E Tatau Ona Tumau Noataga o le Faaipoipoga

E TUSA ai ma iʻuga o le tele o ata tifaga, ua foliga mai ai o le faaipoipoga o se mea e manaia tele e taulaʻi atu i ai. E ui i le tele o mea e tutupu e masani lava ona mulimuli ane toe maua le teine e le tama, faaipoipo, ma ola “fiafia e faavavau.” I tifaga, o le iʻuga masani lava lenā o se ata.

Ae o le mea moni, o le faaipoipoga, e lē o le iʻuga lenā, ae o le amataga o se olaga fou ma le isi tagata. Ma e faamoemoe, e pei ona faapea mai le Failauga 7:8, “e sili ona lelei o le iuga o se mea i lona amataga.”

Se Noataga e Tumau

E manaʻomia le tofāmamao. E tatau ona iai se faavae mautū o se faaipoipoga pe afai o le a tumau ma faamalieina ai. A lē faia faapea, o le a sili atu tulaga faigatā e iai pe a mavae le faaipoipoga na i lo le taimi a o leʻi faaipoipo. E lē mafai ona faaipoipo se Kerisiano ma le mafaufau e faapea: ‘Afai e lē manuia, e mafai lava ona toe tatala.’ E tatau ona vaai i le faaipoipoga o se noataga e tumau.

Na faamanino e Iesu faapea o le faaipoipoga e tatau ona tumau, ina ua ia tali atu i se fesili na fesiligia ai o ia e faatatau i le tatau ona faia o se talaga faaipoipoga. Na ia fetalai e faapea: “Tou te lei faitaulia ea, o le [Atua] na faia tagata i le amataga, na ia faia i laua o le tane ma le fafine, na ia fetalai ane foi, O le mea lea e tuua ai e le tane o lona tamā ma lona tinā, a e faatasi ma lana avā; ona avea lea o i laua o le tino e tasi? O lea e le toe toalua ai, a o le tino e tasi i laua; o lenei, o e ua faatasia e le Atua, aua neʻi faateaeseina e se tagata.”—Mataio 19:4-6.

Ua Mavae le Aso o le Faaipoipoga

Ua saʻo le faapea atu o le mea e sili ona tāua i le soifuaga o se Kerisiano o lona tuuina atu i le Atua, ae faatulaga lua ai le faaipoipoga. O le tuuina atu ua noatia ai se tasi i Lē na Foafoaina Mea e faavavau, ma o le papatisoga ua faaalia ai i le lautele lenā tulaga. O le faaipoipoga o se faalauiloaga lea i le lautele o se feagaiga ua lua faia ma le isi tagata e faavavau. E lē talafeagai le tuuina atu o se tasi i le Atua pe faaipoipo ae lē o atoatoa lona loto i lea fuafuaga. O lea la, o i latou o mafaufau e faaipoipo e lelei ona suʻesuʻe māeʻaeʻa talitonuga, sini, mafaufauga, ma uiga o lē o le a e ono faaipoipo atu i ai.

I le sauniuni atu mo le faaipoipoga, e tāua tele le agalelei, le magafagafa, ma le agaga  felagolagomaʻi. O na uiga e sili atu ona tāua mulimuli ane ina ia taulau manuia ai se faaipoipoga. O tagata ua faatoʻā uma ona faaipoipo ua faagaeetia i lagona o le alofa, ae a mavae le faaipoipoga e ao ona manatua faapea i aso taʻitasi, o le alofa “e le sailia e ia ana lava mea.” Pe a faatatauina i taimi uma le alofa mai lea tausaga i lea tausaga, o le a “le uma le alofa.” (1 Korinito 13:5, 8) O le tumau o le alofa, o le a faigofie ai ona faaalia uiga e pei o le onosai, o le mataalofa, o le agalelei, o le agamalu, ma le lē gaoiā—o fua o le agaga o le Atua. O nei uiga e manaʻomia mo le mauaina o se faaipoipoga e taulau manuia.—Kalatia 5:22, 23.

O le itu e fai si faigatā, o le faaauau lea ona faaalia o na uiga pe a mavae le aso o le faaipoipoga. Peitaʻi, o le auala i le taulau manuia i le faaalia o ia uiga lelei o lenei: Alofa i le tagata na e faaipoipo i ai, ma ia nofosauni e faia ni faataulaga.

Na fetalai Iesu e faapea o le tulafono e aupito sili mo tagata o le alofa lea iā Ieova, ma na ia fetalai e faapea o le tulafono sili lona lua o le,  “Alofa atu i lē lua te tuaoi, ia pei o oe lava ia te oe.” (Mataio 22:39) O le tuaoi e aupito sili ona vavalalata a se tagata ua faaipoipo o lana tane po o le avā faaipoipo, auā e leai se mea i le lalolagi lenei e aufaatasia ai ni tagata se toʻalua na i lo le faaipoipoga.

