Malumalu—Pe e Faamanatu ai le Atua po o Tagata?

TUSIA E LE TUSITALA O LE ALA MAI! I FALANI

UA TAI pei o se toetū le mea na tupu i Moscow. O le Malumalu o le Christ the Savior, lea na faaleagaina e Stalin i le 1931, na toe fausia, ma o ona tamaʻi fale lapotopoto lanu auro i luga o le malumalu e iila lo latou susulu atu i le vanimonimo o Rusia. I le aai o Évry, e latalata ane i Pale, na faamāeʻaina ai e le ʻaufaigaluega le fausiaina o le malumalu e tasi lava lea na fausia i Falani i le lona 20 o senituri. Na tupu lenā mea i ni nai tausaga talu le faapaiaga o le malumalu o Almudena i Madrid. I se tulaga talitutusa, o loo iai i le Aai o Niu Ioka le malumalu ua faaigoaina o le St. John the Divine. Ona ua silia nei i le 100 tausaga e leʻi māeʻa lava ona fausia, e masani foʻi ona taʻua o le St. John the Unfinished (St. John e Leʻi Māeʻa Lava). E ui i lea, o lea malumalu o se tasi o malumalu e aupito sili ona telē i le lalolagi, e silia ma le 120,000 sikuea futu [11,000 sikuea mita].

I Kerisinetoma atoa, e matuā matilatila ai malumalu tetele i le vaaiga i le tele o aai. I tagata faamaoni i lotu, o faamanatuga na o le faatuatua i le Atua. E oo lava i tagata e lē talitonu, e latou te ono faapelepele i ai faapea o ni galuega faa-tufuga lima māeʻa ia po o ni faaaʻoaʻoga foʻi o ni fausaga mataʻina. E ui i lea, o le iai o nei fale tetelē ua taugatā naʻuā mo tapuaʻiga ua lāgā ai ni fesili tāua: Aiseā ma na faapefea ona fausia na fale? O le ā le fuafuaga ua fausia ai?

O le ā Lenei Mea o le Malumalu?

Ina ua mavae le maliu o Keriso ona faamaopoopo lea e soo o Iesu i latou i ni faapotopotoga, o le toʻatele lava na feiloaʻi i fale o aiga. (Filemoni 2) Na tausia nei faapotopotoga e “toeaina” faaleagaga mo le faitau sefulu o tausaga. (Galuega 20:17, 28; Eperu13:17) Peitaʻi, ina ua mavae atu aposetolo, na oo ina liliu ese tagata mai le Faa-Kerisiano moni. (Galuega 20:29, 30) Na oo lava ina faasilisilia ai e toeaina i latou lava na i lo isi ma oo ina vaai ai iā i latou o epikopo o loo latou vaavaaia ni faapotopotoga—o se tulaga na lapataʻia mai e Iesu. (Mataio 23:9-12) O le upu church (falesā), lea sa uluaʻi faatatauina atu i Kerisiano lava latou, sa faatatau atu foʻi i o latou nofoaga o tapuaʻiga—po o le fale. E leʻi umi ae taumafai loa nisi o epikopo e fausia falesā e faafetaui atu i lo latou tulaga faamamaluina o loo iai. Na fatu aʻe se faaupuga fou e faamatalaina ai le falesā a le epikopo—o le malumalu.

O lenei faaupuga e sau mai le upu Eleni kathedra, o lona uiga o le “nofoa.” O le malumalu la, na avea ma nofoalii o le epikopo, o le faailoga o lona tulaga maualuga i le soifuaga faalelalolagi. E pulea e le epikopo mai i lona malumalu ia tagata o loo iai i lana puleaga.

“Le Vaitaimi o Malumalu”

I le 325 T.A., na aloaʻia lelei ai e le Pulega a Nicaea le faamautūina o epikopo i totonu o aai. Talu ai o lea ua lagolagoina e le Malo o Roma, ua maua ai e lē aunoa e epikopo ni meaalofa tetele o fanua mai iā i latou o loo i tulaga pule. Sa latou puleaina foʻi le tele o nofoaga o tapuaʻiga faapaupau. Ina ua paʻū le Emepaea o Roma, na tumau pea le faavae o le ekalesia ma tupu aʻe e pulea le vaitaimi e tusa ma le 500 i le 1,500 T.A. O lenā vaitaimi na oo ina vave ona taʻua e Georges Duby, o se tusitala Falani o talafaasolopito, “o le Vaitaimi o Malumalu.”

