I tausaga taʻitasi, e faitau miliona tagata e maliliu ona o aafiaga o le faaaogā o fualaau faasāina. Na matuā faateteleina lenei faafitauli i le taimi o le Koviti-19. Peitaʻi, ua fesoasoani fautuaga atamai o loo i le Tusi Paia i le toʻatele e manumalo ai i lenā faafitauli. Pe afai o loo e tauivi ma lenā faafitauli, o le a fesoasoani foʻi nei fautuaga atamai iā te oe. a

I lenei mataupu

•  Aiseā e saʻili ai i le Tusi Paia mo ni fautuaga i le auala e tuu ai lea masaniga?

•  Auala e fā o loo i le Tusi Paia ina ia tuu ai lea masaniga

•  O mau o le Tusi Paia e fesoasoani iā te oe e tuu ai lea masaniga

•  O isi tala o mea moni na tutupu: Le fesoasoani a le Tusi Paia ina ia manumalo ai mai i lea masaniga

•  Pe e faasā i le Tusi Paia ona togafitia i latou e pulea e fualaau faasāina?

•  Pe e faasā i le Tusi Paia le faaaogā o so o se fualaau e togafitia ai se maʻi?

 Ua iloa e tagata suʻesuʻe, e iai le fesootaʻiga o le pulea e fualaau faasāina ma faalogona o le tuua toʻatasi, lotomafatia, popolevale, ma le lotovaivai. E mafai ona fesoasoani le Tusi Paia iā te oe e atiaʻe le faatuatua, ina ia manumalo ai i na faalogona. Ua faailoa mai ai foʻi, pe faapefea ona e maua se faiā vavalalata ma le Atua. (Salamo 25:14) O le fesoasoani a le Atua, e mafai ai ona e manumalo i faafitauli e foliga mai e faigatā ona foʻia na o oe.—Mareko 11:22-24.

1.  1. Ia iloa Ieova le Atua. b (Ioane 17:3) O ia o Lē na foafoaina mea ma o le Puna o le mana e lē gata mai. E sili atu i lenā, o ia o lou Tamā alofa i le lagi. E finagalo o ia ina ia iai sa oulua faiā vavalalata, ma ia faaaogā lona mana e fesoasoani mai ai iā te oe. (Isaia 40:29-31; Iakopo 4:8) Ua ia folafola mai se lumanaʻi matagofie mo oe, pe a e filifili e tofo i aogā o lona alofa.—Ieremia 29:11; Ioane 3:16.

2.  2. Ia talosaga iā Ieova mo lana fesoasoani. Ia tatalo i le Atua e fesoasoani mai iā te oe, ina ia manumalo mai i le faaaogāina o fualaau faasāina, ma mafai ai ona “e paia [pe mamā]” ma “mālie [iā te ia].” (Roma 12:1) E ala i lona agaga paia po o lona mana galue, o le a ia foaʻi mai iā te oe “le mana lea e sili atu i le malosi o tagata.” (2 Korinito 4:7; Luka 11:13) O le a fesoasoani lenā mana iā te oe e taofia ai lou faaaogāina o fualaau faasāina, ma atiaʻe ai “le tagata fou” lea e ōgatusa ma le finagalo o le Atua.—Kolose 3:9, 10.

3.  3. Ia faatumu lou mafaufau i manatu o le Atua. (Isaia 55:9) O le a ia fesoasoani iā te oe e “faafouina le malosi e pulea ai [lou] mafaufau,” po o le suia o le auala e te mafaufau ai, lea e mafai ai ona e manumalo mai i le faaaogā o fualaau faasāina. (Efeso 4:23) O loo iai i le Tusi Paia manatu o le Atua, o lea, e tāua ai ona faitau e lē aunoa. (Salamo 1:1-3) E toʻatele ua maua aogā mai i le aʻoaʻoina e faatatau i le Tusi Paia. (Galuega 8:30, 31) E faia e Molimau a Ieova ni talanoaga faale-Tusi Paia e aunoa ma se totogi. E matou te valaaulia foʻi oe e auai i a matou sauniga, lea e talanoaina ai aʻoaʻoga o loo i le Tusi Paia, ma le auala e faatatauina ai i o tatou olaga.

