Ua Fesili Mai Talavou . . .

Le Avea ma Tamā Pe Avea ai se Tasi ma Tamatane?

“E iai ni [tama] ou te iloa e faapea mai, ‘E iai loʻu afafine e nofo iinei ma loʻu atalii la e nofo i o,’ ma o le auala e fai ai a latou faamatalaga, e foliga mai peiseaī e faalēano i ai.”—Asora.

I TAUSAGA taʻitasi e toetoe lava maua le miliona o teineiti talavou i le Iunaite Setete ua totō. O se vaega tele o tamaiti e fananau mai i na tinā talavou o ni tamaiti tōifale. E toʻatasi mai le toʻafā o nei tinā talavou, o le a toe fanau foʻi se isi ana tamaitiiti lona lua i totonu o le isi lua tausaga e sosoo mai. Fai mai le mekasini o le Atlantic Monthly: “Pe afai e faaauau pea āʻega ia ua iai nei, o lona uiga e itiiti ifo ma le ʻafa o tamaiti uma e fananau mai i aso nei o le a nonofo pea ma o latou lava tinā ma tamā a o faagasolo o latou tausaga laiti. O le toʻatele o tamaiti Amerika o le a tele ni tausaga latou te nonofo ai i aiga e na o se tinā e iai.”

E ui o le Iunaite Setete lea e sili atu ona maualuga lana fuainumera o teineiti talavou e maʻitō na i lo se isi lava atunuu tamaoaiga, peitaʻi o le faafitauli o tamaiti tōifale ua aafia ai le lalolagi atoa. I nisi atunuu Europa, e pei o Egelani ma Falani, o le fuainumera o na tamaiti ua toetoe lava tutusa ma le aofaʻiga o tamaiti faapena i le Iunaite Setete. I nisi atunuu Aferika ma Amerika i Saute, o le aofaʻiga o pepe e fananau mai i teineiti talavou ua toetoe faaluaina ai le aofaʻiga o pepe faapena i le Iunaite Setete. O le ā ua faapogaia ai lenei mala?

Le Pogai o le Mala

O lenei tulaga ua atagia mai ai i sona vaega tele, le matuā malapagā ua iai amioga tatau i nei “aso faigata” o loo tatou ola ai. (2 Timoteo 3:1-5) I le faitau sefulu tausaga e leʻi leva tele atu, ua matuā sasao faaafi aofaʻiga o talagā faaipoipoga. Ua matuā taatele olaga faatauātane, tauāfafine ma isi ituaiga eseese o amioga faaleituaiga sili ona matagā. Ua avea talavou ma taulaʻiga o uunaʻiga malolosi a le ʻaufaifaasalalau—o kaseti o pese ma ata vitiō o pese e faagaee ai faalogona, o tala ma faasalalauga faatosina i mekasini, o ata i televise ma ata tifaga o loo viiviia ai feusuaʻiga e saʻoloto le fai ma so o se tasi e manaʻo ai. O le faigofie ona iai o nofoaga e faia ai le faapaʻūtama ma taofiofia ai le maʻitō ua faapena foʻi ona atili ai le faateteleina o le talitonuga o talavou faapea, e leai ni āuga o le faia o feusuaʻiga. Fai mai se tasi tamā e leʻi faaipoipo: “Ou te fia faia feusuaʻiga e aunoa ma le amoina o ni avega tauave.” Fai mai le faamatalaga a le isi: “O feusuaʻiga o se mea e mālie.”

O uiga na atonu e sili ona taatele i talavou e matitiva o latou olaga. Na faia e se alii suʻesuʻe e suafa ia Elijah Anderson ni faatalatalanoaga auʻiliʻili ma ni talavou e nonofo i vaipanoa feomaʻi i  totonu o taulaga, ma ia faapea mai ai: “E toʻatele tama e mafaufau faapea o feusuaʻiga o se mea tāua lea e mātaulia ai le olaga o se tagata i totonu o le vaipanoa; o le faia o feusuaʻiga ma le anoanoaʻi o ni teine ua avea o ni mea sili ona tāua ua ausia e se tasi.” O le mea moni, na taʻu atu e se tasi tamā e leʻi faaipoipo i le Ala Mai! faapea, o le faia o feusuaʻiga ma le anoanoaʻi o ni teine e manatu i ai le toʻatele ua pei o ni “faailoga e mafai ona e faatutū i luga o se fata.” O le ā ua māfua ai sea manatu sili ona matagā? Ua faamatala mai e Anderson faapea, i le tele lava o tulaga, o tagata e sili ona tāua i le olaga o se talavou e nofo i vaipanoa feomaʻi i totonu o taulaga, “o tagata ia o lana lava tupulaga. Latou te faatulaga tapulaa mo ana amioga, ma e tāua tele mo ia le tatau ona mulimuli atu i na tapulaa.”

