Na Ou Talia le Silafaga a le Atua i le Toto

O le Tala a se Fomaʻi

O LE taimi lea o loo oʻu faamatalaina le faaiʻuga o ni saʻiliʻiliga o le māfuaaga o le oti o se maʻi i se vaega o ni fomaʻi i le potu aʻoga i le falemaʻi. O le maʻi na maliu sa iai se tuma lea na aafia ai i le kanesa, ma na ou faapea atu i fomaʻi: “E tusa ai ma saʻiliʻiliga, ua mafai ona faapea atu o le pogai moni o le maliu o le maʻi lea, ona o le faaleagaina o sela mūmū o lona toto (hemolysis) atoa ai ma le lē toe galulue o ona fatugaʻo. E māfua lea tulaga ona o le tele naʻuā o le toto na tuiina i ai.”

Na tulaʻi se tasi polofesa ma alaga mai ma lona ita tele, “O lona uiga o lau faamatalaga, e sesē le toto lea na matou tuiina iā te ia?” Na ou tali atu, “Leai, e lē o le uiga lenā o laʻu faamatalaga.” Na ou faaali atu ni ata (slides) o ni nai vaega o le fatugaʻo o le tagata ua maliu ma faapea atu, “O loo faaali mai e ata nei le faaleagaina o le tele o sela mūmū o le toto i le fatugaʻo, ma ua iloa mai ai o le māfuaaga lea o le lē toe galulue o fatugaʻo.” * Na ou lagonaina le tulaga lē fiafia tele ua iai fomaʻi ma na oo aʻe le popole tele iā te aʻu. Sa iā te aʻu le lagona ia aua lava neʻi oʻu solomuli i loʻu manatu e ui lava o aʻu o se fomaʻi talavou ae o ia o se polofesa.

I le taimi na tupu ai le mea lea, e leʻi avea aʻu ma Molimau a Ieova. Na ou fanau i le 1943 i Sendai, o se aai i le vaega i mātū o Iapani. Sa ou filifili e aʻoga faafomaʻi ona o loʻu tamā o se tasi na suʻesuʻe i maʻi o le tino, ma o ia foʻi o se fomaʻi o le mafaufau. O le tausaga lona lua o laʻu aʻoga faafomaʻi na ma faaipoipo ai ma se tamaʻitaʻi e suafa iā Masuko.

Auai i le Vaega e Saʻiliʻili ai i Maʻi

Na faigaluega Masuko e tausi i maʻua a o tau faauma laʻu aʻoga. Sa matuā ofoofogia iā te aʻu le mataupu e faatatau i vailaau ma le soifua mālōlōina. Na ou maofa tele ona o le matagofie o le auala na foafoaina ai o tatou tino. Ae ui lava i  lea, ou te leʻi taitai ona manatunatu e faatatau i le soifua moni o Sē na Foafoaina le tagata. Sa iā te aʻu le manatu e faapea o aʻu saʻiliʻiliga faafomaʻi, o le a ou maua ai se lumanaʻi manuia. O lea la, ina ua pasi laʻu faafomaʻi, na ou filifili e faaauau aʻu saʻiliʻiliga i mataupu tau vailaau ma le soifua mālōlōina e ala i le suʻesuʻe i mataupu e tusa ai o le uiga, pogai, ma āuga o faamaʻi (pathology).

I le vaitaimi a o faia aʻu saʻiliʻiliga i tino o tagata ua maliliu ona o le kanesa, na amata ai ona iai se faalētonu o loʻu manatu e tusa ai ma le aogā o tuigā toto. O maʻi ua matuā afāina lava i le kanesa, e mafai ona lē lava lo latou toto ona o le tele o lo latou toto ua alu ese mai le tino. Talu ai o le faaaogāina o vailaau e togafitia ai le kanesa e atili ai le lē lava o le toto o le maʻi, ua masani ai la fomaʻi i le tuiina o le toto i maʻi. Peitaʻi ane na oo mai le manatu iā te aʻu o le faia faapea atonu ua atili sosolo ai le kanesa. Ae i aso nei, ua iloa ai faapea o le tuiina o le toto, ua māfua ai le lē galue lelei o faiga tau puipuiga o le tino o le tagata, lea e ono telē ai se avanoa o le toe tupu o le kanesa ae ua faaitiitia ai le avanoa e soifua ai pea le tagata maʻi. *

O le tausaga 1975 lea na tupu ai le mea lea na ou taʻua i le amataga. O le maʻi lea sa talanoaina, o le polofesa na ia vaaia ma o ia foʻi o se fomaʻi faapitoa i le toto. E lētioa a ita tele o ia i loʻu fai atu na māfua le maliu o le maʻi ona o le tuiina i ai o le toto! Ae sa faaauau pea laʻu talanoaga ma na oo lava ina toʻa mai o ia.