 Mai le senituri lona 7 i le senituri lona 14, na faatoluina ai le faitau aofaʻi o tagata i Europa. O lenei oso maualuga o le faitau aofaʻi o tagata na matuā aogā i aai, lea na faateleina ai lona manuia. O lea, o aai e pulea e epikopo e aupito sili ona mauoloa, o aai ia e aupito sili ona tulaga lelei mo le fausia ai o malumalu tetelē. Aiseā? Talu ai o nei fausaga matuā tetelē e mafai ona faataunuuina ma tausia pe afai o loo faaauau pea ona solo mai le tupe!

O le isi vala o loo uunaʻia ai le fausiaina o malumalu, o le taatele o le faaaloalogia o le Taupou o Maria ma le faatāuaina o faatusa faalotu. Na matuā sili ona faatāuaina i le senituri lona 11 ma le 12. Na faalauteleina e epikopo lenei tapuaʻiga, ma faateleina ai le naunau o tagata i o latou malumalu. O le taʻu Notre-Dame (La Matou Tamaʻitaʻi) na amata ona faapipii atu i malumalu i Falani i lenā taimi. “O lē fea aai e leʻi tuuina atu se falesā ma ona malumalu, i le tele o taimi, iā te ia?” o le fesili lea a le encyclopedia Katoliko o le Théo. O lea la, o le malumalu o Saint-Étienne i Pale sa tuuina atu iā Notre-Dame. O le malumalu o Notre-Dame i Chartres, i Falani, na oo ina avea ma se tasi o nofoaga paia autū i Europa. “E leai se tagata—e oo lava iā Keriso lava Ia—na matuā faaaafiaina olaga ma mafaufauga o i latou na fausiaina malumalu na i lo o le Taupou o Maria,” o le faamatalaga lea a le tusi The Horizon Book of Great Cathedrals.

“O le a Matou Fauina se Malumalu e Matuā Telē . . . ”

Aiseā la, ua matuā tetelē ai le tele o nei fale? I le mamao i tuā lava e tusa ma le senituri lona fā, na ufitia ai e malumalu se vaega tele o ogaeleele i Trier, i Siamani, faapea ma Geneva, i Suisilani, e ui lava i le toʻalaiti o o latou tagata tapuaʻi. I le senituri lona 11, na lē mafai ai e le faitau aofaʻi o tagata i Speyer, i Siamani, ona faatumuina lona malumalu telē. O le manatu o le tusi The Horizon Book of Great Cathedrals na faapea mai ai o le “telē ma le matagofie [o malumalu] ua faaalia ai ni uunaʻiga e leai se manatu faalotu o iai.” O na uunaʻiga na iai “le fiatagata faasausili o le epikopo po o le pule o monike tamāloloa o lē o lana pule lea na fausia ai nei fausaga tetele.”

A o faagasolo le senituri lona 12 ma le 13, sa masani lava o le tetelē o ia malumalu e 330 futu [100 mita], ma sa fuafua ina ia tutusa le umī ma lona maualuga. O le malumalu i Winchester, i Egelani, e 556 futu [169 mita] le umi, ma le Milanʻs Duomo, i Italia, e 475 futu [145 mita] le umi, e matuā mataʻina lava. Na folafola mai e se tagata Sepania aloaʻia o le lotu i Seville i le 1402 e faapea: “O le a matou fauina se malumalu e matuā telē lava, ma o le a manatu tagata o le a vāai i ai pe a māeʻa ona fausiaina ua aunoa i tatou ma ni mafaufau lelei.” O le mea moni, o le malumalu o Seville e faapea o le malumalu e lona lua le telē i le lalolagi, e iai lona fāʻalo faaloʻuloʻu e 174 futu [53 mita] lona maualuga. O le falelogo o le malumalu o Strasbourg i Falani e 465 futu [142 mita], e talitutusa atu i se fale e fogāfale 40. I le senituri lona 19, o le olo i luga o le malumalu o Gothic Münster i Ulm, i Siamani, na oo atu lona maualuga i le 528 futu [161 mita], na avea ai ma olo e faia i maa e aupito sili ona maualuga i le lalolagi. Na maumaututū le taofi o le tusitala o talafaasolopito o Pierre du Colombier e faapea: “E leai se manaʻoga tau tapuaʻiga o iai e māfua ai le soona fausia o na fale soona faatetelē.”

A o faagasolo le senituri lona 12 ma le 13, na faaaogāina ai e i latou na faaauilumaina le fausia o malumalu ia se isi ‘⁠uunaʻiga e lē faalelotu’—o le lotonuu o aai. Ua faapea mai le Encyclopædia Britannica: “Ua fai tauvāga a aai po le malumalu a ai e aupito sili ona maualuga.” O le fono e pulea aai, o tagatānuu ma faalapotopotoga a ē galulue i matātā eseese, ua latou faia ia malumalu e avea ma faailoga o o latou aai.