Ua mātauina ai la e Anderson le toʻatele o tama talavou e manatu, o le faia o feusuaʻiga ma le anoanoaʻi o ni teine ua na o se taaloga lava, “o le sini o lena taaloga ina ia faamasiasi le isi tagata, aemaise lava se tamaʻitaʻi talavou.” Ua ia toe faapea mai “o le taaloga e aofia ai le auala o le a faailoa lelei atu ai e le alii o ia, e pei o ona laei, ana teuga, ona foliga vaaia, lona tomai e siva, ma talanoa ai.” E toʻatele tama talavou ua matuā atamamai lava i le faafoeina o lenei “taaloga.” Peitaʻi fai mai Anderson: “Pe a oo ina maʻitō le teine, ona amata loa lea ona solasola ai le tauleʻaleʻa.”—Young Unwed Fathers—Changing Roles and Emerging Policies, na tusia e Robert Lerman ma Theodora Ooms.

Le Silafaga a le Atua

Ae po o le faia ea o se fanau e avea moni ai lava se alii o se tasi ua faatamatane? Po o feusuaʻiga ea ua na o se taaloga? E lē o le finagalo lena o Lē na Foafoaina i tatou, o Ieova le Atua. I lana Afioga, le Tusi Paia, ua faamanino mai ai e le Atua faapea, e iai se fuafuaga mamalu mo feusuaʻiga. Ina ua uma ona taʻua le foafoaina o le uluaʻi tane ma le fafine, ona faapea mai lea o le Tusi Paia: “Ua faamanuia foi e le Atua ia te i laua, ma ua fetalai atu le Atua ia te i laua, Ia fanafanau ia, ma ia uluola, ma ia tumu ai le lalolagi.” (Kenese 1:27, 28) Sa leʻi iai lava se fuafuaga a le Atua faapea e tatau ona tuulafoaʻia le fanau e o latou tamā. Na ia tuufaatasia le uluaʻi tane ma le fafine i le fusi tumau o le faaipoipoga. (Kenese 2:24) O lona uiga la, o lona finagalo ia tofu uma tamaiti ma so latou tinā ma se tamā.

Peitaʻi e leʻi leva, ae amata loa ona faatoʻatele e tamāloloa a latou avā. (Kenese 4:19) Ua taʻu mai e le Kenese 6:2 ia i tatou nisi o foafoaga faaagelu na amata ona “vaavaai . . . i afafine o tagata, ua lalelei lava i latou.” Ina ua faaliliu e nei agelu o latou tino i ni tino tagata, “ona fai avā ai lea o i latou,” i lo latou tuʻinanau ina ia ave i “fafine uma ua latou loto i ai.” O le Lolo i aso o Noa na toe faamalosia ai nei temoni e foʻi atu i le nofoaga o agaga. Peitaʻi, ua faaalia e le Tusi Paia le taofiofia nei o i latou i le lalolagi. (Faaaliga 12:9-12) O lea ua aumaia ai e Satani ma ana temoni ni aafiaga sili ona malolosi i tagata i aso nei. (Efeso 2:2) Ua lolo atu ma le leʻi fuafuaina alii talavou i na aafiaga leaga pe a oo ina avea i latou ma tamā i ni tamaiti e leʻi mananaʻo i ai ma e lē alofagia.

O se māfuaaga lelei la ua faapea mai ai le Tusi Paia: “O le finagalo foi lenei o le Atua, ia faapaiaina outou, ina ia faamamao outou ma le faitaaga; ia taitasi outou ma iloa ona fai o lona lava tino ma le faapaiaina ma le taʻuleleia, aua ma le tuʻinanau o le manao, faapei o nuu ese ua le iloa le Atua. Aua neʻi sopo tapulaa se tasi, ma agaleaga i lona uso i lenei mea; auā o le Alii na te taui atu ma sui i nei mea uma.”—1 Tesalonia 4:3-6, LF.

‘Faamamao mai le faitaaga’? E toʻatele alii talavou e ono aamu mai i lenei manatu. Aemaise ai, o loo laiti pea i latou, ma o le taugā malolosi na o o latou tuʻinanauga! Ae mātau foʻi, o le faitaaga e aofia ai le ‘agaleaga ma le sopo tapulaa’ i aiā a isi. Pe lē o se agaleaga ea i se tamaʻitaʻi le tuua o ia ma se pepe e aunoa ma se lagolagosua mai se tane? Ae faapefea lamatiaga o le pipisi atu ia te ia o se faamaʻi o loo feaveaʻia e feusuaʻiga, e pei o faamaʻi o totogasā, sifilisi, maʻiafi, po o le AIDS? E moni, e iai nisi taimi e mafai ai ona alofia na āuga. Peitaʻi, o le faia o feusuaʻiga a o leʻi faaipoipo o se agaleaga lava lena i le aiā a se tamaʻitaʻi na te puipuia ai sona talaʻaga lelei ma ulu atu ai i se faaipoipoga a o taupou pea o ia. O le faamamao la mai le faitaaga o se mea ua talafeagai ma faaalia ai le faatagata matua. O le mea moni, e manaʻomia ai le pulea totino ma le maumauaʻi o se tasi ina ia mafai ona ia “iloa ona fai o lona lava tino” ma faamamao ai mai feusuaʻiga a o leʻi faaipoipo. Ae pei ona taʻu mai e le Isaia 48:17, 18 ia i tatou, e ala  mai i ana tulafono, ua ‘⁠aʻoaʻoina ai i tatou e le Atua i mea e aogā’ mo i tatou.

