E Mafai Ona Laveaʻiina Lau Faaipoipoga!

O loo anoanoaʻi i le Tusi Paia fautuaga e mafai ona aogā i tane ma avā. E lē o se itu lenei e ofo ai, auā o Lē na faagaeeina le Tusi Paia, o ia foʻi o Lē na Amataina mai le faatulagaga o le faaipoipoga.

UA FAAMATALAINA e le Tusi Paia le tulaga moni lava e oo i ai le faaipoipoga. Ua taʻutino mai ai e faapea o le a oo i le tane ma le avā ia “puapuaga” po o “le tigā ma le faavauvau” e pei ona faaupu ai e le New English Bible. (1 Korinito 7:28) Peitaʻi, o loo faapea mai foʻi le Tusi Paia, e mafai ma e tatau i le faaipoipoga ona fuaina mai le olioli, e oo lava ina matuā fiafia. (Faataoto 5:18, 19) E lē feteenaʻi nei manatu e lua. Ua na ona faaalia mai ai, e ui i ni faafitauli matuiā, ae mafai lava e se ulugalii ona la maua se mafutaga māfana ma le alofa.

Po o aunoa ea lau faaipoipoga ma lena vala? Po ua faapuaoa ea e tigā ma faalogona lē fiafia, le māfana ma le olioli lea sa masani ona mātauina ai le lua mafutaga? E tusa lava po ua fia tausaga o iai  lau faaipoipoga i se tulaga ua leai se alofa, ae mafai lava ona toe maua mai le mea lena ua leiloa. O le mea moni, e tatau ona saʻo lelei lau vaai. E leai se tamāloa ma se fafine lē lelei atoatoa ua mafai ona la ausia se faaipoipoga ua lelei atoatoa. Ae ui i lea, e iai laasaga e mafai ona e laasia ina ia toe suia ai tulaga lē lelei na ua masani ai.

A o faitauina le mataupu o loo mulimuli mai, ia taumafai e mātau po o ā manatu o loo faatatau tonu atu lava i lau faaipoipoga. Na i lo o le taulaʻi atu o ou manatu i vaivaiga o lau paaga, ia e fili mai ni fautuaga e mafai ona e faatinoina, ma ia faatatauina fautuaga a le Tusi Paia. Atonu e te iloa ane ai, e telē se faamoemoe o loo iai mo lau faaipoipoga na i lo o le tulaga sa e mafaufauina.

Seʻi o tatou muaʻi talanoaina uiga faaalia, talu ai e sili atu ona tāua le auala o loo e manatu ai i lau tautoga ma ou faalogona agaʻi i lau paaga.

Lou Manatu i le Tautoga

E matuā manaʻomia lava le iai o se manatu mo se lelei i se taimi umi pe afai o loo e fuafua e faaleleia lau faaipoipoga. Aemaise ai, na fuafuaina e le Atua le faatulagaga o le faaipoipoga ina ia soofaatasia ai ni tagata se toʻalua i se tulaga e lē mafai ona toe tuueseeseina. (Kenese 2:24; Mataio 19:4, 5) Ona lē avea ai lea o le lua mafutaga ma lau paaga e pei o se galuega e mafai ona e toe musu ai, po o se falemautotogi e mafai ona e toe sola ese mai ai e ala i lou faalēaogāina o le feagaiga sa fai. Na i lo o lea, ina ua e faaipoipo sa e faia ai se tautoga tāua o le a e pipiimau atu i lau paaga, e tusa lava po o ā mea e tutupu mai. E ōgatusa le loloto o le faamaoni i le tautoga ma le fetalaiga lea na faia e Iesu Keriso i le toetoe lava 2,000 tausaga ua mavae e faapea: “O e ua faatasia e le Atua, aua neʻi faateaeseina e se tagata.”—Mataio 19:6.