Taugatā i Aso ua Mavae, Taugatā Foʻi i Aso Nei

Na faamatala e se tasi o tagata tusitala ia le fauina o malumalu o se “mea o loo goto uma iai tupe.” O faapefea la ona tausia i se tulaga taugatā—nei fale i le taimi nei—e pei foʻi ona sa iai i le taimi ua tuanaʻi? I nisi o tulaga, o tagata aloaʻia o le lotu e pei o Maurice de Sully i Pale, na latou totogia i a latou lava tupe. I nisi taimi na totogia ai e taʻitaʻi faapolotiki, e pei o le tupu o James I o Aragon ia na pili. I le tulaga masani lava, o tupe maua a tagata lolotu o lea vaipanoa e totogiina ai  pili o malumalu. O nei tupe o loo aofia ai tupe o lafoga ma tupe maua mai fanua. O le mea moni, o le Epikopo a Bologna i Italia na iai ni ona fanua e 2,000! Na faaopoopo atu i ai ma tupe na maua mai i aogātupe a le lotu, o tupe na totogiina mo talosaga o le faamagaloga o agasala. I Rouen, i Falani, o i latou na totogiina tupe ina ia mafai ona taumafaina mea taumafa e faia mai le suāsusu o manupapalagi i le taimi o le Litania, na latou faatupeina le fausia o le vaega o le malumalu e taʻua o le Butter Tower.

O nisi tagata taʻitoʻatasi na matuā lotofoaʻi lava, ma sa faamamaluina i latou e ala i le faia o o latou ata i faamalama tioata lanu po o le faia o o latou faatagata. O le mataupu silisili e faatatau i le faia o le foaʻi a se Kerisiano e aunoa ma le faaalialia atu, na manino mai le faagaloina. (Mataio 6:2) Sa manaʻomia le solo mai pea o le foaʻi tautupe, talu ai o tupe faaalu sa masani lava ona sili atu na i lo le tupe e faatalitalia le maua mai. E lē o se mea la e ofo ai, o le naunau i le suʻeina o tupe e masani lava ona oo atu ai i le faaaogāsesēina ma le fao faamalosi o mea. Mo se faataʻitaʻiga, o le tuuaʻia o se tasi ona o le talitonu i aʻoaʻoga e ese mai i talitonuga a le lotu, e masani lava ona faoa ana meatotino. Ua mafai ai e lenei mea ona faoa faamalosi ai meatotino a tagata ua vavae ese, e pei o tagata Kafari, ma na mafai ai ona faatupeina galuega o ni falesā. *

O le mea moni, na manaʻomia uunaʻiga faifai pea mai le lotu ina ia faatumauina ai pea le solo mai o foaʻi tautupe. E leʻi faapena le tulaga sa iai—e pei ona taʻua ai e nisi o tagata tusitala o talafaasolopito—e faapea o le tele o tupe na maua ona o le foaʻi mai le loto o tagata e fausia na fale tetelē. Na taʻua e le tusitala o talafaasolopito o Henry Kraus e faapea: “E ui ina matuā mapolotu tagata i lenā vaitaimi mai tausaga o le 500 seʻia oo i le 1500 T.A., ae o le fauina o falesā e lē o le mea lea na faamuamuaina e tagata.” O lea o le toʻatele o tagata tusitala o talafaasolopito na faitioina lotu mo nei fausaga soona faatetelē naʻuā. Na taʻutino mai faapea e le Horizon Book of Great Cathedrals: “O le tupe na faaaluina e le lotu mo faugāfale na semanū e mafai ona faaaogāina e fafagaina ai tagata fia aai . . . po o le tausia ai foʻi o falemaʻi ma faleaʻoga. O lea, e mafai ona faapea atu o malumalu na saosaolaumea i le maumau ai o ola o le faitau selau afe o tagata.”

