E UI e masalosalo le toʻatele e lē fesootaʻi atu ata i faiga faataulāitu ma faiga faaagaga, ma manatu i ai e lē moni pe e iloa ai le popoto o tagata na faia le ata, peitaʻi e ese le manatu o le Tusi Paia. Ua aumaia ai lapataʻiga tuusaʻo e faatatau i faiga faaagaga. O se faataʻitaʻiga, o loo taʻua i le Teuteronome 18:10-13: “Aua neʻi maua iā te oe . . . sē e faia valovaloga faataulāitu, o sē e faia faiga faaagaga, po o se tasi e saʻili i ni faailoilo o mea o le a tutupu po o se faataulāitu, po o se tasi e na te faalauatau i isi, po o se tasi e alu atu i sē e saʻili i agaga, po o lē e vavalo i mea e tutupu i le lumanaʻi, po o se tasi e fesili atu i ē ua oti.” Aiseā? Ua taʻua atili i le mau: “E inosia e Ieova i latou uma e faia na mea . . . Ia lē ponā lau amio iā Ieova lou Atua.”

Aiseā ua matuā taʻusalaina ai e le Tusi Paia so o se ituaiga o faiga faaagaga?

Ua taʻua i le Tusi Paia, a o leʻi faia e le Atua le lalolagi na ia foafoaina le faitau miliona o foafoaga agaga po o agelu. (Iopu 38:4, 7; Faaaliga 5:11) Na tuuina i nei agelu taʻitasi le saʻolotoga e filifili ai, po o le tomai e filifili ai le mea lelei mai i le mea leaga. Na filifili nisi o na agelu e fouvale i le Atua, ma na latou tuua o latou tulaga i le lagi ina ia faatupuina ai vevesi i le lalolagi. O le iʻuga, na “tumu le lalolagi i faiga sauā.”—Kenese 6:2-5, 11; Iuta 6.

Ua faamatalaina i le Tusi Paia, na telē se aafiaga o na agelu leaga i le lalolagi ma na faasesēina ai le faitau miliona o tagata. (Faaaliga 12:9) Na faaaogā foʻi e na agelu leaga le faanaunauga masani o tagata o le fia iloa e faatatau i le  lumanaʻi, e taʻitaʻisesēina ai i latou.—1 Samuelu 28:5, 7; 1 Timoteo 4:1.

E moni e iai nisi faiga faataulāitu e foliga mai e fesoasoani i tagata. (2 Korinito 11:14) Peitaʻi, o loo taumafai agelu leaga e faatauaso manatu o tagata i le aʻoaʻoga moni e faatatau i le Atua.—2 Korinito 4:4.

O lea, pe a fua i le faamatalaga a le Tusi Paia, e leaga le fesootaʻi ma agaga leaga. O le māfuaaga lea ina ua aʻoaʻoina nisi na ono avea ma soo o Iesu i le mea moni e faatatau i agaga leaga, “o ē na faia faiga faaagaga, ua faaputuputu faatasi a latou tusi, ma susunu ai i le afi” e ui lava i le tele o tupe na faaalu ai.—Galuega 19:19.

I se tulaga talitutusa, ua filifili le toʻatele i aso nei e lē faia sa latou vaega i so o se mea ma faafiafiaga e fesootaʻi i faiga faaagaga. O se faataʻitaʻiga, ina ua sefulu lua tausaga o Maria, * e foliga mai sa mafai ona ia vavalo ni mea patino o le a tutupu i le lumanaʻi po o ni tulaga e lamatia ai. Na ia faaaogāina se ituaiga o pelē e iloa ai mea o le a tutupu i tamaiti na latou aʻoʻoga faatasi, ma talu ai na taunuu mea na ia vavalo, na atili ai ona ia fiafia i faiga faataulāitu.

Na manatu Maria sa ia maua se meaalofa mai i le Atua lea na mafai ai ona ia fesoasoani i tagata. Peitaʻi na taʻutino mai o ia, “e iai se mea na ou tuufesili ai. Pe a ou faaaogāina le pelē, e na o mea e tutupu i isi e mafai ona ou iloa. Ae e leʻi mafai ona ou iloa ai le mea o le a tupu iā te aʻu, e ui lava o le mea lenā sa ou manaʻo i ai.”

O le lē mautonu o Maria i le tele o fesili e leʻi mafai ona taliina, na ia tatalo ai i le Atua ma  na mulimuli ane feiloaʻi ma Molimau a Ieova, ma amata ai loa ona ia suʻesuʻeina le Tusi Paia. Na ia aʻoaʻoina mai i le Tusi Paia o lona tomai e iloa ai mea o le a tutupu i le lumanaʻi, e lē mai i le Atua. Na ia aʻoaʻoina ai foʻi o i latou e mananaʻo e iai se faauōga ma le Atua, e tatau ona faatamaʻia so o se mea e fesootaʻi atu i faiga faaagaga. (1 Korinito 10:21) O le ā le iʻuga? Na lafoaʻi e Maria mea uma sa iā te ia ma tusi e fesootaʻi atu i faiga faataulāitu. O le taimi lenei, ua ia faailoa atu i isi aʻoaʻoga moni ua ia aʻoaʻoina mai i le Tusi Paia.

A o talavou Michael, sa fiafia tele o ia e faitau i tala e faatatau i tagata e lē moni e iai ni mana uigaese. Na ia faamatalaina, na fiafia e faitau ma faaāta o ia o se tasi o na ituaiga o tagata, ia e latou te tupulaga faatasi. Na iʻu ina fai ma masani a Michael le faitau i tusi e iai faiga faataulāitu ma faiga faatemoni. Ua ia taʻutino mai, “o loʻu fia iloa na ou manaʻo ai e faitau tusi ma matamata i ata na faaalia ai na faiga.”

Peitaʻi o le suʻesuʻeina e Michael o le Tusi Paia, na ia matuā manino ai i le manaʻomia ona ia iloilo totoʻa mea na ia faitauina. Ua ia faapea mai, “na ou tusia se lisi o mea uma sa iai se fesootaʻiga ma faiga faaagaga ma lafoaʻi na mea. Na ou aʻoaʻoina ai se lesona tāua. Ua faapea mai le 1 Korinito 10:31 ʻia faia mea uma lava ina ia faamamaluina ai le Atua.’ O lea, ou te fesili ifo ai, ʻPo o loʻu faitauina o lenei tusi e feteenaʻi ma le faamamaluina o le Atua?’ Pe afai o le tulaga lenā, ou te ʻalofia lenā mea.”

Ua talafeagai ona faamatalaina le Tusi Paia o se sulu. O se puna o le malamalama moni lea e faaalialia ai le matuā sesē o faiga faaagaga. (Salamo 119:105) Ae e sili atu i lenā, ua faailoa mai i le Tusi Paia se folafolaga matagofie o se lalolagi e lē toe iai ni agaga leaga. O le a telē se aafiaga i tagata. O se faataʻitaʻiga, ua faapea mai le Salamo 37:10, 11: “Ua toeitiiti lava ona lē toe iai lea o le tagata amioleaga; e te mafaufau foʻi i le mea sa iai o ia, a ua leai lava. A o ē e agamalu, e fai mo i latou le lalolagi, e matuā faafiafiaina foʻi i latou ona o le tele o le filemu.”