I LE Aso Toonaʻi, Aperila 25 2015, na lūlū ai se mafuiʻe e 7.8 lona malosi i Nepale, o se atunuu maugā i le itu i mātū o Initia. Na lūlū le mafuiʻe i le pe tusa ma le 50 maila (80 km) i mātū i sisifo o Kathmandu le laumua o Nepale. E faanoanoa ona e silia ma le 8,500 tagata na maliliu ai, ma o le mala faalenatura sili lea ona leaga ua faamauina i Nepale. E silia i le ʻafa miliona fale na faaleagaina. E 2,200 Molimau a Ieova i Nepale, ma o le toʻatele sa nonofo i le vaipanoa na aafia. Peitaʻi e toʻatasi se tinā Molimau a Ieova na maliu ai ma lana fanau e toʻalua.

Na faapea mai se Molimau a Ieova e igoa iā Michelle: “Na lūlū le mafuiʻe a o faia sauniga faa-Kerisiano a faapotopotoga sa iai i le vaipanoa na sili ona aafia. Pe ana faapea na lūlū le mafuiʻe a o iai le toʻatele i o latou fale, e mautinoa e tele ola e maumau ai.” Aiseā na faasaoina ai i latou na auai i sauniga? O se tasi o māfuaaga autū o le auala na fausia ai Maota mo Sauniga.

O Maota mo Sauniga fou i Nepale, ua fausia ina ia tatalia le malosi o se mafuiʻe. Na taʻua e Man Bahadur o se tasi e aofia i le fausiaina o Maota mo Sauniga: “E masani ona fesiligia i matou i le māfuaaga e malolosi ai faavae o nei fausaga lāiti. Ae o lea ua matou iloa nei le aogā!” Ina ua uma le mafuiʻe, na maua le faatagaga mai i uso na vaaia le galuega a Molimau a Ieova i Nepale, e faaaogā ai Maota mo Sauniga e avea o ni nofoaga e sulufaʻi ai. E ui lava i tamaʻi mafuiʻe na lūlū mulimuli ane, ae na lagona e Molimau a Ieova ma o latou tuaoi le malupuipuia i inā.

Na vave ona saʻili e toeaina Kerisiano sui o faapotopotoga e leʻi iloa po o le ā ua tupu iā i latou. Na faapea mai se Molimau a Ieova e igoa iā Babita: “Na faamuamua e toeaina manaʻoga o le faapotopotoga, nai lo o lo latou lava lelei. Na pāʻia o matou loto i lenā faaaliga o le alofa.” I le aso na sosoo ai ina ua uma le mafuiʻe, na amata ai ona asiasi atu i faapotopotoga sui e toʻatolu o le komiti na vaavaaia le galuega a Molimau a Ieova i Nepale, faapea uso femalagaaʻi po o ovasia matagaluega ina ia iloa po o ā mea o manaʻomia, ma fesoasoani i toeaina o na faapotopotoga.

I le ono aso talu ona uma le mafuiʻe, na asiasi mai ai i Nepale ia Gary Breaux mai i le ofisa ulu o Molimau a Ieova i le Iunaite Setete, faatasi ai ma lana avā o Ruby. Na faamatalaina e Reuben o se sui o le komiti sa taʻua muamua: “O le lē mautonu i Kathmandu faapea tamaʻi mafuiʻe na lūlū mulimuli ane, na matou lē mautinoa ai pe oo na sau le uso o Breaux. Ae na maumauaʻi pea o ia ina ia faataunuu lana malaga, ma o le mea lenā na tupu. Na matuā talisapaia e Molimau a Ieova i inei lana asiasiga.”

Na faapea mai Silas, lea e galue i le ofisa o Molimau a Ieova i Nepale: “O le taimi lava na toe lelei ai laina telefoni, e leʻi toe mālōlō le tatagi o telefoni. Na manatu mamafa mai iā i matou Molimau a Ieova i isi vaipanoa o le lalolagi. E ui lava sa tautatala nisi o i latou i gagana e matou te lē malamalama ai, ae na matou lagona lo latou alofa mo i matou, faapea lo latou naunau e fesoasoani mai.”

 Mo ni nai aso talu ona uma le mafuiʻe, na aumai ai e Molimau a Ieova i lea vaipanoa meaʻai i Maota mo Sauniga e tufa atu iā i latou o loo manaʻomia. Na faia foʻi se Komiti o Fesoasoani mo Mala, ma e leʻi umi ae maua fesoasoani aemaise mai i Bangladesh, Initia, ma Iapani. I ni nai aso ae taunuu mai se vaega o Molimau a Ieova mai Europa mo fesoasoani faafomaʻi, ma faaaogā se tasi o Maota mo Sauniga e faia ai la latou auaunaga. Na vave lava ona amata la latou galuega, e lē gata i le siakiina o le malosi faaletino o ē na aafia i le mafuiʻe, ae fesoasoani foʻi iā i latou e taulima faalogona mafatia.

Na faaleo mai e se fafine e igoa iā Uttara faalogona o le toʻatele e faapea: “E mataʻutia le mafuiʻe ma na lagona ai le fefe. Ae ina ua uma le mafuiʻe, na atili ai ona vavalalata lo matou aiga faaleagaga nai lo o le taimi muamua.” O le mea moni, e leʻi faavaivaia e le mafuiʻe le alofa o tagata o Ieova mo ia faapea ma isi. Nai lo o lea, na faamalosia ai lenā alofa.