O se Faafitauli i le Lalolagi Atoa

“O le pule i le ola o se faafitauli mataʻutia i le soifua mālōlōina o tagata lautele.”—David Satcher, o se fomaʻi sili a le Iunaite Setete, i le 1999.

O LENĀ faamatalaga na faailogaina ai i le taimi muamua o le talafaasolopito faapea ua faia ai e se fomaʻi sili o le Iunaite Setete le mataupu o le pule i le ola, e avea ma mataupu e manatu mamafa i ai ma avea foʻi ma mataupu o talanoaga. Ua sili atu tagata i lenā atunuu ua fasiotia e i latou i latou lava na i lo le fasiotia e isi. E lē o se mea la e ofo ai faapea na faalauiloa e le Senate a le Iunaite Setete le mataupu e faatatau i le puipuia o le pule i le ola e faapea e tatau ona tuu i ai le faamuamua a le atunuu atoa.

Ae peitaʻi, o le fua faatatau o le pule i le ola i le Iunaite Setete, lea sa 11.4 i le 100,000 tagata i le 1997, ua i lalo ifo o le fua faatatau i le lalolagi atoa lea na faasalalauina e le Faalapotopotoga a le Soifua Mālōlōina a le Lalolagi i le 2000—e 16 mai le 100,000 tagata. Ua faateleina le fua faatatau o le pule i le ola i le lalolagi i le 60 pasene i le 45 tausaga talu ai nei. I le taimi nei, i le tausaga e tasi, pe tusa e tasi le miliona o tagata i le lalolagi atoa ua pule i o latou lava ola. Ua oo atu ai i le pe tusa o le tasi le tagata oti i sekone uma e taʻi 40!

Peitaʻi, ua lē mafai ona aumaia e faamaumauga, ni faamatalaga saʻo atoatoa o lea tulaga. O le tele lava o tulaga e faafitia ai e tagata o le aiga faapea o le oti na māfua ona o le pule i le ola. E lē gata i lea, o se fuafaatatau e faapea mo oti uma ua faataunuuina ona o le pule i le ola, e i le va o le 10 i le 25 sa fuafuaina. Na mauaina i se tasi o suʻesuʻega e faapea o le 27 pasene o tamaiti i aʻoga maualuluga i le Iunaite Setete na taʻutino mai e faapea a o faagasolo le tausaga na tuanaʻi, na latou mafaufau mamafa ai i le faia o le pule i le ola; o le 8 pasene o le vaega na suʻesuʻeina na faapea mai na latou taumafai e pule i o latou ola. O isi suʻesuʻega na faia na mauaina ai e faapea e mai le 5 i le 15 pasene o le faitau aofaʻi o tagata matutua na iai se taimi, po o ni taimi foʻi, na manatu ai e pule i le ola.

Le Eseesega i Aganuu

E matuā eseese lava auala o loo iai taofi o tagata e faatatau i le pule i le ola. O le taofi o nisi e faapea o se solitulafono, o isi o le auala a se tagata palaʻai e ʻalofia ai tulaga leaga, ae o isi, e vaai i ai o se auala faamamaluina e faatoese ai ona o se mea sesē na fai. E manatu nisi o se auala faatamālii e faaauilumaina ai so latou sini. Aiseā ua eseese ai taofi? E telē se vaega a le aganuu o loo faia ai. O le mea moni, ua taʻua e le Harvard Mental Health Letter e faapea atonu o le aganuu e mafai ai foʻi ona “ono aafia ai le pule i le ola.”

Seʻi manatu i se atunuu i Europa tutotonu—o Hagakeri. Na faasino atu Dr. Zoltán Rihmer i le maualuga o le fua faatatau o le pule i le ola i inā o se “‘aganuu’ faanoanoa.” Na mātauina e Béla Buda, o le faatonusili o le National Institute for Health (Faalapotopotoga Faalemalo mo le Soifua Mālōlōina), a Hagakeri e faapea, e leai lava se faatalatū o tagata Hagakeri i le faia o le pule i le ola, e toetoe lava o so o se māfuaaga e faia ai. “A maua o ia i le kanesa—ua ia iloa lelei lava le auala e faamutaina ai lenā tulaga” o le faamatalaga lenā a Buda, e tusa ai ma gaoioiga e masani ai.