Peitaʻi, e lē lava le tau ina ia iai o se sootaga faaletino e faamautinoa ai le autasi o faalogona. O le faatasia o tagata e toʻalua e lē faapea o le a tutusa lelei ai o la manatu. Ina ia faamalieina atoatoa i feusuaʻiga faaleulugalii, e tatau foʻi ona tutusa loto ma faanaunauga o i laʻua uma. I le tele o taimi, o le faia o ni faataulaga po o le faamalieina o le isi tagata o le mea lea e manaʻomia ina ia taulau manuia ai se faaipoipoga. O ai e tatau ona faia ni faataulaga? O le tane? Po o le avā?

Faaalia o le Alofa ma le Ava

Ua poloaʻia e le Afioga a le Atua e faapea: “Ia tausolomua ona ava o le tasi i le tasi.” (Roma 12:10) Afai e te mafai, ia e muaʻi faia le mea o le a faamalieina ai lau paaga a o leʻi fai atu o ia iā te oe. Auā foʻi, o se mea ua faia ina ua uma ona talosagaina soo ua itiiti la sona tāua. Na i lo lenā, o paaga taʻitasi i se faaipoipoga e ao ona atiina aʻe le uiga o le tausolomua i le faaalia o le ava i le isi.

Mo se faataʻitaʻiga, ua poloaʻia tane “ia ava i le avā, auā o le ipu ia ua sili ona vaivai, . . . neʻi faalavelaveina a [latou] tatalo.” (1 Peteru 3:7) Afai e lē ava le tane i lana avā, o le a matuā faalavelavea lava ana tatalo i le Atua. O le ā la le uiga o le ava o se tasi i lana avā? O lona uiga o le amanaʻiaina lea o ia i taimi uma, faalogo atu i ona manatu, ma tuu atu na te faia filifiliga i mataupu eseese i le tele o taimi. Ae mafai foʻi ona faaalia e le avā le ava i le tane i le auala lava lea e tasi, e ala i le taumafai e avea ma paaga e lagolagosua.—Kenese 21:12; Faataoto 31:10-31.

Ua faapea mai le Afioga a le Atua: “O loo faapea ona tatau ona alolofa o tane i a latou lava avā, faapei o latou lava tino; o lē alofa i lana lava avā, o loo alofa o ia ia te ia lava; auā e leai lava se tasi e ita i lona lava tino; a e peitai na te fafaga ma tausi atu i ai, faapei o Keriso foi ona tausi i le ekalesia.” O le ā le tele o le alofa o Keriso mo ona soo? Na nofosauni o ia e maliu mo i latou. Ua faapea mai foʻi le Tusi Paia: “Ia taitasi outou ma alofa i lana lava avā faapei o ia lava ia te ia.” (Efeso 5:28-33, LF ) Ae ua taʻu mai e le Afioga a le Atua i avā e faapea ia “alolofa atu i a latou tane, . . . ia usiusitai atu i a latou lava tane, ina neʻi upuleagaina le afioga a le Atua.”—Tito 2:4, 5.

Ia Onosaia Mea Sesē

Talu ai ua fananau uma mai tagata ma le lē lelei atoatoa, o le a latou faia ai la mea sesē. (Roma 3:23; 5:12; 1 Ioane 1:8-10) Na i lo le faaalialia o mea sesē, ia utagia le fautuaga a le Tusi Paia: “Ia muamua i mea uma ona maua e outou o le alofa naunau o le tasi i le tasi, aua o le alofa e ufiufi ai agasala e tele.” (1 Peteru 4:8) O mea sesē laiti e sili atu ona lelei pe a faagalo. E mafai foʻi ona faapena i mea sesē ua fai si matuiā. Ua taʻua i le Kolose 3:12-14: “Ia oofu outou i le alofa mutimuti vale, ma le agalelei, ma le loto maulalo, ma le agamalu, ma le onosai, . . . ia fefaapalepaleai, ma ia fefaamagaloai outou, pe afai ua agaleagaina se tasi e se tasi; faapei ona faamagalo mai le Alii ia te outou, ia faapea foi outou. A o le alofa, e lautua lea i nei mea uma, o le fusi lea e atoatoa ona lelei ai.”

