E Tatou te Mana‘omia Uma ni Uō

“O se uō, o se tasi e faigofie ona e talanoa i ai i so o se mea, ma i so o se taimi.”—Iaeli, mai Falani

“E malamalama lau uō pe a e mafatia, ma e na te lagona lou tigā.”—Gaëlle, mai Falani

UA FAAPEA mai le Tusi Paia: “A o i ai le tagata alofa e sili ona pipii mai i lo le uso.” (Faataoto 18:24) O loo iai pea lea uiga i tagata, e ui ua tusa nei ma le 3,000 tausaga talu ona tusia ia upu. O loo tāua pea faigāuō i le tagata e pei ona tāua o le vai ma le taumafa iā te ia. Ae ua faigatā i le to‘atele ona faamalie lea tulaga. E to‘atele i latou o loo iai le lagona o le tuua to‘atasi. Ua ta‘ua e Carin Rubenstein ma Phillip Shaver i le la tusi e tusa o le sa‘ilia o ni uō e faapea: “Ua manino mai le māfuaaga ua ala ai ona faapea.” Ua la ta‘ua tulaga e pei o le “fesuisuia‘i o mea e nonofo ai tagata, . . . o tagata i aai tetelē e lē amana‘ia isi, faapea ma le tele o le solitulafono, ma ua avea TV ma vitiō ma tulaga ua sui ai le fia talatalanoa faamasani o tagata.” (In Search of Intimacy)

Ua faapea fo‘i ona lē lava taimi, ma lo tatou malosi ona o le olaga i nei aso. Ua tusia e Letty Pogrebin i lana tusi Among Friends: “Ua sili ona to‘atele tagata i le vaiaso e feiloa‘i i ai se tagata e mau i aai i le taimi lenei, na i lo tagata e feiloa‘i i ai se tasi na ola i le senituri lona 17, i se tausaga po o lona olaga atoa.” Talu ai e faitau afe i latou e tatou te fetaui i ai, ua faigatā ai lava ona maua se taimi e faamasani ai i isi ma maua ai ni uō māfana.

E oo lava fo‘i i vaipanoa e le‘i leva atu nei ona tau lē pisi, ua suia ai fo‘i tulaga o le olaga. Fai mai Ula, e nofo i Europa i Sasa‘e: “Sa māfana la matou masaniga ma a matou uō. Ae i le taimi nei o le to‘atele o tagata ua pisi i a latou galuega ma mea e fiafia i ai. Ua matou lagona ai e pei o le a muta la matou faigāuō.” Ua tauau ina faalētāua a tatou uō ona o le tele o mea e fai o lenei olaga.

Ae o loo tatou matuā mana‘omia pea ni uō. Aemaise lava i talavou. Fai mai Iaeli lea na ta‘ua muamua, “i le taimi o lou talavou, o loo e mana‘omia ai lava ia fiafia mai isi iā te oe, ma ia e māfana i se tasi.” Tatou te manana‘o uma lava i ni uō e fiafia ma māfana i ai. E ui ina tele ni lu‘i, ae e tele fo‘i mea e mafai ona tatou fai ina ia maua ai ni uō moni. O le a talanoaina lea tulaga i le mataupu o loo sosoo mai.