapefea?

Po o e iloa ni uso o loo manaʻomia se fesoasoani? O se faataʻitaʻiga, atonu ua oo iā i latou se mala faalenatura. Ia e manatu ifo pe faamata e faapeʻī pe ana o oe lea ua leai sou fale ma mea totino, po ua maliu ai foʻi se tasi o lou aiga. Na tusi le aposetolo o Paulo e faapea, e tatau i Kerisiano ona ‘aua neʻi taʻitasi ma vaavaai i a latou lava mea, a ia taʻitasi ma vaavaai i mea a isi.’ (Filipi 2:4) E tusa pe mamao le mea e tupu ai le mala, atonu e mafai ona fai sau foaʻi e lagolago ai le galuega fesoasoani a Molimau a Ieova. *

O loo iai foʻi isi auala e fai ai fesoasoani mo ē o loo manaʻomia. O se faataʻitaʻiga, afai o oe o se Molimau a Ieova, ia tagaʻi i le tou faapotopotoga. Po o iai ni ē ua loa le soifua po o nisi foʻi o manaʻomia le fesoasoani? O iai ni a latou feʻau o manaʻomia ona faia? Na tusi Paulo i le ʻauuso i Roma: “Ia fefaapelepeleaʻi i le fealofani o uso; ia tausolomua ona āva o le tasi i le tasi.” (Roma 12:10) O ai lava o manaʻomia se fesoasoani, ia tausolomua ona e fesoasoani i ai. E oo lava i feʻau faatauvaa, ia e fiafia e fai. Ma ia manatua, e iai le sootaga o le auauna i isi ma le auauna i le Atua. Ua faapea mai le Tusi Paia: “O lē ua alofa i le tagata mativa, na te avatua ana mea iā Ieova; e tauia mai foʻi e ia ana mea na avatu iā te ia.”—Faataoto 19:17.

O le mea moni, o le auala sili e fesoasoani ai i isi, o le taʻu lea i ai o le mea ua e iloa mai le Afioga a le Atua. Na fetalai Iesu: “O le ola e faavavau foʻi lenei, ia latou iloa oe le Atua moni e toʻatasi, atoa ma lē ua e auina mai, o Iesu Keriso lea.” (Ioane 17:3) Ua sili ona manaʻomia e tagata i le taimi nei le upu moni e faasaoina ai ola, lea o loo i le Tusi Paia. O lea, ia fai pea lau vaega o le auai maelega i le galuega talaʻi, i le mautinoa, “e lē se mea faalēaogā lo outou tautigā”—1 Korinito 15:58.

Ua iai nisi mataupu i le faa-Peretania o le faasologa “Ua Fesili Mai Talavou . . . ” e maua i le Initaneti i le www.watchtower.org/ype

[Faaopoopoga i lalo]

MEA E MAFAUFAU I AI

▪ O iai se isi o manaʻomia se fesoasoani?

▪ O le ā se auala e te fesoasoani atu ai?

[Faamatalaga faaopoopo i le itulau 23]

“Aua le galo iā te outou ona agalelei ma alolofa atu; auā o taulaga faapena e fiafia ai le Atua.”—Eperu 13:16

[Pusa/Ata i le itulau 22, 23]

AISEĀ E LOTO FOAʻI AI?

“O loʻu vaai o faaaogā e oʻu mātua lo la taimi ma le malosi e auauna ai iā Ieova ma tuaoi, na ala ai ona ou manaʻo ia faia faapea. Na fai mai loʻu tamā: ‘E tusa pe itiiti le mea e te foaʻi mo Ieova, ae o le a tumau e faavavau. E soifua pea Ieova e faavavau, ma e faavavau o ia manatuaina. Ae e lē aogā lou ola mo oe lava. Auā a e oti, ua uma atu ai foʻi ma mea na e fai.’”—Kentaro, 24, Iapani.

“O le mea moni, ou te lē fia alu e fai ni feʻau a tagata matutua i aoauli o aso Toonaʻi. Pau lava le mea ou te manaʻo ai o le tafafao ma aʻu uō. Ae ina ua matou galulue faatasi ma tagata matutua, e ese le manaia. Na ou iloa ai, sa talavou foʻi i latou e pei o aʻu, ma na uunaʻia ai aʻu e fesoasoani iā i latou.”—Ioane, 27, Egelani.

“A o oʻu talavou, sa ou auai i le faamamāina o le Maota mo Sauniga ma isi galuega. Ou te fiafia foʻi e fai galuega mo isi i le faapotopotoga. E te vaaia lava lo latou fiafia pe a e fesoasoani i se isi. E pei o le aso lea na matou ō ai ma isi e faapipii le pepa puipui o le fale o se tuafafine matua. Oka le fiafia o si tuafafine! E te lagona lava lou fiafia pe a e vaaia le fiafia o isi ona o se mea na e fai.”​—Hermann, 23, Falani.

[Ata i le itulau 22]

E tele talavou ua foaʻi tupe e fesoasoani ai i tagata ua aafia i mala