Leai se Maʻi po o se Oti

E tusa o le vaitaimi foʻi lea na asia ai laʻu avā e se tamaʻitaʻi matua, o se tasi o Molimau a Ieova. Sa ia taʻua le suafa o “Ieova” i lana talanoaga ma na fesili i ai laʻu avā po o le ā le uiga o lea upu. Na tali le Molimau, “O Ieova, o le suafa lea o le Atua moni.” Talu mai lava o laʻitiiiti Masuko, sa ia faitauina le Tusi Paia, ae o le Tusi Paia lea na ia faitauina, ua suia ai le suafa o le Atua i le “ALII.” Ae o lea la ua ia iloa nei, o le Atua, o loo soifua moni ma e iai lona suafa!

Na amata loa ona suʻesuʻeina e Masuko le Tusi Paia faatasi ma le Molimau matua. Ina ua ou mānava atu mai le falemaʻi e tusa ma le 1 i le vaveao, na faamatala mai ma le fiafia e laʻu avā e faapea, “O loo taʻua i le Tusi Paia le aveesea o le maʻi ma le oti!” Sa ou tali atu, “Matuaʻi manaia tele lenā tulaga!” Na ia fai mai atili, “Talu ai o lea ua lata mai le lalolagi fou, ou te lē manaʻo e te faamaʻimau i lou taimi.” Sa ou manatu o le uiga o lana tala, ia tuu loa laʻu faafomaʻi, ma na oso ifo ai loʻu ita ma tupu ai ma se faalētonu i lo ma va.

Ae e leʻi gata ai i inā taumafaiga a laʻu avā. Sa ia tatalo ma saʻili ni mau e talafeagai, ma faaali mai iā te aʻu. Na sili ona pāʻia loʻu loto i upu mai le Failauga 2:22, 23: “Auā se ā se mea ua maua e le tagata i ana galuega uma, ma le taumafai o lona loto, ua tigā ai o ia i lalo o le lā? . . . e lē mapu foʻi lona loto i le pō. O le mea faatauvaa foʻi lea.” Sa fetaui le mau lea iā te aʻu, ona ua faaalu uma loʻu ola i le suʻesuʻeina o maʻi ma le soifua mālōlōina, ae e leai se faamalieina moni o maua ai.

I se tasi Aso Sa i le taeao, iā Iulai 1975, ina ua alu laʻu avā i le Maota o le Malo o Molimau a Ieova, na faafuaseʻi lava ona ou filifili ou te alu foʻi i ai. Sa matuā faateʻia lava laʻu avā i le vaai mai iā te aʻu, ma na faafeiloaʻi māfana mai Molimau iā te aʻu. Na amata mai ai i inā ona ou auai i sauniga i Aso Sa  taʻitasi. Na faatoʻā fai lava se suʻesuʻega i le Tusi Paia ma se Molimau ina ua mavae le masina. E tolu masina talu ona asia laʻu avā e Molimau a Ieova ae papatisoina loa o ia.

Talia le Silafaga a le Atua i le Toto

E leʻi umi ae ou aʻoaʻoina e faapea o loo faatonuina e le Tusi Paia Kerisiano ina ‘ia faamamao ma le toto.’ (Galuega 15:28, 29; Kenese 9:4) Talu ai o lea ua ou lē mautonu e tusa o le aogā o le toto, sa faigofie iā te aʻu le taliaina le silafaga a le Atua e tusa ai ma lea tulaga. * Na ou manatu, ‘Afai e iai Sē na Foafoaina le tagata ma o le mea lenā o loo ia fetalai mai ai, o lona uiga la e saʻo.’

