MO MĀTUA
8: Faaaʻoaʻoga Lelei
LE UIGA O LE AVEA MA FAAAʻOAʻOGA LELEI
O mātua e latou te faataatitia ni faaaʻoaʻoga lelei, e latou te ola e tusa ai ma mea o loo aʻoaʻo atu. O se faataʻitaʻiga, e lē mafai ona e faatalitalia o le a tautala saʻo lau tama pe a ia faalogo o loo e fai atu “Fai i ai ou te lē o i le fale,” pe afai e te lē o fia talanoa i se tagata o loo i le faitotoʻa.
“E iai se faaupuga masani e faapea, ʻFai le mea lea ou te fai atu ai, ae aua le faia le mea lea ou te faia.’ E lē saʻo lenā faaupuga pe a tuu atu i tamaiti. E pei i latou o ni omomi e latou te mātauina a tatou faamatalaga ma gaoioiga, ma e latou te faailoa mai foʻi pe afai e lē ōgatusa a tatou faaaʻoaʻoga ma mea o loo tatou aʻoaʻoina ai i latou.”—David.
MATAUPU SILISILI FAALE-TUSI PAIA: “O oe o lē e talaʻi atu “Aua le gaoi,” pe e te gaoi ea?”—Roma 2:21.
LE TĀUA O FAAAʻOAʻOGA LELEI
E sili atu ona telē le taaʻiga a mātua i fanau nai lo o se isi lava tagata, e aofia ai ma a latou aumea. O lona uiga, o loo e iai i se tulaga sili e taʻitaʻia lau fanau i le ala saʻo e tatau ona uia, pe afai e ōgatusa au gaoioiga ma au upu.
“E mafai ona tatou fai atu soo i se mea i fanau ma mafaufau po o faalogo mai, ae o le taimi lava tatou te lē faia ai mea o loo tatou fai atu ai, e latou te faailoa mai. E mātau e fanau mea uma tatou te faia e tusa pe tatou te manatu e latou te lē o faia faapea.”—Nicole.
MATAUPU SILISILI FAALE-TUSI PAIA: “O le atamai mai i lugā . . . e lē faatagāfai.”—Iakopo 3:17.
MEA E MAFAI ONA E FAIA
Iloilo au tapulaa. O ā ituaiga o faafiafiaga e te matamata i ai? O le ā le auala e te feagai ai ma lau paaga ma lau fanau? O ai au uō? Pe e te manatu mamafa i isi? I se aotelega, po o avea oe ma ituaiga o tagata o loo e manaʻo e faaaʻoaʻo i ai lau fanau?
“E ma te lē taumafai ma loʻu toʻalua e uunaʻia le ma fanau e mulimuli i tapulaa e ma te lē o ola ai.”—Christine.
Ia faatoese atu mo au mea sesē. Ua iloa e fanau e te lē lelei atoatoa. O le fai atu la o se faaupuga e pei o le “Ou te faamalie atu” i lau paaga ma lau fanau pe a e faia se mea sesē, o le a e avatu ai se lesona tāua o le faamaoni ma le lotomaulalo.
“Pe a tatou sesē e manaʻomia ona faalogo mai fanau ua tatou taʻutino atu o i tatou na sesē ma faatoese atu. Pe a lē faia faapea, o le a latou lē faailoa mai foʻi a latou mea sesē na fai.”—Robin.
“O mātua o taaʻiga sili lea i fanau, ma o le meafaigaluega pito sili ua tatou maua o ā tatou faaaʻoaʻoga lelei, ona e mafai ona vaai i ai fanau i taimi uma. E tai pei o loo aʻoaʻoina le fanau i taimi uma i le auala o loo tatou ola ai.”—Wendell.
E te Ono Fiafia Foʻi
LE OLOMATAMATA
A‘oa‘o Fanau ia Iloa o Latou Tiutefai
LE OLOMATAMATA
E Faapefea Ona Avea se Tasi ma se Matua Lelei?
E faapefea ona e tausia aʻe lau fanau ia maufaatuatuaina?
