Pe o Saogalemu Lou Fale?​—20 Mea E Ao Ona Siaki

“FAAFETAI ua ta taunuu mai le fale!” Atonu e te mapuea i le lagona o le toʻafilēmū pe a toe foʻi mai i le fale mai se aso pisi i galuega, fiafia i le saogalemu ma malupuipuia i le fale. Ae pe o e saogalemu moni ea? O le mea e faateʻia ai, e fesagaʻi nisi tagata ma lamatiaga mataʻutia i o latou fale atonu latou te lē o nofouta i ai. Ae maise lava i latou e iai fanauiti, e tatau ona manatunatu loloto ma le faaeteete ina ia faaitiitia ai le numera o faalavelave e tutupu i le fale. I le faaaogāina o le lisi o mulimuli mai, aiseā e lē faia ai se sāʻiliʻiliga i lou fale ma mātau ni suiga e manaʻomia ona fai?

 ✔ Lāʻau totō. Afai e iai sau fanau laiti, ia faamautinoa e leai se tasi o ou lāʻau totō e oona. Manatua, o tamaiti laiti e suʻesuʻe vale ma toetoe lava o mea uma latou te tuuina i o latou gutu.

✔ Ie faamalama. Tuu manoa e tatoso ai ie faamalama i se mea e lē āu i ai tamaiti. E mafai e na mea ona lavelavea ai—ma tasele ai foʻi ua—o tamaiti laiti.

✔ Pusa toso ma kapoti. Fuafua e faapipii ni loka e loka ai faitotoʻa. O lenei mea o le a taofia ai tamaiti mai le fetagofi i meafaigaluega maamaai ma vailaau oona e faaaogā e fufulu ai mea.

✔ Fasitepu. Po ua lelei ona molī ma leai ni mea o paepae solo ai? Po ua e faatūina ni ona pā ina ia taofia ai tamaiti laiti mai le paʻūū ifo?

✔ Ogaumu. Ia faaū ʻau o ulo ma falai i tua o le ogaumu, aemaise lava pe afai o loo fai se kuka.

✔ Uʻamea e tunu ai meaʻai. Ia fai ma masani le fufuluina. E mafai ona tupu se mu i le umukuka pe afai e tumu le apa e tunu ai meaʻai i le gaʻo e lē sasaaina.

✔ Fagu fuimū. E tatau lava ona iai se fagu se tasi i le fale, ma ia faamautinoa e iloa uma e i latou e mafai ona tuu i ai le vaavaaiga ona faaaogā lena fagu.

✔ Moega pepe. E tatau ona pipii faatasi lāʻau o le pa. O le avanoa i le va o le faamalū ma le pa puipui e lē tatau ona telē naʻuā neʻi teʻi ua mau ai le ulu o le pepe.

✔ Faamalama. O ni pa mo le saogalemu o le a puipuia ai le tamaitiiti mai le paʻū ma e faigofie foʻi ona aveesea e se tagata matua pe a tupu se mu.

✔ Vaitamini ma vailaau faafōmaʻi. Ia teu nei mea i se pusatū e iai ni ona pusa toso e loka lelei pe i se nofoaga e lē mafai ona sao i ai tamaiti.

✔ Tapu taʻele. Aua le tuʻua na o se tamaitiiti laʻitiiti i le tapu. E puupuu lava le taimi—ma o sina tamaʻi vai—e mafai ona malemo ai se tamaitiiti.

✔ Microwave. Manatua e vave lava ona vevela meaʻai i le microwave. Mo se faataʻitaʻiga o le susu ua uma ona palu a le pepe, e mafai ona matuā vevela e ui lava o la e māfanafana le fagu.

✔ Masini faamāfanafana. Ia fai ma siaki lau masini mo le faamāfanafanaina o le fale i lea vaitaimi ma lea vaitaimi e vaʻai po o liki le carbon monoxide.

✔ Uʻamea fai papikiū. Ia faamautinoa o loo iai tamaiti i se vaipanoa e saogalemu ai mai uʻamea fai papikiū pe a vevela.

✔ Faitotoʻa o le fale taavale. Faatonu tamaiti ia aua neʻi ui se isi i lalo o le faitotoʻa o le fale taavale a o faaaogā, ae maise lava pe afai e alu i le eletise.

✔ Faailoilo mo mu. Ia tausi pea i se tulaga mamā, ma siaki e lē aunoa. Sui maa i tausaga taʻitasi.

✔ Uaea toso ma palaka eletise. Tiaʻi uaea toso ua motumotu. E sili ona lelei pe afai e fai ni ufiufi o palaka eletise e lē o faaaogāina po o ni insert.

✔ Masini e alu i le eletise. Faamamao ese masini mai le tapu taʻele po o le sink. O le faaaogāina o le ituʻāiga o peleika e taʻua o le ground fault circuit interrupter e mafai ona puipuia ai mai le sipaka i le eletise.

✔ Pusa meataalo. Fai ni pu e alu ai le ea ma ni faamau (hinges) mo le pusa meataalo ina ia mafai ona ʻalofia ai le paʻū faafuaseʻi ifo o le tāpuni.

✔ Auli. Faamamao lau auli—e aofia ai ma lona uaea mai le fetagofi i ai o tamaiti.