E ono faapea mai nisi, ‘Ia, o lea lava ma te nonofo. Pe e lē o se faamaoniga ea lenei o le ma faamaoni i le ma tautoga?’ Atonu. Peitaʻi ane, e pei ona taʻua i le amataga mai o lenei mataupu faasolo, o nisi o ulugalii o loo nonofo faatasi pea, ae ua na ona faaopeopea ai lava i ogasami sousou, ma ua saisaitia ai i se faaipoipoga ua leai se alofa. O lou sini ina ia maua e lau faaipoipoga le olioli, ae lē o le tau ina faaauau pea. O le tautoga e tatau ona atagia atu ai lou alofa faamaoni, e lē i le na o le faatulagaga o le faaipoipoga, ae i le tagata sa e tautō e te alofa ma faapelepele i ai.—Efeso 5:33.

O upu e te tautala atu ai i lau paaga e mafai ona faaalia ai po o le ā le moni o lau tautoga. Mo se faaaʻoaʻoga, pe a matuā faifai tetele se feupuaʻiga, e faia ai e nisi tane ma avā ni faamatalaga soona lafo e pei o le “Ua ou musu ia te oe!” pe “O le a ou alu e suʻe se isi tagata e alofa faamaoni ia te aʻu!” E tusa lava pe lē o mafaufauina moni na lafoga, ae e mafai ona faavaivaia ai lava le tautoga e ala i le faaalia mai ai, o loo iai pea se avanoa e ono tupu ai se teteʻaga, ma e iai lava se taimi e ono alu ese moni ai le tagata lea na ia faia na faamatalaga.

Ina ia toe faafoʻisia le alofa i lau faaipoipoga, ia ʻalofia na ituaiga o faaupuga taufaamataʻu mai i a oulua talanoaga. Ia manatua, pe o le a e teuteuina ea se falemautotogi pe afai na e iloa e iai se aso e te toe ono alu ese mai  ai? Aiseā la, e te faatalitalia ai lau paaga ina ia taumafai e faaleleia se faaipoipoga e foliga e lē umi ona tumau? Ia e filifili ma le maumauaʻi o le a e taumafai malosi e galue mo ni vaifofō.

O le mea lenei na faia e se tasi avā ina ua uma ona la fesagaʻia ma lana tane se vaitaimi o faigatā. Fai mai a ia: “E tigā loʻu lē fiafia ia te ia i nisi taimi, ae sa lē taitai tau loʻu mafaufau i le faamutaina o le ma mafutaga. Po o le ā lava se mea na faalētonu, sa ma taumafai lava e toe faaleleia. Nei la, ina ua mavae atu tausaga e lua o faafitauli ogaoga, e mafai ona ou faapea atu ma le faamaoni, ua matuā ma fiafia lava i le ma mafutaga.”

Ioe, o le tautoga o lona uiga o le galulue faatasi o se ʻau—e lē tau ina nonofo faatasi ae ia galulue faatasi foʻi ina ia ausia se sini ua lua malilie faatasi i ai. Peitaʻi ane, atonu ua ia te oe se faalogona faapea, o le tulaga lea ua iai nei ua na o se tiute e ao ona faia mo le faatumauina o le lua faaipoipoga. Pe afai o le tulaga lena, aua e te lotovaivai. Atonu e mafai ona e toe maua mai lena alofa. E faapefea?

Ia Faamamaluina Lau Paaga

Ua taʻua e le Tusi Paia: “Ia faamamaluina le faaipoipoga e tagata uma.” (Eperu 13:4, LF; Roma 12:10) O isi uiga o le upu Eleni o loo faaliliuina iinei o le “faamamaluina” ua faaaogā i isi mau o le Tusi Paia e pei o le “manamea,” “viia,” ma “faapelepeleina.” Pe a tatou matuā faatāuaina se mea, e tatou te matuā tautigā lava i le taumafai e tausia lelei. Atonu ua e mātauina le moni o lena manatu i se tagata ua iai sana taavale fou taugatā. E iila lava i taimi uma lana taavale o loo faapelepele i ai, ma tausi i se tulaga lelei. E oo lava i sina tamaʻi maʻosia, e pei lava o se mea e sili ona mataʻutia i lena tagata! E tai faapena foʻi le auala e tausia aʻe ai e isi tagata o latou soifua mālōlōina. Aiseā? Auā e tāua ia i latou lo latou mālōlōina lelei, ma mananaʻo ai foʻi e puipuimalu i ai.

