Tala Fou a le TV—O le ā Moni le Tele o na Tala o ni Tala Fou?

Ina ua māeʻa se iloiloga o faasalalauga o tala fou a TV e 102 mai aai e 52 i le Iunaite Setete mo faamatalaga o loo faasalalauina ma le auala e taulimaina ai tala fou, na maua ai e se vaega suʻesuʻe a le ʻautusitala faapea e na o le 41.3 pasene o le polokalame o loo avatu ai tala fou. Ae o le ā o loo faia aʻe ai le isi vaega atoa o tala fou?

I se fua faatatau, o le 30.4 pasene o le taimi o faasalalauga mo tala fou a le TV i lena vaipanoa ua faōa uma e faasalalauga faapisinisi. O le mea moni, i suʻesuʻega i nisi o fale faasalalau ua latou tuuina atu le tele o le taimi mo faasalalauga faapisinisi na i lo tala fou. E lē gata i lea, na taʻua i le lipoti na taaofaʻi ai mea na maua mai i suʻesuʻega faapea, ua faatumuina le tele o taimi o loo faaalu mo tala fou i tala e lē tāua. * I lalo o le ulutala “Tala e Lē Tāua,” na faavasegaina ai e le lipoti “le taimi o loo faaaluina pea i luga o le ea i faatalanoaga i le va o tagata faasalalau, o faasalalauga faatosina ma sina faaataga o tala o le a sosoo mai, o tala ‘faamomoiloto’ po o tala faavalevalea ma mea ua tutupu i tagata lauiloa.” O se faataʻitaʻiga o nisi o tala lē tāua: “Tauvaga Pese Matagā a Tamāloloa,” “Se Tiʻetiʻega ‘Uiga Ese, Ofoofogia, Mataʻutia,’ a le Tusitala i se Mataaga Taalo,” ma le “Toʻatele Tagata ua Latou Faatauina Mai Mea e Fai ai Sanuisi i Supamaketi.”

O ā tala ia o loo faia moni mai ai lava tala fou? O tala i soligātulafono o loo pulea ai tala fou a TV, ua faaaluina ai le 26.9 pasene o le taimi e faasalalauina ai tala fou i le ea. “‘Afai e faatatau le tala i ni faiga sauā, e avea lena ma ni tala tomua’ o le mea moni lena e uiga i tala fou a le TV . . . E ui ina maulalo le numera o solitulafono i totonu o le Iunaite Setete i nai tausaga ua tuanaʻi, ae e lē o le tulaga lena o loo iai i tala fou a televise.” Aiseā? E tusa ai ma le manatu o i latou na faatinoina le suʻesuʻega, “o solitulafono o ni mea mataʻina ma e uaʻi atu i ai tagata.”

E sosoo atu i solitulafono ia le faasalalauina o mala, e pei o mu, faalavelave tau taavale, lōlōga, ma le pasae aʻe o nofoaga e teu ai kasa, suāuu ma isi vailaau (12.2 pasene o tala fou), ona sosoo ai lea ma tala i taaloga (11.4 pasene). Ona sosoo mai lea ma faasalalauga mo le soifua mālōlōina (10.1 pasene), le faiga malo (8.7 pasene), ma le itu tau tamaoaiga (8.5 pasene). O mataupu e pei o aʻoaʻoga, le siʻosiʻomaga, o taleni, ma le faasaienisi e itiiti lava se uaʻi atu i ai (mai le 1.3 pasene i le 3.6 pasene). Ae i le isi itu, o se tulaga masani le 10 pasene o loo faaalu e tala fou uma lava mo tala i le tau. “E lē mafesiligia le mea moni e fiafia tagata uma e talanoa e uiga i le tau ma e faapena foʻi tala fou a le TV,” o le faamatalaga lea a tagata suʻesuʻe. Na latou faaopoopo mai: “So o se ituaiga o tau lava, lagilelei pe loulouā, vevela pe mālūlū, susū po o le mātūtū, e mafai ona faapogaia ai le faaumiumi o faasalalauga o tala fou.”

I se itu lelei, ua taʻua i le lipoti faapea o le toʻatele o le ʻautusitala ma tagata matamata ua latou iloa le manaʻomia ona faia se suiga. Peitaʻi, ua ioeina e suʻesuʻega faapea e lē faigofie ona iai se suiga faapena ona “e malosi tele le tulaga tau tupe o faasalalauga ma o le matapeʻapeʻa e ono tineia ai le lelei o le tulaga o loo iai faiga faatusitala.”

[Faaopoopoga i lalo]