Leai, e lē faaumatiaina le lalolagi paneta, pe susunuina i le afi, pe suia. Ua aʻoaʻo mai i le Tusi Paia, na faia e le Atua le lalolagi ina ia nonofo ai tagata e faavavau.

•   “E fai lava le lalolagi mo ē e amiotonu, e nonofo ai pea i latou e oo i le faavavau.”—Salamo 37:29.

•   ʻUa faavaeina [e le Atua] le lalolagi i luga o ona faavae malolosi;e lē maluelue e faavavau, faavavau lava.’—Salamo 104:5.

•   “A o le lalolagi e tumau lea e faavavau.”—Failauga 1:4.

•   “O le Mataisau o Lē na faia le lalolagi, o Ia o Lē na faatumauina, na ia lē foafoaina fua ae na ia faia ina ia ʻainā.”—Isaia 45:18.

 O le a lē faatagaina e le Atua tagata e faaleagaina atoatoa le lalolagi, e ala i le faaleagaina o le ʻea ma le siʻosiʻomaga, taua po o se isi auala. Nai lo lea o le a ia ʻfaafanoina i latou o le a faaleagaina le laueleele.’ (Faaaliga 11:18) O le a faapefea ona ia faia lena mea?

 O le a suia e le Atua faigāmalo a tagata lea e lē o mafai ona latou puipuia le lalolagi, i se Malo lelei atoatoa e pule mai i le lagi. (Tanielu 2:44; Mataio 6:9, 10) O lena malo o le a pulea e le Alo o le Atua o Iesu Keriso. (Isaia 9:6, 7) A o iai Iesu i le lalolagi, na ia faaaogāina lona mana e pulea ai mea o le natura. (Mareko 4:35-41) I le avea ai o Iesu ma Tupu o le Malo o le Atua, o le a ia pulea atoatoa le lalolagi ma mea o iai. O le a ia toe faafouina mea uma o loo iai i le lalolagi, ma toe faafoʻisia le tulaga lelei atoatoa na iai i le faatoʻaga o Etena.—Mataio 19:28; Luka 23:43.

 E leai. O lena manatu sesē e māfua mai i le faauigasesē e tagata o le manatu o loo taʻua i le 2 Peteru 3:7 e faapea: “Ua tuu ai le lagi ma le lalolagi o loo iai i le taimi nei mo le afi.” Iloilo manatu tāua e lua e fesoasoani iā i tatou ina ia malamalama ai i na upu:

1.   E lē tasi se mea faasino atu ai e le Tusi Paia le upu “lagi”, “lalolagi,” ma le “afi.” Mo se faataʻitaʻiga, ua faapea mai le Kenese 11:1: “Sa tautatala le lalolagi uma i le gagana e tasi.” O loo faaaogā i lenei mau le upu “lalolagi” e faasino atu i le sosaiete o tagata.

2.   Ua faailoa mai i le siʻomaga o le 2 Peteru 3:7 le uiga o le lagi, lalolagi ma le afi. O loo talanoa le fuaiupu e 5 ma le 6 i le Lolo i aso o Noa. Na faaumatia i lena taimi le lalolagi ae tumau le lalolagi paneta. Na tafiesea e le Lolo le sosaiete o tagata leaga po o le “lalolagi.” (Kenese 6:11) Na faaumatia atu ai foʻi ma le ituaiga “lagi,” lea e faasino atu i tagata na pulea le lalolagi i lena taimi. O lea la, na faaumatia tagata amioleaga ae lē o le paneta. Na faasaoina Noa ma lona aiga mai le faaumatiaga o lena lalolagi o tagata, ma latou nonofo ai i le lalolagi paneta ina ua mavae le Lolo.—Kenese 8:15-18.

 E tutusa lelei le faaumatiaga po o le “afi” lea e taʻua i le 2 Peteru 3:7 ma le taimi o le Lolo. O le a aumaia ai le iʻuga mo tagata amio leaga, ae lē o le Lalolagi paneta. Ua folafola mai e le Atua le “lagi fou ma le lalolagi fou” lea o le a “mau ai le amiotonu.” (2 Peteru 3:13) O le “lalolagi fou” po o le sosaiete fou o tagata lea o le a pulea e le “lagi fou” po o le pulega fou o le Malo o le Atua. O le a avea le lalolagi ma parataiso filemu, ona o le pulega a lena Malo.—Faaaliga 21:1-4.