Le Manatu o le Tusi Paia

Po o Iai le Atua i Mea Uma?

UA TALAFEAGAI ona ta‘u le Atua o Lē e lē gata mai lona malosi, ma e na te silafia mea uma. Ae o se isi faaupuga ua faaopoopo e nisi tagata ona o taumafaiga e faamatala atili le silisili o le Atua, e faapea o le Atua, o loo iai o ia i mea uma.

O loo manino lava e lagolagoina e a‘oa‘oga o le Tusi Paia manatu muamua e lua. (Kenese 17:1; Eperu 4:13; Faaaliga 11:17) Ioe, o le Atua, o Ia e ou le malosi uma, ma e leai fo‘i se mea e lilo iā te ia. Ae, o iai ea le Atua i mea uma? Po o iai moni lava se mea e afio ai o ia, o sona afioaga mau?

O Fea Tonu o Iai le Atua?

I le Tusi Paia, o loo iai mau ua ta‘u mai ai o “le lagi”, o ‘le mea o loo afio ai’ le Atua. (1 Tupu 8:39, 43, 49; 2 Nofoaiga a Tupu 6:33, 39) Ae o loo iai se mau ua faamatala mai ai le silisili ese o Ieova e faapea: “Pe moni ea e afio le Atua ma tagata i le lalolagi? Faauta, o le lagi ma le lagi o lagi e lē ofi ai oe.”—2 Nofoaiga a Tupu 6:18.

Ua faapea mai le Tusi Paia: “O le Atua o le agaga lava ia.” (Ioane 4:24) O lona uiga, e afio o ia i se nofoaga faaleagaga, e ese mai le vateatea lea o loo iloa atu e o tatou mata. O lea, a ta‘u i le Tusi Paia le “lagi” po o le afioaga o le Atua, o loo faatatau i le mamalu ma le maualuga o lona afioaga, pe a faatusa i le lalolagi lea o loo tatou mau ai. Ae, o se mea e sili ona tāua, ua tatou iloa ai mai le Tusi Paia, e ese le afioaga o le Atua mai le vateatea lea e mafai ona tatou vāai atu i ai, ma o loo iai sona afioaga patino.—Iopu 2:1-2.

E Iai Uiga o le Atua

Ina ua fai atu Iesu i ona soo: “E tele mea e nonofo ai i le maota o lo‘u Tamā; . . . ou te alu e sauni se mea e nonofo ai outou,” o loo faatatau lana fetalaiga i le afioaga o Ieova. (Ioane 14:2) O fea na alu i ai Iesu e sauni ai se nofoaga mo ona soo? Na “ulu atu Keriso . . . [i] le lagi lava, ina ia iloa ai nei o ia i luma o le Atua mo i tatou.” (Eperu 9:24) E lua ni mea tāua ua a‘oa‘o mai e lenei mau e faatatau iā Ieova le Atua. Muamua, o loo iai moni sona nofoaga mau, ma lona lua, o ia moni  lava o sē e iai sona tino agaga ma ona uiga, ae e lē o se malosiaga lē mailoa o loo iai i mea uma.

O le māfuaaga lenā na a‘oa‘o ai e Iesu ona soo ia latou tatalo faapea: “Lo matou Tamā e, o i le lagi,” ma na ia fetalai atu iā i latou, ia tatalo i le lagi iā Ieova, o Lē o loo i le nofoaga faaleagaga, ua ta‘ua o le “lagi.” (Mataio 6:9; 12:50) Ua talafeagai lea tulaga ma le mea na a‘oa‘oina ai tagata o le Atua mo le 1,500 tausaga, i le auala e ao ai ona tatalo. I tusitusiga mai le agaga o le Atua ua sili ona leva, o loo iai le tatalo lea: “Ia e silasila mai mai lou afioaga paia, mai le lagi, ma e faamanuia mai i lou nuu.”—Teuteronome 26:15.

E Oo le Agaga Paia o le Atua i Tagata ma Mea Uma

Ua faamatala mai pea e le Tusi Paia le Atua e faapea, e iai sona afioaga mau, ae o le agaga paia o le Atua, ua oo atu lea i mea uma. Na fesili Tavita: “Ou te alu ea ifea ai lou Agaga? Ou te sola ifea ai ou luma?” (Salamo 139:7) Ua fenuminumia‘i nisi e tusa ai o ia upu ma atonu ua latou manatu ai, o loo iai le Atua i mea uma. Ae a taga‘i lelei i le mataupu atoa o le mau lea faapea fo‘i ma isi mau, ua manino mai, e mafai ona oo atu le agaga paia o Ieova, po o lona malosi galue, mai Lona afioaga i so o se mea i le vateatea o loo tatou vaaia.

O le agaga paia o Ieova, po o lona aao, ua pei o le aao o se tamā o loo faamāfanafana ma lagolago mai i lana fanau. E mafai ona oo atu i so o se vaega o le vateatea, ma le nofoaga faaleagaga e lē o iloa atu e o tatou mata, e faatino le finagalo o Ieova. O lea, ua faapea mai ai le faisalamo: “Afai e faia mo a‘u apa‘au o le taeao, ma ou nofo i le tulu‘iga o le sami; e ta‘ita‘i mai iā te a‘u i lea lava mea e lou aao, e taofi mai fo‘i iā te a‘u lou aao taumatau.”—Salamo 139:9, 10.

E Mafai Ona Avea le Atua ma Au Uō

O le faamaulalo ma le alofa o Ieova le Atua, ua ia aumai ai faamatalaga e tusa o ia ma lona afioaga, i se auala e faigofie ona tatou malamalama i ai. I auala eseese, ua ‘faamaulaloina e ia ia ia silasila mai i le lagi atoa ma le lalolagi.’ (Salamo 113:6) Ae o le mea moni lava, e lē mafai ona tatou malamalama atoatoa i le Atua.

E lē lava ni upu e tatou te iloa e faamatala ai le silisili ese ma le matagofie o Ieova. O loo ta‘ua e le Tusi Paia le iai o se nofoaga mau o lona afioaga i le lagi, ae e lē mafai e tagata ona malamalama atoatoa i lona afioaga faaleagaga.—Salamo 139:6.

E ui i lea, ua avea le iai o sina malamalama e faatatau iā Ieova ma mea e tatou te maua ai se faamāfanafanaga, i le iloaina e lē o ia o se malosiaga e faigatā ona malamalama i ai, po o loo afio o ia i mea uma. Ae o ia moni o Sē e afio i lona afioaga mau, ua iloa o ia i ona uiga e pei o le alofa ma le faapelepele. O lea poto ua mafai ai e tagata uma ona maua se avanoa e sili ona matagofie, o le faia lea o se faiga uō māfana i le olaga atoa ma le Silisili ese, o Lē e ou le Malosi uma lava i le vateatea.—Iakopo 4:8.