Le Auala na Fausia Ai

O malumalu o se faailoaga o le tomai o tagata. E mautinoa le matuā maofa ai i na fale tetelē na fauina sa faaaogā ai na o sina malamalamaga itiiti faatekinisi. Muamua lava, sa tusia se ata o auʻiliʻiliga uma o le fale ua fuafuaina. I le nofoaga e mauaina mai ai maa mo le fausiaina o fale, e faaaogāina ai mamanu ina ia faamautinoaina ai le tutusa lelei o foliga o lona teuteuina ma le fua saʻo o le tetelē o poloka o maa. E faailogaina ma le faaeteete ia poloka maa ina ia faailoa ai le mea tonu lava e tuu i ai i le fauina o le fale. O le felaʻuaʻiga e matuā tuai lava ma taugatā, ae e ui i lea, e tusa ai ma le tusitala o talafaasolopito i Falani o Jean Gimpel, ‘⁠i le va o le 1050 ma le 1350, na sili atu ai maa na faia i Falani na i lo Aikupito i aso anamua.’

I le nofoaga lava ia o faugāfale e faia ai e le ʻaufaigaluega galuega tomai e tele e ala i le faaaogāina o lifi tuai na iai i na taimi—o polokaka ma siligi, e masani lava ona faagaoioia e tamāloloa o loo savavali i mea taavili e faia i laau. Sa leʻi iloaina i na aso ia fua faamatematika o loo faaaogāina e inisinia i aso nei. Sa faalagolago tagata faufale i le agavaa ma le tomai masani. E lē faateʻia ai la, i le tele o faalavelave matuiā na tutupu ai. Mo se faataʻitaʻiga, i le 1284, na iloa ai ua fai si telē tele o le fāʻalo faaloʻuloʻu o le malumalu o Beauvais, i Falani, ma na solofa ifo ai i lalo. Peitaʻi, o mea e pei o lagolago, lagolago fāʻalo, o iviivi, ma taofi, ia na mafai ai e tagata faufale ona fauina fale e maualuluga tele.

O le umi na fausia ai nei fale na oo atu i se vaimea po o le 40 tausaga pe a vave (Salisbury, Egelani) seʻia oo atu i ni nai senituri. O nisi o malumalu e pei o malumalu i Beauvais ma Strasbourg, i Falani, e leʻi uma ona fauina.

“Sesē Mea na ʻAve i ai le Faamuamua”

O nei ‘⁠fale matagofie ma taugatatā,’ e pei ona faamatalaina ai e Pope Honorius III, na māfua ai fefinauaʻiga mai lava i le amataga. Na tulaʻi mai ni manatu e faaseā ai i le galuega ma le aofaʻiga tele o tupe na faaalu ai. O Pierre le Chantre, o le epikopo o Notre-Dame de Paris i le  senituri lona 13 na ia faalauiloa mai e faapea: “O se agasala le fauina o falesā e pei ona faia ai i aso nei.”

E oo foʻi i aso nei o le malumalu i Évry, tau ina taʻua se malumalu se tasi, na tulaʻi aʻe ai ni faitioga matuiā. E pei ona lipotia mai e le nusipepa a Falani o Le Monde, e lagonaina e le toʻatele o tagata e faapea o loo faaatagia mai e malumalu “se sesē i mea o loo ʻave iai le faamuamua” ma o lotu “e tatau ona faaaluina tupe ina ia maua ai e tagata ma le faaevagelia aogā na i lo le faaalu i maa ma teuteuga o malumalu.”

E lē masalomia o le toʻatele na auai i le fausia o nei fale tetele e alolofa moni i le Atua. O na tagata na manino mai lo latou “maelega i la le Atua,” ae “e le tusa ma le poto.” (Roma 10:2, LT) Sa leʻi fautuaina lava e Iesu Keriso ona soo e fauina ni fale soona faatetelē mo tapuaʻiga. Na ia timaʻia tagata tapuaʻi faamaoni ia “tapuaʻi atu i le agaga ma le upu moni.” (Ioane 4:21-24, NW) E ui lava i lo latou matagofie, ae o malumalu soona faatetelē naʻuā o Kerisinetoma e lē talafeagai ma lenei mataupu silisili. Atonu e ono avea ma mea e faamanatu ai tagata na latou fausia nei malumalu, ae ua lē taulau ona faamamaluina ai le Atua.

[Faaopoopoga i lalo]

[Ata i le itulau 21]

Malumalu o Santiago de Compostela, i Sepania

[Ata i le itulau 23]

Luga: Le faamalama tioata lanu e pei o se rosa o le Notre-Dame, Chartres, i Falani

Luga aʻe: Foliga o se maa na teuteuina, Notre-Dame, i Pale

[Ata i le itulau 23]

Le malumalu mai le senituri 12 o Notre-Dame, i Pale

[Ata i le itulau 23]

Totonu o le malumalu o Notre-Dame, i Amiens. O se fale lotu aupito telē i Falani, o lona fāʻalo e 141 futu [43 mita] le maualuga