E Faapefea Ona Fesootaʻi Telefoni?

TUSIA E LE TUSITALA O LE ALA MAI! I IAPANI

I IAPANI, o se atunuu e tele ai telefoni e pei foʻi o le tele o tagata, e silia ma le 300 miliona fesootaʻiga i telefoni e faia i aso taʻitasi. E mauaina foʻi e Iapani le tusa ma le tasi le miliona o telefoni mai atunuu mamao i aso taʻitasi, ma e talitutusa foʻi ma le aofaʻi o telefoni o loo faia atu e Iapani i atunuu mamao.

Atonu e toetoe lava o aso uma, o loo e faaaogāina ai foʻi se telefoni—a lē o se telefoni e masani ai, ia o se telefoni feaveaʻi. A o agaʻi atu le lalolagi i le faaaogāina atili o faiga faaonapōnei, o le telefoni atu i se tasi i le isi konetineta ua avea ma mea e masani ai le toʻatele o tagata. Ae pe na e tau mānatu ea po o faapefea ona fesootaʻi lau telefoni ma le telefoni a le isi tagata lea e te vili atu i ai?

Fesootaʻi e Ala i Felavasaʻiga Tau Telefoni

Muamua lava, e manaʻomia ona faapipii atu lau telefoni i se felavasaʻiga tau telefoni. Pe afai e te iloiloina faasolosolo le alāuaea o loo faapipii atu i se telefoni masani, o le a taʻitaʻiina atu ai la oe i se palaka, lea o loo faapipii atu i le fesootaʻiga o uaea o loo i lou fale. * Afai o le a e faaauau atili, o le a e iloa ai o le uaea lea e fesootaʻi atu i se uaea malosi (cable), o loo i se pou telefoni po o lalo foʻi o le eleele, lea e tau i le fale talitelefoni i se ofisa o telefoni i lou vaipanoa. O lenei fale talitelefoni, e fesootaʻi atu i se fale talitelefoni e telē atu, lea e faia aʻe ai le felavasaʻiga o telefoni. O lea la, afai e te telefoni atu i lau uō i le aai lava lea e tasi, ona fesootaʻi lea i le laina ia lou leo ma le leo o lau uō e ala i le felavasaʻiga o telefoni.

Ae faapefea ia telefoni feaveaʻi? O faapefea ona fesootaʻi na telefoni? E tumau lava tulaga ia e pei ona iai i telefoni masani. E iai se “uaea” e lē vaaia, e taʻua o le peau ʻea leitiō, lea e faafesootaʻia atu ai lau telefoni feaveaʻi i se ofisa tali telefoni o telefoni feaveaʻi o lata ane, lea o loo fesootaʻi atu i le felavasaʻiga o telefoni. Ae faapefea pe afai o loo e talanoa atu i se tasi i se isi konetineta?

Uaea Malolosi o Loo Faalalava i le Vasa

O le faafesootaʻia o konetineta e lua o loo va i le vasa e ala i uaea malolosi o se galuega e matuā telē lava. E manaʻomia ai le faataatiaina o le uaea malosi e faitau afe maila (kilomita) lona umi i lalo o le sami ma e laasia ai ni autu loloto ma mea maupuʻepuʻe i lalo o le sami. Peitaʻi, o le auala lenei na amata ai fesootaʻiga tau telefoni faava-o-konetineta. Na māeʻa le taʻiina muamua lava o le uaea telefoni i lalo o le sami Atalani i le 1956. * Na faafesootaʻi atu ai Sikotilani iā Newfoundland ma sa iai uaea telefoni e 36 e feaveaʻia leo. I le 1964 na taʻiina ai le uluaʻi uaea telefoni i lalo o le vasa Pasefika, i le va o Iapani ma Hawaii. O lenā uaea malosi na te tauaveina laina telefoni e 128. E tele nisi uaea malolosi na taʻiina i lalo o le sami na faia mulimuli ane ai, na faafesootaʻia ai konetineta ma atumotu.

