PE AFAI o loo e popole pe fefe i le tele o tala i mea leaga o loo tutupu, e lē na o oe la o loo iai na lagona. I le 2014, a o avea Barack Obama ma peresitene o le Iunaite Setete, na ia faapea mai ai ona o le tele o mea leaga o loo lipotia mai i faasalalauga, ua manatu ai le toʻatele “e lē toe foʻi le lalolagi . . . i se lelei ma e leai se mea e mafai ona toe fai i ai.”

Peitaʻi, e leʻi umi talu ona ia faia lenā faamatalaga, ae ia faapea mai ma le mautinoa e iai auala e mafai ona foʻia ai le tele o faafitauli o loo tutupu i le lalolagi. Na ia taʻua nisi o fuafuaga faataatitia a le malo e avea o ni “tala lelei,” ma na ia “matuā mautinoa” ma “faamoemoe ia taunuu.” I nisi faaupuga, na ia faapea mai e mafai e taumafaiga a tagata e lelei faanaunauga, ona faaleleia le tulaga o le lalolagi ma taofia le oo mai o se mala mataʻutia.

E toʻatele e ioe i lona manatu. O se faataʻitaʻiga, ua tuu atu le faatuatuaga o isi i le faasaienisi ma le manatu o le a faaleleia le tulaga o le lalolagi ona o suiga televavave faatekinolosi. Na valoia ma le mautinoa e se tagata atamai i faiga faatekinolosi faaonapōnei, e oo atu i le 2030 “o le a afe taimi e sili atu ai le maoaʻe o faiga faatekinolosi, ma e oo atu i le 2045, o le a faitau miliona taimi e sili atu ai.” Na ia toe faapea mai: “O lea e sologa lelei le tulaga o mea. E ui i le tele o faafitauli o loo tatou fesagaʻia, ae e mafai ona taulima i o tatou lava tomai.”

O le ā le tele ua oo i ai le leaga o le tulaga o le lalolagi? Pe e moni ua lata ina tatou aafia i se mala e sili ona mataʻutia? E ui lava o loo faailoa mai e saienitisi ma tagata faipolotiki se faamoemoe, ae o le toʻatele e lē o mautinoa e faatatau i le lumanaʻi. Aiseā?

AUUPEGA E FASIOTIA AI TAGATA. E ui lava i taumafaiga a Malo Aufaatasi ma isi faalapotopotoga, ae e lē o mafai ona latou aveesea atoatoa meatau faaniukilia. E aamu taʻitaʻi faamaualuluga i tulafono ua faia mo le faaitiitia o auupega. Ua matuā naunau atunuu ua tele tausaga o faaaogāina auupega faaniukilia, e toe faafou a latou pomu ua leva ona iai ma toe fau nisi pomu e sili atu ona malolosi. Ua mafai nei e atunuu e leʻi iai muamua ni a latou auupega malolosi, ona fasiotia le toʻatele o tagata.

O le sauniuni o atunuu mo se taua faaniukilia, ua lē toe avea ai le lalolagi o se nofoaga saogalemu, e oo lava i taimi e “filemu” ai. Ua lapataʻi mai le Bulletin of the Atomic Scientists: “Ua avea meatau ua faapolokalameina ina ia ʻfasiotia’ ai tagata, e aunoa ma se manatu po o se taʻitaʻiga faaletagata, ma itu e matuā faapopoleina ai.”

LĒ LELEI LE SOIFUA MĀLŌLŌINA. E iai lava le mea e gata mai ai le atamai faasaienisi i le faamautinoa e tatou te maua le soifua mālōlōina lelei. O le toto maualuga, tino puta, faapolusioneina o le ʻea, ma le faaaogāina o vailaau ma fualaau faasāina, o nisi na o mea ua faatuputeleina ai faamaʻi. O le toʻatele ua maliliu i le tele o faamaʻi lē pipisi e pei o le kanesa, maʻi o le fatu ma māmā, ma le maʻi suka. E toʻatele tagata ua aafia i isi maʻi ia e faigatā ai ona latou gaoioi, e aofia ai le maʻi o le mafaufau. I tausaga talu ai nei, na vaaia ai foʻi le pepesi o faamaʻi pipisi mataʻutia e leʻi faatalitalia e pei o le Ebola ma le Zika. O le manatu autū: E lē mafai e tagata ona taofia maʻi ma e foliga mai ua leai se vaifofō.

FAALEAGA E TAGATA LE SIʻOSIʻOMAGA. O loo faaauau ona faapolusioneina e falegaosimea le ʻea. E faitau miliona tagata e feoti i tausaga taʻitasi mai i le mānavaina o le ʻea ua faaleagaina.

O loo faaauau ona lafo e tagata taʻitoʻatasi, vaega o tagata, ma ofisa o le malo, mea e faaleagaina ai le sami e pei o otaotavale, vailaau oona ma mea sa faaaogā i falemaʻi ma falegaosi oloa, o una, ma isi mea oona. Ua taʻua i le Encyclopedia of Marine Science, “O nei lapisi ma vailaau oona ua faaleagaina ai meaola ma laau i le sami, ma ua onanā ai tagata e taumafaina na meaola ma laau.”

Ua utiuti foʻi le suāvai o loo maua. Ua lapataʻi mai se tusitala faasaienisi mai i Peretania o Robin Mckie: “O loo feagai le lalolagi atoa ma le faafitauli o le utiuti o le suāvai.” Ua taʻutino mai e le ʻaufaipolotiki e māfua ona utiuti le suāvai ona o tagata, ma o se tulaga e sili ona leaga.

MALA FAALENATURA. E aofia ai matagi, afā, asiosio, ma mafuiʻe lea e faapogaia ai le tetele o lologa, o eleele solo ma isi mala. O le toʻatele o tagata ua maliliu pe matuā faamanuʻalia ona o nei mala faalenatura. Ua faailoa mai i se suʻesuʻega na lomia e le U.S. National Aeronautics and Space Administration, e mautinoa “o le a iai ni matagi e sili atu ona malolosi, o taimi e matuā ova ai le vevela, ma vaitau o lologa ma lāmala e sili ona leaga.” Po o le a faatamaʻia e mala faalenatura tagata?

 E mautinoa o loo e mafaufau i nisi tulaga e sili atu ona leaga e aafia ai o tatou ola. Peitaʻi, e lē mafai ona tatou maua ni tali faamalieloto e faatatau i le lumanaʻi, e ala i le iloilo o mea leaga o loo tutupu i aso nei. E tusa foʻi pe tatou te faalogo i le ʻaufaipolotiki ma saienitisi, e lē maua ai lava ni tali faamalieloto. Ae e pei ona taʻua i le mataupu na muamua atu, ua maua e le toʻatele ni tali faamalieloto i fesili e faatatau i le tulaga o le lalolagi ma le lumanaʻi. O fea e maua ai na tali?