Ia faaalia foʻi lena lava tausiga malupuipuia i lau faaipoipoga. Ua faapea mai le Tusi Paia, o le alofa “e faamoemoe i mea uma.” (1 Korinito 13:7, LT) Na i lo o le lolo atu i se mafaufauga toʻilalo—atonu ua sisii lima i se avanoa mo se toe faaleleiga e ala i le  faapea ifo, “Sa leʻi iai moni ia i maʻua le alofa,” “Sa ma laiti tele ina ua ma faaipoipo,” pe “Ma te leʻi iloa le mea sa ma faia”—aiseā e te lē faamoemoe ai mo ni mea e sili atu ona lelei ma taumafai e faaleleia, ma faatalitali ma le onosai mo ni iʻuga? Ua faapea mai se tasi tamaʻitaʻi faufautua i mataupu tau i faaipoipoga: “E toʻatele aʻu tagata e ō mai mo se fesoasoani, ua ou faalogo o latou faapea mai, ‘Ua lē mafai ona ou toe faafesagaʻia!’ Na i lo o le matuā vaʻili ina ia iloa po o ā vaega o le mafutaga o loo manaʻomia ona faaleleia, ua latou faatopelau lava e lafoaʻi a latou faaipoipoga, e aofia ai ma vala tāua o loo latou tofu sao uma i ai, le talaaga sa latou muaʻi faaatagia lelei maia, ma so o se avanoa lelei sa ono mafai ona toe faaleleia ai i le lumanaʻi.”

O ā ni mea sa lua faia i aso ua mavae o loo lua manatuaina ma lau paaga? E ui lava i toʻatugā i le lua mafutaga, ae mautinoa e mafai ona lua mafaufau i taimi fiafia, ni mea sa mafai ona lua ausia, ma ni luʻi na lua galulue faatasi e faafetaiaʻia. Toe mafaufau i na taimi, ma ia faaalia o loo e faamamaluina lau faaipoipoga ma lau paaga faaipoipo e ala i lou taumafai faamaoni e toe faaleleia le lua mafutaga. Ua faaali mai e le Tusi Paia faapea, e naunau fiafia mai Ieova le Atua i le auala o loo fetausiaʻi ai paaga faaipoipo. Mo se faaaʻoaʻoga, i aso o le perofeta o Malaki, na taʻusalaina ai e Ieova tane Isaraelu o ē na faaʻoleʻole i a latou avā e ala i le tatalaina o a latou faaipoipoga (alei) i ni mea faatauvaa lava. (Malaki 2:13-16) E mananaʻo Kerisiano ina ia faamamaluina Ieova le Atua i a latou faaipoipoga.

Feteenaʻiga—O le ā le Matuiā?

E foliga mai o le māfuaaga autū lava i faaipoipoga ua leai se alofa, o le leai lea i le tane ma le avā o se tomai e faatautaia ai feteenaʻiga. Talu ai e aunoa ma ni tagata se toʻalua e tutusapau, lona uiga la, o faaipoipoga uma lava o le a aliaʻe ai ni feeseeseaʻiga mai i lea taimi i lea taimi. Peitaʻi o ulugalii e faaauau pea ona masesei, e la te ono iloa ane a o faagasolo tausaga, ua mou mālie atu lo la alofa. E iʻu lava ina la faia ai se faaiʻuga faapea, ‘E lē fetaui lelei i maʻua. E ma te misa lava i taimi uma!’

Peitaʻi, o le iai o se feteenaʻiga e lē faapea ai o le mutaaga lena o se faaipoipoga. O le fesili, O faapefea ona taulimaina le feteenaʻiga? I se faaipoipoga o loo taulau manuia, ua iloa lelei e le tane ma le avā e tatau ona la talanoaina o la faafitauli e aunoa ma le oo ina avea o ni “fili sili e matuā vavalalata,” e pei ona taʻua ai e se isi alii fomaʻi.