4.  4. Ia filifili ni uō lelei. E mafai ona iai ni aafiaga lelei po o ni aafiaga leaga o au uō iā te oe, a o e taumafai malosi e tetee atu i fualaau faasāina. (Faataoto 13:20) E tatou te maua ni uō lelei mai i ē e tapuaʻi i le Atua, ma e finagalo o ia ina ia e tofo i aogā o le faauō atu iā i latou na. (Salamo 119:63; Roma 1:12) Ia filifili lelei foʻi au faafiafiaga, auā o lou matamata, faalogologo, ma faitau e faatatau i tagata o loo iai i na faafiafiaga, ua pei ai lava o loo e faifaimea faatasi ma i latou. Ia ʻalofia so o se mea e ono faafaigatā ai ona e faia le mea saʻo.—Salamo 101:3; Amosa 5:14.

 Filipi 4:13: “O mea uma lava, ua ou maua le malosi mai iā te ia o lē na foaʻi maia iā te aʻu le mana.”

 “Na ou iloa e lē mafai ona ou taofia le faaaogāina o fualaau faasāina i soʻu lava malosi. O lea na ou tatalo ai i le Atua e fesoasoani mai iā te aʻu. Na ia foaʻi mai le malosi na ou manaʻomia.”—Patrizia, mai i Italia.

 Na ola aʻe Joseph Ehrenbogen i se siʻomaga leaga, ma na pulea lona olaga i le ʻava malosi, tapaa, mariuana, ma fualaau faasāina. E tele taimi na toetoe lava oti ai, ona o le soona faaaogāina o na mea. E tasi se mau mai i le Tusi Paia na faatalitonuina ai o ia, e mafai ona suia lona olaga. Ia faitau i lona talaaga i le mataupu “Sa Aʻoaʻoina Aʻu ia Faaaloalo i Fafine Faapea Aʻu.”

 E tele taimi e leʻi taulau ai Dmitry Korshunov e tuua lana masaniga o le inu ʻava malosi. Ina ia iloa pe na faapefea ona ia manumalo mai i lenā masaniga, maimoa i le vitiō ʻOu te Leʻi Fiafia i Loʻu Olaga.’

 E leai. Ua faapea mai le Tusi Paia: “E lē manaʻomia e tagata malolosi se fomaʻi, ae na o ē mamaʻi.” (Mataio 9:12) Na taʻua foʻi e le U.S. National Institute on Drug Abuse: “O le puleaina e fualaau faasāina o se faamaʻi e faigatā ona malamalama i ai, ma ina ia mafai ona tuu, e tele atu mea e aofia ai nai lo o le tau ina iai o se faanaunauga e tuu lea masaniga.” O le mea moni, e saunia e le Atua le fesoasoani lea e sili atu nai lo o le faanaunauga o loo iai i se tagata. Peitaʻi, e ui lava ua tuua e le toʻatele lea masaniga ona o le usitaʻia o taʻiala a le Tusi Paia, ae e latou te manaʻomia pea le fesoasoani e ala i togafitiga faafomaʻi. c O se faataʻitaʻiga, ua faapea mai Allen: “A o ou taumafai e tuu laʻu inu na ou lagona le tigā tele o loʻu tino, ma o i inā na ou iloa ai ua ou manaʻomia se fesoasoani a fomaʻi e faaopoopo i le fesoasoani faaleagaga lea ua ou maua.”

 E leai. O le mea moni, o loo faamatalaina i le Tusi Paia le faaaogā o le ʻava malosi e togafitia ai se maʻi, pe tuuitiitia ai tigā o se tasi o le a maliu. (Faataoto 31:6; 1 Timoteo 5:23) Ae e pei lava ona puleaina se tasi e le ʻava malosi pe a faaaogāsesē, e faapena foʻi ona puleaina se tasi e fualaau mo mea tigā pe a faaaogāsesē. O lea, o se mea atamai le iloilo o lamatiaga e ono tulaʻi mai, ma ia matuā faaeteete i le auala e faaaogā ai fualaau mo mea tigā.—Faataoto 22:3.