E faafia ona tatau ona tatou faamagalo mea sesē e masani ai ma masei o a tatou paaga faaipoipo? Na fesili atu Peteru iā Iesu: “Le Alii e, e agaleaga mai faafia ea loʻu uso ia te au, ma ou faamagalo ia te ia? seia atu fitu ea? Ua fetalai atu Iesu ia te ia, Ou te le fai atu ia te oe, seia atu fitu, a ia fitugafulu ni fitu.” (Mataio 18:21, 22) Talu ai sa fetalai atu Iesu e faatatau iā i latou i fafo atu o le fusi o le faaipoipoga, pe lē sili atu la ona manaʻomia le faamagalo i le va o paaga faaipoipo!

E ui lava ua i se tulaga lamatia le faiā faalefaaipoipoga i tausaga talu ai nei, ae o le a oo lava ina faasaoina talu ai na faavaeina e le Atua ma o mea uma ua ia faavaeina ua “matuā lelei lava.” (Kenese 1:31) O le a faaauau ona aogā. Ma e taulau manuia, aemaise lava iā i latou e ava ma tausia tulafono a le Atua. Ae o le luʻi lenei: Po o le a tausia moni ea e tagata e toʻalua le tautoga na la faia i le aso o le faaipoipoga ia alofa ma faapelepele le tasi i le isi? E mafai ona avea lenā tulaga ma luʻi, ma e mafai ona e tauivi ina ia taulau manuia ai. Ae o iʻuga, o le a sili ona aogā taumafaiga!

[Pusa i le itulau 10]

TALAGA FAAIPOIPOGA MA LE TETEʻA

O le Atua, o Lē na Amataina le faaipoipoga, na faatulagaina e avea o se sootaga e tumau. Peitaʻi pe e iai ea se māfuaaga faale-Tusi Paia e tatala ai e se tagata lana faaipoipoga ma faataga ai le ono toe faaipoipo atu? Na fetalai Iesu e faatatau i lenei mataupu i le faalauiloa mai e faapea: “Ou te fai atu foi ia te outou, Ai se faatea i lana avā, a o lei mulilua ia, ma fai avā i se tasi, ua mulilua ia.” (Mataio 19:9, LF) O le lē faamaoni i faiga faaleituaiga i se paaga, e na o le pau lea o le faavae e mafai ai ona tatala se faaipoipoga lea e faataga ai le paaga o loo mamā e toe faaipoipo atu.

E lē gata i lea, o upu o loo i le Tusi Paia i le 1 Korinito 7:10-16, a o faalaeiauina ai paaga faaipoipo e nonofo faatasi pea, ae o loo faataga ai foʻi le teteʻa. O nisi, ina ua mavae ni taumafaiga malolosi e faatumauina ai a latou faaipoipoga, ua latou lagona ua leai se isi filifiliga e fai na o le teteʻa loa. O ā ni māfuaaga ua ōgatusa ma le Tusi Paia ua mafai ai ona faia lea laasaga?

O se tasi o māfuaaga o le lē tausia ma le loto i ai o le aiga. Ina ua faaipoipo, ua iloa e le tane le tiute tauave o le sauniaina o mea faaletino mo lana avā ma le fanau. O le tane e lē sauniaina ma le loto i ai mea faaletino e manaʻomia o le olaga “ua faafitia e ia le faatuatua, e sili foi lona leaga i le ua le faatuatua.” (1 Timoteo 5:8, LF) O lea ua mafai loa ona faia se teteʻaga.

O le isi, o faiga sauā e sili ona leaga. O lea la, afai e sauā se tamāloa i lana avā, e ono mafai ona fai e lē ua aafia fua se teteʻaga. (Kalatia 5:19-21; Tito 1:7) “A ua inosia e [le Atua] . . . lē fiafia i le faasaua.”—Salamo 11:5.

O le isi māfuaaga mo le teteʻa, o le matuā lamatia o le itu faaleagaga o le tagata talitonu—lana faiā ma le Atua. Afai o le tetee o se paaga, atonu ua aofia ai taofiofiga faamalosi, ua lē mafai ai ona auai i le tapuaʻiga moni ma ua lamatia ai le itu faaleagaga o se tagata talitonu, ua manatu ai nisi tagata talitonu ua talafeagai ona teteʻa. *—Mataio 22:37; Galuega 5:27-32.

Peitaʻi, afai ua faia le tatalaga faaipoipoga ona o ia tulaga, o le a lē saʻoloto la se tasi e toe faaipoipo atu. E tusa ai ma le Tusi Paia, e na o le pau lava le māfuaaga mo le tatalaina o le faaipoipoga lea e mafai ai ona toe faaipoipo atu, o le “mulilua” po le faitaaga.—Mataio 5:32.

[Faaopoopoga i lalo]

[Ata i le itulau 9]

E tatau ona vaai i le faaipoipoga o se noataga e tumau

[Ata i le itulau 10]

Na fetalai Iesu faapea e tatau ona tatou faamagalo ia “fitugafulu ni fitu”