“Le Pule a le Laulaufaiva”

Po o lua iloa ma lau paaga le auala e ao ona talanoaina ai o oulua faafitauli? E tatau ona lua lotomalilie uma e talanoaina na faafitauli. O le mea moni, o se tomai lenei mea—se tomai e mafai ona faigatā lona aʻoaʻoina. Aiseā? O se tasi o māfuaaga, talu ai o i tatou uma lava e iai taimi tatou te ‘⁠sese ai i se upu’ ona o le tulaga lē lelei atoatoa. (Iakopo 3:2) E iai foʻi nisi sa ola aʻe i ni aiga sa fai ma masani a se matua le faasasao aʻe o lona ita. O lona uiga la, mai lava a o laiti, sa toleniina ai i latou i le talitonuga faapea o se mea masani le pasae aʻe o le ita ma le faia o faamatalaga matagā. O se tama na ola aʻe i se siʻomaga faapena atonu e tuputupu aʻe ma avea o se “tagata itagofie,” o lē e oo ina “lotoa.” (Faataoto 29:22) E faapena foʻi i se teine, sa tausia aʻe i se siʻomaga faapea,  e oo ina avea o “se fafine e faia tala tutui ma itaitagofie.” (Faataoto 21:19, The Bible in Basic English) E mafai ona faigatā le toe liaʻieseina o na ituaiga o mafaufauga ma uiga faaalia i isi ua mauaa ona tuufaasolo mai. *

O le faafoeina la o feteenaʻiga, e aofia ai le aʻoaʻoina e se tasi o ni auala fou e faaali atu ai ona manatu. E lē o se mataupu lenei e manatu māmā i ai, auā ua faapea mai le faataoto a le Tusi Paia: “O le oti ma le ola, o loo i le pule a le laulaufaiva ia.” (Faataoto 18:21) Ioe, e ui atonu o lou talanoa atu i lau paaga i se mataupu e foliga e lē tāua naʻuā, ae peitaʻi, o loo iai iinā se avanoa a lē o lou faaleagaina ai o le lua mafutaga, po o lou toe faasaoina ai foʻi. Ua faapea mai le isi faataoto a le Tusi Paia: “O i ai lē soona tautala, e pei o tutuʻi i le pelu; a o laulaufaiva o e popoto e malolo ai.”—Faataoto 12:18.

E tusa lava pe foliga mai o lau paaga lea e taulamua i lenei faafitauli, ae ia e mafaufau pea i mea o loo e fai atu ai i le taimi o se feeseeseaʻiga. Pe o avea au upu o se faatigā, pe mālōlō ai? Pe o faatupu aʻe ai le ita pe o faaitiitia ai? Fai mai le Tusi Paia: “O le upu faatiga e tupu ai le ita.” I le tuufaafeagai, “o le tali filemu e liliueseina ai le ita.” (Faataoto 15:1) O upu e faapogaia ai le tigā—e tusa lava pe fai atu i se leo toʻafilemu—o le a na ona atili ai ona lagona le ita.

O le mea moni, pe afai e iai se mea o faalētonu i lou mafaufau, e iai lau aiā e faaleo atu ai ou lagona. (Kenese 21:9-12) Ae mafai ona e faia lea e aunoa ma lou faaaogāina o ni faaupuga tutui, e faalumaluma, ma faamasiasi tagata. Ia faataatitia ni tapulaa mausalī mo oe lava—ni faaupuga o le a e maumauaʻi e te lē tautala atu ai i lau paaga, e pei o le “Ua ou ʻinoʻino ia te oe” po o le “Ana ou iloa lava ta te lē faaipoipo.” Ma e ui sa leʻi talanoa patino le aposetolo Kerisiano o Paulo e faatatau i faaipoipoga, ae e atamai ona ʻaloese mai le aafia i mea ua ia taʻua o le “finau i upu” ma “finauvalega.” * (1 Timoteo 6:4, 5) Pe afai o auala na o loo faaaogā e lau paaga, e lē manaʻomia fua la ona e tali atu foʻi faapena i ai. E tusa ai ma mea o loo e iloa, ia tausia pea le filemu.—Roma 12:17, 18; Filipi 2:14.