O ā ituaiga o uaea malolosi o loo taʻiina i le taʻele o le sami mo fesootaʻiga o telefoni? O le taimi muamua na taatele ai le faaaogāina o coaxial cable ia o loo iai le uaea e faia i le kopa o loo ola ma le kopa po o le foli alamini lea e tāʻai i tua o loo ola foʻi. O se tasi o coaxial cable lea na mulimuli faaaogāina, na taʻiina i le 1976, ma na iai le  malosi e tauaveina ai laina telefoni e 4,200. Peitaʻi, i tausaga mai le 1980 i le 1989 na mauaina ai loa uaea malolosi e taʻua o le fiber-optic cable. O uluaʻi uaea malolosi na faaaogāina i le va o konetineta o lenei ituaiga, na faapipiiina i le 1988, na mafai ona tauaveina le 40,000 o talanoaga e faia i le telefoni i le taimi e tasi, lea e faaaogā ai fuainumera faatekinisi. Ua faateleina le aofaʻi o uaea malolosi talu mai lenā taimi. O nisi o uaea malolosi o loo taatitia i le Vasa Atalani e mafai ona tauaveina laina telefoni e 200 miliona!

O faapefea ona faataatitia uaea telefoni malolosi i lalo o le sami? E faataatitia i le taʻele o le sami ma taʻi atu le uaea i luga o le ilititai. Pe a latalata uaea malolosi i le matafaga, ona teuina lea i totonu o se pusa e mautū ma malō lea o loo tuuina i lalo o se autu, na eliina e se masini faatonutonu mamao. O le pusa lea, e na te puipuia le uaea malosi mai le faaleagaina e taula o vaa po o upega fagota. O lea pe a e telefoni atu i lau uō i se isi konetineta, o se tasi o nei uaea malolosi o loo aveina atu lou leo i le isi itu o le sami loloto.

E Faafesootaʻi e Uaea Malolosi e Lē Vaaia Nofoaga Vavamamao

Peitaʻi, e lē na o ni uaea malolosi i lalo o le sami e mafai ona fesootaʻi ai konetineta ma motu. O loo iai se “uaea” e lē vaaia—o se peau ʻea leitiō—o loo taatele foʻi ona faaaogāina. O lenei ituaiga o peau, o loo taʻua foʻi o le peau maneta faaeletise (microwave), e na te faafesootaʻia nofoaga vavamamao mo fesootaʻiga tau telefoni faavaomalo. Talu ai e alu atu le peau maneta faaeletise i se laina saʻo e pei o se ave o le malamalama, e na o nofoaga lava la o loo alu atu saʻo i ai le peau e mafai ona ia faafesootaʻia e aunoa ma le faalavelaveina. Ona o le lapotopoto o le fogāeleele, e lē mafai ai la ona faafesootaʻia tuusaʻo ia nofoaga i le isi itu o le lalolagi. Ina ia faafesootaʻia la na nofoaga mamao, e manaʻomia ai se fesootaʻiga tau satelite.

Afai e tuuina atu se satelite i luga aʻe o le ekueta i le maualuga pe tusa o le 22,000 maila, [35,800 kilomita] i lona faataamilosaga e tuu faatatau i le faataamilosaga o le lalolagi, o lona faataamilosaga la i le lalolagi e tusa ma le 24 itula—e tutusa ma le taimi o loo taamilo ai le lalolagi. O lea, e toetoe lava a tumau ai i luga o le vaipanoa lava lenā e tasi o le lalolagi. Talu ai o lenei satelite e mafai ona taulaʻi atu i se vaipanoa o loo aofia ai le tasi vae tolu o le lalolagi, o nofoaga la e mafai ona fesootaʻi atu ma le satelite, o nofoaga ia o loo faasalalauina atu ma mauaina mai peau maneta faaeletise mai lea satelite. E faapefea la, ona mafai e ni nofoaga e vavamamao ona fesootaʻi le tasi i le isi e ala i le satelite?

O se nofoaga i le lalolagi o loo āu mai i ai le malosi o le satelite, e na te auina atu ia se faailoilo o peau maneta faaeletise i le satelite. E taʻua lenei mea o se ala o fesootaʻiga atu i luga. O le mauaina o le peau ʻea e le satelite, e tuuina ifo ai e le reitā o loo i luga o le satelite le peau ʻea televave i se tulaga telegese ma toe faafoʻi ifo ina ia mafai ona mauaina mai e se isi nofoaga i le lalolagi. E taʻua lenā mea o le ala o fesootaʻiga ifo i lalo. I lenei auala, e mafai ai e nofoaga e lua e lē o mafai ona fesootaʻi le tasi i le isi ona fesootaʻi i se uaea e lē vaaia e ala i le satelite.