Na ou aʻoaʻoina foʻi e faapea, o le pogai o le maʻi ma le oti, o le agasala tuufaasolo mai iā Atamu. (Roma 5:12) O le vaitaimi lava foʻi lea o loo faia ai aʻu suʻesuʻega e faatatau i alātoto pe a oo ina malō. A o faagasolo ina tatou matutua, e faasolo ina malō ma pūiti o tatou alātoto, ma e māfua mai ai maʻi e pei o le maʻi fatu, o maʻi o le faiʻai ma alātoto, ma maʻi o le fatugaʻo. Ua talafeagai le manatu e faapea, o nei maʻi uma e māfua mai lea i lo tatou tulaga lē lelei atoatoa ua tuufaasolo mai. O le taimi la lenā na amata mai ai ona lē toe tutusa loʻu naunau i saʻiliʻiliga faafomaʻi. Ua na o Ieova le Atua e na te mafai ona aveesea maʻi ma le oti!

Iā Mati 1976, e tusa o le fitu o masina talu ona amata laʻu suʻesuʻega o le Tusi Paia, na faamuta ai loa aʻu saʻiliʻiliga i le falemaʻi lea sa ou iai. O lea falemaʻi o se iunivesite foʻi. Sa iā te aʻu le popolega e faapea ailoga e toe mafai ona ou faigaluega o se fomaʻi, ae na maua laʻu galuega i se isi falemaʻi. Na ou papatiso iā Me 1976, ma na ou filifili e faapea o le auala sili e faaaogā ai loʻu olaga o le avea lea ma tagata talaʻi faataimi atoa, po o se paeonia, lea la na amata loa ona ou faia iā Iulai 1977.

Molimau e Tusa o le Silafaga a le Atua i le Toto

Iā Novema 1979, na ma siitia atu ai ma Masuko i se faapotopotoga i le itumalo o Chiba i le mea o loo manaʻomia tele ai ni tagata talaʻi. Sa ou maua se falemaʻi sa mafai ona ou galue ai faavaitaimi. I loʻu aso muamua lava i le galuega na siʻo ai aʻu e ni fomaʻi tipitipi. Na latou tuʻiina aʻu i fesili faapea: “I le avea ai ma se tasi o Molimau a Ieova, o le ā lau mea e fai pe afai e aumai se maʻi o loo manaʻomia se toto?”

Sa ou faamatala atu ma le faaaloalo e faapea ou te mulimuli i le mea ua fai mai ai le Tusi Paia e tusa o le toto. Na ou faamatalaina o loo iai ni vailaau e sui ai le toto, ma ou te faia le mea sili e mafai e fesoasoani ai i aʻu maʻi. Pe tusa o le itula o fai la matou talanoaga ona faapea mai loa lea o le fomaʻi pule i le fale tipitipi: “Ua ou malamalama. Ae afai e aumai se maʻi ua tele lona toto ua alu, tuu mai e matou te taulimaina.” Sa iloa uma e tagata le faigatā o le fomaʻi pule, ae ina ua māeʻa la matou felafolafoaʻiga lenā, na faasolo ina iai se ma faiā lelei ma e na te faaalia pea le āva mo oʻu talitonuga.

Tofotofoina le Faaaloalo mo le Toto

A o ma galulue ai i Chiba, o le vaitaimi foʻi lea o loo faagasolo le fauina o se ofisa ulu o Molimau a Ieova i Iapani i Ebina. E faatasi i le vaiaso ona ma malaga atu ma laʻu avā i inā e vaai le soifua mālōlōina o le ʻautauofo Molimau o loo fausia lenā nofoaga e taʻua o Peteli. Na mavae ni nai masina ae valaaulia loa i maʻua e galulue i le Peteli i Ebina. O lea, e oo ane iā Mati 1981, ua ma nonofo ai i le nofoaga lea sa aumau ai le ʻautauofo e 500, lea sa galulue i inā mo sina taimi. I taeao, sa ou fesoasoani ai e faamamā faletaʻele ma faleʻese i le mea e nonofo ai le ʻaufaufale, ae a oo i le aoauli sa ou siakiina le soifua mālōlōina o le ʻauuso.