Ua ioeina e faapea, pe a pasae aʻe le ita o se tasi, e faigatā tele ona ia pulea lelei lana tautala. Ua faapea mai le tusitala o le Tusi Paia, o Iakopo: “O le laulaufaiva o le afi lea. . . . E le mafai e se tasi tagata ona faalata i le laulaufaiva; o le mea leaga e le mataofia, ua tumu i le mea oona e oti ai.” (Iakopo 3:6, 8) O le ā la se mea e mafai  ona e faia, pe a amata ona osooso aʻe le ita? E mafai faapefea ona e tautala atu i lau paaga i se auala o le a toʻafilemu ai le feteenaʻiga na i lo le toe faateteleina atili?

Le Auala e Faatoʻamālie ai Finauga Aasa

Ua iloa e nisi faapea, e sili atu ona faigofie ona faagesegese le ita ma talanoaina lelei mataupu o loo aafia ai, pe afai e manatu mamafa tagata i aafiaga o le a oo i ai o latou lava faalogona na i lo o le faamamafa o gaoioiga o loo faaali mai e a latou paaga. Mo se faaaʻoaʻoga, o le faapea atu, “Ua tigā oʻu faalogona ona o lau tala na fai mai” e sili ona uigā na i lo le faapea atu “Ua e faatigā ia te aʻu” po o le “Sa tatau ona faaaogā lelei lou faiʻai na i lo o lou faia mai o le faamatalaga lena.” O le mea moni, a o faaleo atu ou faalogona, e lē tatau ona mātauina i lou leo sou uiga ita pe ʻinoʻino. E ao ona avea ma ou sini le faamanino atu o le faafitauli na i lo o le osofaʻia o le tagata.—Kenese 27:46–28:1.

E lē gata i lea, ia manatua pea e iai “ona po e faalologo ai, ma ona po e tautala ai.” (Failauga 3:7) Pe a taufai tautatala uma tagata e toʻalua i le taimi e tasi, e leai la se isi o faalogologo, ma e leai foʻi se mea e mafai ona taulau ai. O lea, pe a oo i le taimi e te faalogologo ai, ia “faataalise ona faalogologo, ia faagesegese ona tautala atu.” E tutusapau lava le tāua ma le “faagesegese ona ita.” (Iakopo 1:19) Aua e te faauigaina upu mamafa uma e lafo mai e lau paaga; aua foʻi neʻi “faataalise ona ita o lou loto.” (Failauga 7:9) Na i lo o lea, taumafai e malamalama i faalogona o loo māfua ai upu a lau paaga. Ua faapea mai le Tusi Paia: “O le māfaufau [“malamalama,” NW] o le tagata e faagesegese ai lona ita; o lona viiga foi lea, ina ua le manatua lona agaleagaina.” (Faataoto 19:11) E mafai ona fesoasoani le malamalama, i se tane po o se avā e taulaʻi atu ai i le māfuaaga autū o se feeseeseaʻiga.

Mo se faaaʻoaʻoga, o le faitioga a se avā faapea ua lē o toe faaaluina e lana tane se taimi faatasi ma ia, e foliga mai e lē na ona faasino atu i le taimi. Atonu o loo tele ina faasino atu i le lē toe amanaʻia o ona faalogona ma le lē toe talisapaia o ia. E tali faapena foʻi pe a tigā le loto o se tane i se faatauga ua faia faatopetope e lana avā, atonu e lē na o le tupe lea e popole i ai. Atonu e tele ina faasino atu i lona lē fiafia i le lē amanaʻia mai o ona faalogona a o faia le filifiliga. O le tane ma le avā e iai le malamalama, o le a matuā tilofaʻia lelei le aa o le faafitauli.—Faataoto 16:23.