O le uluaʻi satelite mo fesootaʻiga faapisinisi, o le INTELSAT 1, lea o loo taʻua foʻi o le Early Bird, na uluaʻi fanaina atu i  luga i le 1965. O le taimi nei pe tusa ma le 200 satelite mo fesootaʻiga o loo iai, o le tele lava o na satelite o loo faataamilo e tusa ai o le faataamilosaga a le lalolagi, o loo gaoioi, e faafesootaʻia ia nofoaga i le lalolagi atoa. O nei satelite e faaaogā e lē gata i fesootaʻiga tau telefoni faavaomalo ae e faaaogā foʻi mo faasalalauga i televise, le suʻesuʻeina o le tau, ma isi fuafuaga. Ona o le tele o reitā o loo iai, o loo mafai ai e satelite ona maua mai ai le tele o laina. Mo se faataʻitaʻiga, na mafai e le Early Bird ona faatonutonuina a lē o se laina televise se tasi po o laina telefoni e 240 i le taimi e tasi. O faasologa a le INTELSAT VIII, lea na amataina talu mai le 1997, e mafai ona sauniaina ala faasalalau e tolu mo televise ma le tele o laina telefoni e tusa ma le 112,500 i le taimi e tasi.

Pe Mafai Ona E Iloa?

O nei suiga uma ua matuā faaitiitia ai lava le tau o le fetelefoniaʻi i le va o malo. Atonu ua mafai nei ona e talanoa soo i au uō po o tagata o lou aiga i se isi koniteneta. E faapefea ona e iloa po o faafesootaʻia oe e ala i se uaea malosi i lalo o le sami po o se satelite?

I le fesootaʻi e ala i satelite, o le umi o le uaea e lē o vaaia (lea e aofia ai le ala o fesootaʻiga atu i luga ma le ala o fesootaʻiga ifo i lalo) e oo atu i le 44,000 maila [70,000 kilomita]. E toetoe lava a tutusa atu i le taamilo faalua i le lalolagi. E ui lava e televave le peau maneta faaeletise e pei foʻi o le televave o le malamalama, ae o le taimi e alu atu ai mai le tasi nofoaga i le lalolagi i le isi e ala i se satelite e toetoe lava a tasi vae fā o se sekone. O le uiga o lenā mea, e oo atu lou leo i le isi tagata i le tasi vae fā o le sekone mulimuli ane ai, ma o loo faapena foʻi le tulaga i le isi itu. O lea, e ʻafa sekone o loo tuai ai. O le lē masani i lenei telegese i talanoaga e pei ona masani ai i aso fai soo, e oʻo ane ai, ua e talanoa atu i le taimi lava e tasi o loo talanoa mai ai le isi tagata. Afai na tupu iā te oe lenei mea, atonu o se mea lea e te iloa ai o loo e talanoa atu e ala i se fesootaʻiga i le satelite. Peitaʻi, afai e te telefoni atu i le numera lava lenā i se isi taimi, atonu e te lē o toe iloaina se taimi o loo tuai ai. Atonu ona ua e fesootaʻi atu nei e ala i se uaea malosi o le fiber-optic o loo i lalo o le sami. O le filifiliga i le auala e faafesootaʻi ai oe i le isi vaega o le lalolagi o loo mafai ona faia e ala i se felavasaʻiga lavelave tau telefoni e lē o mafai ona iloa atu.

O le iai o ni tomai faapitoa ma galuega a le toʻatele o tagata, e manaʻomia ina ia tausia ai felavasaʻiga lavelave tau telefoni o loo i uaea malolosi i lalo o le sami, i nofoaga i le lalolagi, ma satelite, ia e aumaia ai iā i tatou fesootaʻiga talafeagai. O lea la, o le isi taimi e fai ai sau telefoni i lau uō, aiseā e te lē mafaufau ai i mea uma o loo faia e faafesootaʻia ai oe?

[Faaopoopoga i lalo]

[Siata/Ata i le itulau 18, 19]

(Tagaʻi i le lomiga mo le ata atoa)

PEAU ʻEA LEITIŌ

Ala o fesootaʻiga atu i luga

Ala o fesootaʻiga ifo i lalo

[Siata/Ata i le itulau 18, 19]

(Tagaʻi i le lomiga mo le ata atoa)

UAEA MALOLOSI I LALO O LE SAMI

Telefoni feaveaʻi

[Ata i le itulau 19]

O uaea malolosi e faia i fiber-optic e mafai ona tauaveina le 200 miliona o laina telefoni

[Ata i le itulau 19]

INTELSAT VI o loo galulue ai le ʻaufaigaluega a le Space Shuttle

[Ē Ana le Ata]

Ata mai iā NASA

[Ata i le itulau 19]

E taʻiina ma tausia e vaa ia uaea malolosi

[Ē Ana le Ata]

Courtesy TyCom Ltd.