UIGA O MAU

Mataio 6:33—“Ia Outou Muai Saili le Malo o le Atua”

PLAY

“O lea, ia faaauau pea ona outou saʻili muamua le malo ma le amiotonu a le Atua, ona faaopoopoina ai lea o nei mea uma iā te outou.”—Mataio 6:33, Faaliliuga a le Lalolagi Fou.

“A ia outou muai saili le malo o le Atua ma lana amiotonu; ona faaopoopoina atu lea o ia mea uma ia te outou.”—Mataio 6:33, Tusi Paia Samoa—Lomiga 1884.

Uiga o le Mataio 6:33

O le Malo o le Atua o se faigāmalo i le lagi o le a faataunuuina le finagalo o le Atua i le lalolagi. (Mataio 6:9, 10) E muaʻi saʻili e se tasi le Malo e ala i le faamuamuaina o le Malo i lona olaga. a E aofia ai lona naunau e aʻoaʻoina mea e faatatau i le Malo o le Atua, ma faailoa atu i isi mea lelei o le a faia e le Malo. (Mataio 24:14) O lē e muaʻi saʻili i le Malo, e tatalo foʻi o ia ina ia oo mai lenā Malo.—Luka 11:2.

O le amiotonu a le Atua e aofia ana tapulaa mo amioga lelei ma amioga leaga. (Salamo 119:172) O lea, e saʻilia e se tasi le amiotonu a le Atua i lona usiusitaʻi lea i tulafono tauamio a le Atua, ia e aogā i taimi uma.—Isaia 48:17.

O le faaupuga faaopoopoina nei mea uma iā te outou, o se folafolaga a le Atua e na te tausia ē e faamuamua lona Malo ma ana tapulaa i o latou olaga.—Mataio 6:31, 32.

Siʻomaga o le Mataio 6:33

Na fetalai Iesu i lenei mau a o faia lana Lauga i luga o le Mauga o loo tusia i le Mataio mataupu e 5-7. E lē taumatea sa limavaivai le toʻatele o ē na faalogologo i le lauga a Iesu. Atonu na latou manatu sa tatau ona latou uaʻi atu i lo latou tausiga faaletino, ma lē maua ai so latou taimi e muaʻi saʻili ai le Malo. Ae na faalaeiau i latou e Iesu ia mātau le auala na tausia ai e le Atua Ana foafoaga e pei o laau ma manu. O le folafolaga foʻi lenā a le Atua mo tagata e muaʻi saʻili lona Malo.—Mataio 6:25-30.

Manatu Sesē e Faatatau i le Mataio 6:33

Manatu Sesē: O le a mauʻoa le tagata e muaʻi saʻili le Malo.

Mea Moni: Na fetalai Iesu o ē e faamuamua le Malo e maua mea e latou te manaʻomia e pei o meaʻai ma lavalava. (Mataio 6:25, 31, 32) Peitaʻi, e leʻi folafola mai e Iesu ni olaga tamaoaiga ma e leʻi fetalai foʻi Iesu e iloa le faamanuia a le Atua i le tele o ʻoa a se tasi. O le mea moni, na lapataʻia e Iesu ē na faalogologo i lana lauga e faatatau i le saʻilia o ʻoa, ma faafaigatā ai ona latou muaʻi saʻili le Malo. (Mataio 6:19, 20, 24) Na maelega le aposetolo o Paulo e faamuamua le Malo o le Atua, ae e iai taimi na lē lava ai lana faasoa. I le pei o Iesu, na ia lapataʻia isi e faatatau i lamatiaga o le fia mauʻoa.—Filipi 4:11, 12; 1 Timoteo 6:6-10.

Manatu Sesē: E lē manaʻomia ona galulue Kerisiano ina ia maua mea e ola ai.

Mea Moni: O loo fai mai le Tusi Paia e tatau i Kerisiano ona galulue ina ia tausia i latou ma o latou aiga. (1 Tesalonia 4:11, 12; 2 Tesalonia 3:10; 1 Timoteo 5:8) E leʻi fetalai Iesu e ao i ona soo ona saʻili na o le Malo, peitaʻi na fetalai o ia e ao i ona soo ona muaʻi saʻili le Malo.

O ē e muaʻi saʻili le Malo o le Atua ma naunau e galulue e tausia i latou, e mafai ona latou mautinoa o le a fesoasoani le Atua e saunia mea e ola ai.—1 Timoteo 6:17-19.

a O le faaupuga ʻia faaauau pea ona saʻili,’ ua faaliliuina mai i se veape Eleni e faaatagia ai se gaoioiga e faaauau pea ona fai. O lea, e ao i se tasi ona faamuamua pea le Malo nai lo o le faifai tuu.