Pe e lē sili ea ona faigofie le tautala atu na i lo o le faatino? O le mea mautinoa lena! O nisi taimi, e ui lava i ni taumafaiga e sili ona lelei, ae o le a iai lava ni upu lē alofa e lafo atu ma le sasao aʻe o le ita. Pe a e iloa o loo tupu lena mea ia te oe, e manaʻomia la ona e usitaia le fautuaga a le Faataoto 17:14: “Ina tuu ai ia le misa, manū ua le tupu tele.” E leai se mea e āfaina ai fua le tolopō o le lua talanoaga seʻia oo ina toʻamālie ifo faalogona. Pe afai e faigatā ona lua talanoa e aunoa ma le oo ina lē pulea lelei faalogona, atonu e sili ai pe a avatu sa oulua uō taʻumatuaina  ina ia iai faatasi ma oulua ma fesoasoani atu e faatoʻatoʻamālie mea o lua feeseeseaʻi ai. *

Ia Tausisia Pea se Vaaiga Talafeagai

Aua e te lotovaivai pe afai ua lē o tulaʻi mai lau faaipoipoga i le tulaga sa e muaʻi faaataina ai a o faia le lua faigauō. Fai mai le faamatalaga a se tasi vaega o ni tagata atamamai i mataupu tau i faaipoipoga: “O le fiafiaga atoatoa e lē gata mai, e lē o le tulaga lena o le faaipoipoga i le toʻatele o tagata. E matagofie i nisi o taimi ae matuā faigatā foʻi i isi taimi.”

Ioe, atonu e lē pei le faaipoipoga o se faigauō a se tama ma se teine lea e faamatala mai i se tusi, ae lē manaʻomia ai foʻi la ona avea o se mala. E ui o le a iai taimi e ao ai ia te oulua ma lau paaga ona taumafai e onosaia e le tasi le isi, peitaʻi o le a iai foʻi taimi o le a tatau ai ona lua faagalo i o oulua feeseeseaʻiga ae tau lava ina ia lua fiafia e mafuta faatasi, ia fai ni mea lua te fiafia ai, ma lua talatalanoa e pei o se faigauō. (Efeso 4:2; Kolose 3:13) O taimi faapena atonu e mafai ai ona lua toe faatupu aʻe le alofa lea ua mou mālie ese atu.

Ia manatua, e lē mafai e ni tagata lē lelei atoatoa se toʻalua ona la maua se faaipoipoga e lelei atoatoa. Peitaʻi e mafai lava ona la maua se fiafia. O le mea moni, e tusa lava pe iai faafitauli, ae mafai e le lua mafutaga ma lau paaga ona avea ma puna o le tele o le faamalieina. E tasi le mea ua mautinoa: Pe afai e te lua faia uma ma lau paaga ni taumafaiga ma lua lotomalilie e fetuutuunaʻi ma saʻilia e le tasi se mea lelei mo le isi, ona iai lea o se māfuaaga lelei e talitonu ai, e mafai ona laveaʻiina lau faaipoipoga.—1 Korinito 10:24.

[Faaopoopoga i lalo]

[Faamatalaga faaopoopo i le itulau 12]

Pe o avea au upu o se faatigā, pe mālōlō ai?

[Pusa/Ata i le itulau 10]

TOGI MĀLIE ATU LE POLO

Ua faapea mai le Tusi Paia: “Ia le aunoa a outou upu ma le alofa, ia faamāi i le masima, ia iloa e outou ona fai faatatau se tali i tagata e taitoatasi uma.” (Kolose 4:6) E faatatau moni atu lava lenei manatu i faaipoipoga! Seʻi faataʻitaʻi: I le taaloga o le saposapoga polo, e te togi atu ai le polo ina ia faigofie ona sapo mai e le isi tagata. E te lē soona veloina i se malosi e te ono faamanuʻaina ai lau paga. Ia faatatau le mataupu silisili lava lena pe a lua talanoa ma lau paaga. O le soona lafo atu o faamatalaga tugā, o le a na ona faamanuʻalia ai o faalogona. Ae na i lo lea, ia talatalanoa mālie atu—ma le alofa—ina ia mafai ai e lau paaga ona malamalama mai i lou manatu.

[Pusa/Ata i le itulau 11]

TOE FAFAGU MAI MEA UA TUANAʻI!