I Initia sa iai le taimi na lauiloa ai se tū masani faalotu e taʻua o le suttee. E ui o lenei gaoioiga, lea e oso atu ai se fafine ua oti lana tane i le mea o loo susunuina ai le tino o lana tane, ua leva ona faasāina, ae e lē o matuā atoatoa ona tafiesea. Ina ua lipotia mai se fafine na pule i le ola i lenei auala, e toʻatele tagata o le nuu na viiviia le faalavelave na tupu. E tusa ai ma le faamatalaga a le India Today, i lenā vaipanoa o Initia “na vaaia ai i totonu o le 25 tausaga le toetoe lava 25 fafine na susunuina i latou i le afi lea na susunuina ai a latou tane.”

E matuā iloga foʻi ona, i Iapani, e faatoluina le sili atu o le tele o tagata oti ona o le pule i le ola na i lo faalavelave faafuaseʻi tau taavale! “O talitonuga masani faaleaganuu a Iapani, lea e lē taitai  ona taʻusalaina ai le pule i le ola, ae o loo lauiloa i amioga ua masani aʻi ma tau faalapotopotoga se gaoioiga iloga lea e tipiina ai e le tagata lona lava manava (seppuku po o le hara-kiri),” ua taʻua ai e le Japan—An Illustrated Encyclopedia.

I lana tusi Bushido—The Soul of Japan, na faamalamalamaina ai e Inazo Nitobe, lea na avea mulimuli ane ma sui failautusi a Malo Sosoo, ia lenei tosinaga faaleaganuu i le oti. Na ia tusi e faapea: “O se faiga na amata mai pe tusa i le va o le 500 ma le 1500 T.A., [seppuku] o se faiga e faaumaina ai e toa lo latou nofosala ona o se solitulafono na faia, e talosagaina ai se faamagaloga mo a latou mea sesē, e sao ai mai le taʻuleagaina, e faasaʻolotoina ai pe togiolaina a latou uō, po o le faamaonia o lo latou faamaoni aʻiaʻi.” E ui lava o lenei ituaiga o pule i le ola ua fai ma masani o se mea o aso ua mavae, ae o loo iai pea nisi o loo faia pea ina ia iai se aafiaga i tagata.

I le isi itu, i Kerisinetoma, o le pule i le ola ua leva ona vaai i ai o se solitulafono. E oo ane i le ono ma le fitu senituri, na faateʻa ese ai e le Lotu Katoliko i latou na pule i o latou ola ma teena le faia o ni o latou toe sauniga faalotu mo ō latou maliu. I nisi o nofoaga, o le maelega faalotu ua tulaʻi mai ai ni tū uigaese e tusa ai ma le pule i le ola—e aofia ai le tautauina o le tino oti ma le oo lava foʻi i le tuiina o se fasi laau i le fatu.

O se tulaga uigaese, o i latou na taumafai e pule i o latou ola e ono faasalaina i le oti. O le taumafai e pule i lona ola e ala i le tipiina o lona faaʻī, na sisiina ai se tamāloa Egelani i le senituri lona 19. O lea na faataunuuina ai e i latou na iai i tulaga pule le mea na lē taulau ona faia e le tamāloa. E ui o le faasalaga mo le taumafai e pule i le ola na suia a o faagasolo tausaga, ae faatoʻā faalauiloaina mai i le 1961 e le Palemene a Peretania e faapea o le pule i le ola ma le taumafai e pule i le ola ua lē o toe avea ma solitulafono. I Aialani na tumau pea ona avea le pule i le ola o se solitulafono seʻia oo i le 1993.

I aso nei o nisi o tagata tusitala ua latou faalaeiauina le pule i le ola o se mea e filifili i ai. O se tusi i le 1991 e faatatau i le fesoasoani atu i tagata, ua pule i o latou lava ola ma maua ai i maʻi e oo ai i le oti, na fautuaina ai auala e faaumaina ai le ola o se tasi. Mulimuli ane, na faateleina le aofaʻi o tagata o ē na leʻi maua i ni maʻi e oo ai i le oti na faaaogāina auala na fautuaina.

Po o le pule ea i le ola o le tali lea i faafitauli o se tasi? Po o iai ea ni māfuaaga lelei e faaauau ai pea ona ola? A o leʻi iloiloina nei fesili, seʻi o tatou iloiloina muamua po o le ā ua taʻitaʻiina atu ai i le pule i le ola.

[Faamatalaga faaopoopo i le itulau 4]

I le tausaga e tasi, pe tusa ma le tasi le miliona tagata i le lalolagi atoa ua pule i o latou lava ola. Ua tusa lenā ma le tasi le tagata oti i le toetoe lava o sekone uma taʻi 40!