E leai. E lē o taʻua i le Tusi Paia le upu “pulekatolio,” e lē o aʻoaʻoina ai foʻi e faamamāina tagata ua maliliu i le pulekatolio. a Seʻi mātau le aʻoaʻoga a le Tusi Paia e faatatau i le agasala ma le oti, ma pe faapefea ona feteenaʻi na aʻoaʻoga ma le aʻoaʻoga o le pulekatolio.

•   O le faatuatua i le toto o Iesu e faamamāina ai le tagata mai i agasala ae e lē o le pulekatolio. Ua taʻua i le Tusi Paia, ʻe faamamāina i tatou mai i agasala uma i le toto o lona [Atua] Alo o Iesu,’ ma ua “ia [Iesu Keriso] faasaʻoloto i tatou mai i a tatou agasala e ala i lona lava toto.” (1 Ioane 1:7; Faaaliga 1:5) Na foaʻi mai e Iesu “lona ola e fai ma togiola e sui aʻi tagata e toʻatele,” ma totogi ai a latou agasala.​—Mataio 20:28.

•   E lē iloa e i latou ua maliliu se mea. “O ē ua ola ua latou iloa e oti i latou; a o ē ua oti, latou te lē iloa se mea.” (Failauga 9:5) E lē iloa e se tagata ua oti se mea, ma e lē mafai foʻi la ona faamamāina o ia i le afi i le pulekatolio.

•   E lē faasalaina se tagata i ana agasala pe a oti. Ua taʻua i le Tusi Paia “o le totogi o le agasala o le oti lea,” ma “o lē ua oti ua magalo o ia mai i lana agasala.” (Roma 6:​7, 23) O le oti o le totogi atoatoa lea o le agasala.