Faitau i lua tusi na sa oulua fetusiaʻi ai i aso ua teʻa. Tagaʻi atu i ata. Fesili ifo ia te oe lava, ‘O le ā na tosina mai ai aʻu i laʻu paaga? O ā uiga sa sili ona ou fiafia i ai? O ā mea sa masani ona ma faia faatasi? O ā mea sa ma taliē ai?’ Ona lua talatalanoa lea ma lau paaga i nei mea ua lua toe manatua. O se talanoaga e amata i le fuaitau “Manatua foʻi le taimi lea . . . ?” e ono fesoasoani ia te oe ma lau paaga e toe fafagu mai ai faalogona na sa lua fiafia faatasi ai i taimi ua mavae.

[Pusa i le itulau 12]

FOU LE PAAGA, TUTUSA FAAFITAULI

O nisi paaga o ē ua lagonaina faapea o loo saisaitia i se faaipoipoga ua lē o iai se alofa, ua faaosoosoina e fai se isi amataga fou ma se paaga fou. Peitaʻi e taʻusalaina e le Tusi Paia le mulilua, i le faapea mai, o le tagata e faia lenei agasala “ua leai sona mafaufau [“o se vale ua leai se faiʻai,” New English Bible]” ma “na te faaumatia e ia lona lava ola.” (Faataoto 6:32) O le iʻuga, e lē toe maua e le tagata mulilua e lē salamō le finagalo malie o le Atua—o se ituaiga o faaumatiaga e sili ona leaga.—Eperu 13:4.

O loo faaalia mai i isi foʻi auala le matuā valea o le faia o le mulilua. O se tasi o itu, o le tagata mulilua lea ua toe fai se isi ana paaga fou, e ono toe fesagaʻi foʻi ma faafitauli lava ia na pagatia ai i lana uluaʻi faaipoipoga. Ua taʻua e Dr. Diane Medved le isi vala e ao ona mafaufauina. Fai mai a ia: “O le mea muamua lava ua iloa e lau paaga fou e uiga ia te oe, o lou lotomalie lea e te lē faamaoni. Ua ia iloa e mafai ona e faaseeina lē sa e folafola o le a e āva atu i ai. E matuā lelei lava lou tomai i le fai faamolemolega. E mafai ona e toe ʻalo ese mai i se taʻutinoga. O le faafiafiaina o ou faalogona po o le faamalieina o ou manaʻoga, o maunu lava na o le a e taumulimuli solo ai. . . . E faapefea la ona iloa e lau paaga fou o le a e lē toe tosina ese atu foʻi?”

[Pusa i le itulau 14]

LE ATAMAI E MAUA MAI FAATAOTO A LE TUSI PAIA

• Faataoto 10:19: “O le tele o upu e le oge solitulafono ai; a o le ua taofi ona laugutu, o le tagata poto lea.”

Pe a e ita, e te ono faia ni faamatalaga ua sili atu na i lo o se mea o e mafaufau e te fai atu ai​—ma e mulimuli ane e toe salamō ai.

• Faataoto 15:18: “O le tagata lotoa, na te faatupuina le misa; a o lē faatoatoa e tuu lelei ia te ia le finauga.”

O tuuaʻiga faatigā e foliga mai o le a toʻatamaʻi ai lau paaga, ae o lou onosai e faalogologo atu, o le a aogā mo oulua uma ina ia lua taumafai e suʻe se vaifofō.

• Faataoto 17:27: “O le ua i ai le poto, e taofia e ia ana upu; o le ua agamalu foi, o le tagata faautauta lea.”

Pe a e lagonaina ua tuputupu aʻe le ita, e sili ona lelei le fifilemu ina ia ʻalofia ai se matuā pasae aʻe o se feupuaʻiga.

• Faataoto 29:11: “O le vale, e sasaa uma mai e ia lona loto; a o le tagata poto, e taofiofi e ia lona loto i tua.”

E matuā tāua le pulea totino. O le faapasae aʻe o ni upu malolosi i se tulaga ita, o le a na ona faasegisegi mamao ai lau paaga.