O se tasi o aʻu maʻi, o se misionare lea e igoa iā Ilma Iszlaub, na malaga mai i Ausetalia i le 1949. Na maʻi o ia i le kanesa o le toto, ma na fai i ai fomaʻi e na o ni nai masina lava o loo totoe e ola ai. Na teena e Ilma le tuiina o le toto e faaumiumi ai  lona ola, ae filifili e nofo i Peteli mo le taimi o loo totoe o lona olaga. I lenā vaitaimi, e leʻi maua ai ni vailaau e faatupuina ai sela mūmū o le toto (e pei o le erythropoietin). O lea la, sa iai taimi e matuaʻi maulalo ai lava, e oo i le 3 po o le 4 kalama le vaega o sela mūmū (hemoglobin) o lona toto! (O le tulaga masani, o le 12 i le 15 kalama.) Ae sa ou taumafai e fesoasoani iā te ia. Sa faaalia pea e Ilma le maumaututū o lona faatuatua malosi i le Afioga a le Atua seʻia oo i lona maliu iā Ianuari 1988, pe tusa o le fitu tausaga mulimuli ane talu le taimi lea na fai ane ai fomaʻi o le a oti ai!

I le faagasologa o tausaga, ua iai ni tagata tauofo o le ofisa o le lālā o Molimau a Ieova i Iapani sa faia ni o latou taotoga. O se tulaga e faamālō ai i fomaʻi o loo galulue i falemaʻi e lata ane i le lālā ona o la latou lagolagosua, ma na latou faia ni taotoga e aunoa ma le toto. E masani lava ona valaaulia aʻu ou te auai atu i le potu tipitipi e matamata i le taotoga ma i nisi taimi, ua mafai foʻi ona ou fesoasoani i le faia o le taotoga. E iā te aʻu le agaga faafetai i fomaʻi ua faaalia le faaaloalo mo talitonuga o Molimau a Ieova e tusa ai o le toto. Ua tele avanoa ua mafai ona ou faailoa atu ai iā i latou oʻu talitonuga ona o le galulue faatasi ma i latou. E leʻi leva lava talu ai nei ona avea se tasi o fomaʻi ma Molimau papatisoina.

O se mea e mataʻina, talu ai taumafaiga a fomaʻi e togafitia Molimau a Ieova e aunoa ma le toto, ua māfua ai ona maua ni aogā tāua i le tulaga tau togafitiga o maʻi. Ua maua mai i taotoga e aunoa ma se toto se faamaoniga o aogā o le ʻalofia o le tuiina o le toto. Ua faaalia mai i saʻiliʻiliga le sili atu ona vave malolosi ai o maʻi, faapea ai ma le faaitiitia o faafitauli pe a māeʻa le taotoga.

Faaauau Pea Ona Aʻoaʻo Mai le Fomaʻi Sili

Ou te taumafai lava ina ia ou iloa, po o le ā le tulaga ua oo i ai le malamalamaga e faatatau i vailaau ma togafitiga. Ae, ou te faaauau foʻi ona ou aʻoaʻo mai iā Ieova, le Fomaʻi sili. E lē na o le tino i fafo e na te silafiaina ae, e na te silafia foʻi le tagata atoa. (1 Samuelu 16:7) I le avea ai ma fomaʻi, ou te taumafai e vaai i vala uma e tusa ai ma le tagata, ae e lē na o lona maʻi. O lea la e sili atu ai ona lelei le tausiga faafomaʻi ou te tuuina atu iā i latou.

O loo oʻu galue pea i Peteli, faapea ma le fesoasoani i isi ina ia iloa Ieova, e aofia ai ma lana silafaga e tusa ai o le toto. Ua fai pea lea tulaga ma se mea e sili ona ou fiafia i ai. Ou te tatalo ina ia faaumaina i se taimi lata mai e le Fomaʻi Sili o Ieova le Atua, ia maʻi uma ma le oti.—Faamatalaina e Yasushi Aizawa.

[Faaopoopoga i lalo]

[Faamatalaga faaopoopo i le itulau 26]

“Na ou faamatalaina o loo iai ni vailaau e sui ai le toto, ma ou te faia le mea sili e mafai e fesoasoani ai i aʻu maʻi”

[Faamatalaga faaopoopo i le itulau 27]

“Ua maua mai i taotoga e aunoa ma se toto se faamaoniga o aogā o le ʻalofia o le tuiina o le toto”

[Ata i le itulau 27]

Ata i luga: Faia se lauga mai le Tusi Paia

Taumatau: O maʻua ma laʻu avā o Masuko i aso nei