“Ia Outou Faatamatane”

Ae mafai la faapefea e se alii talavou ona faamaonia atu o ia o sē ua faatamatane moni? E mautinoa lava e lē faamaonia i lona avea o se tamā i ni tamaiti tōifale. Ua timaʻi mai le Tusi Paia: “Ina mataala ia outou, ia outou tumau i le faatuatua, ia outou faatamatane, ia faamalolosi outou. Ia faia uma a outou mea i le alofa.”—1 Korinito 16:13, 14.

Seʻi mātau mai, o le “faatamatane” e aofia ai le mataala, ia mausalī i le faatuatua, ia lototele, ma agaalofa. O le mea moni, e tutusapau le tāua e tatau ona faatatauina ai i alii ma tamaʻitaʻi nei mataupu silisili. Peitaʻi, pe afai e te atiina aʻe uiga faaleagaga e pei o nei uiga, o le a faapena ai foʻi ona faaaloalogia ma amanaʻia oe e tagata o sē ua faatamatane moni! Ia e aʻoaʻoina se lesona mai le tagata silisili o ē uma na soifua mai—o Iesu Keriso. Seʻi tau ina manatu i ona uiga faatamatane ma le lototele a o fesagaʻi ma le faasalaina i le satauro seʻia oo lava ina maliu. Ae na faapefea ona feutagaʻi Iesu ma le itupa o tamaʻitaʻi?

E mautinoa lava sa iai le avanoa o Iesu e ono faia ai ni ana faauōga ma fafine. Sa toʻatele ona soo fafine, o nisi o i latou na “auauna atu ia te ia [ma ona aposetolo] i a latou mea.” (Luka 8:3) Sa sili ona vavalalata atu o ia i tuafāfine e toʻalua o Lasalo. O loo faapea mai le Tusi Paia sa “alofa lava Iesu ia Mareta, ma lona uso.” (Ioane 11:5) Pe na faaaogā ea e Iesu lona atamai, ona uiga tauagafau, po o lona aulelei, lea e mautinoa lona mauaina ona o ia o se tane lelei atoatoa, e faatosina ane ai nei fafine ina ia latou faia ni amioga lē tatau? E leai, ae na i lo lea, ua faapea mai le Tusi Paia e uiga ia Iesu, sa “le agasala lava” o ia. (1 Peteru 2:22) Na te leʻi faia ni uiga matagā e oo lava i le taimi lea na alu ane ai se fafine o lē sa lauiloa o se tagata agasala, pe atonu o se fafine talitane, ma “faasisina ifo e ia loimata i ona vae, ua sōloi ai i lona lava lauulu.” (Luka 7:37, 38) Sa leʻi tau foʻi ni mafaufauga o Iesu faapea na te faaaogāina uiga lologofie o lenei fafine mo le faia o ni amioga lē tatau! Sa ia faaalia le tomai e pulea ai ona faalogona—le faailoga o sē ua faatamatane moni. Sa ia feutagaʻi ma fafine, e lē o nisi e faaautū i ai amioga faaleituaiga, ae o nisi sa onomea ma tatau i ai le alofa ma le faaaloalo.

Pe afai o oe o se alii talavou Kerisiano, o le mulimuli atu i le faaaʻoaʻoga a Keriso—ae lē o faaaʻoaʻoga a nisi o au aumea—o le a taofia ai oe mai lou ‘agaleaga ma sopo tapulaa’ i aiā a le isi tagata. O le a puipuia ai foʻi oe mai lou oo i le mala faanoanoa o le fai o oe ma tamā o se tamaitiiti tōifale. O le mea moni, atonu e ulagia oe e nisi ona o lou faamamao mai le faitaaga. Peitaʻi, e mulimuli ane, o le mauaina o le finagalo malie o le Atua o le a sili atu ona e manuia ai na i lo le fiafia mai ia te oe mo sina taimi puupuu o au aumea.—Faataoto 27:11.

Ae faapefea pe afai sa ola muamua se talavou i se olaga lē mamā tau amio ae o lea ua liliu ese nei mai ona ala lē mamā ma ua salamō moni? Afai o le tulaga lena ua iai, o le a pei la o ia o le tupu o Tavita lea na salamō, o lē na faia ni amioga lē saʻo faaleituaiga, peitaʻi sa ia mautinoa le faamagaloina o ia e le Atua. (2 Samuelu 11:2-5; 12:13; Salamo 51:1, 2) Ae pe afai ua iʻu i se maʻitō ae leʻi faaipoipo, e iai lava ni filifiliga tugā e ao i se alii talavou ona ia faia. Pe tatau ea ona ia faaipoipo atu i le tamaʻitaʻi? Pe iai ea ni ana tiute tauave e tatau ona faatinoina i le tamaitiiti lea ua fanau mai? O le a iloiloina i se mataupu o lumanai nei fesili.

[Ata i le itulau 27]

E toʻatele talavou ua faasesēina i le talitonuga faapea e leai ni āuga o le faia o feusuaʻiga