“O mea uma lava, ua ou maua le malosi mai iā te ia o lē na foaʻi maia iā te aʻu le mana.”—Filipi 4:13, Faaliliuga a le Lalolagi Fou.

 “Ou te mafaia mea uma lava i le faamalosi mai o Keriso ia te au.”—Filipi 4:13, Tusi Paia Samoa—Lomiga 1884.

 O nei upu na tusia e le aposetolo o Paulo, ua faamautinoa mai ai o i latou uma o loo tapuaʻi i le Atua, o le a latou maua le mana e faataunuu ai Lona finagalo.

 O loo taʻua i nisi o faaliliuga o le Tusi Paia, o Keriso na foaʻiina atu iā Paulo le mana. Peitaʻi, e lē o iai le upu “Keriso” i manusikulipi tuai Eleni. O lea, o le tele o faaliliuga lata mai o loo faaaogā ai faaupuga e pei “o lē na foaʻi maia iā te aʻu le mana,” (Faaliliuga a le Lalolagi Fou), “o ia o lē e na te foaʻi maia le malosi” (New International Version), ma “o ia o le puna o loʻu malosi” (New American Bible). O ai la lea na mafaufau i ai Paulo?

 O le siʻomaga o le mau ua iloa ai na faasino atu Paulo i le Atua. (Filipi 4:6, 7, 10) Muamua atu i le tusi lava lenei a Paulo, na ia tusi atu i Kerisiano i Filipi: “O le Atua, o lē o loo galue i totonu iā te outou . . . ina ia outou lotomalilie ma galulue i ai.” (Filipi 2:13) I le 2 Korinito 4:7, na ia tusi ai o le Atua na foaʻi atu iā te ia le mana e faataunuu ai lana faiva. (Faatusatusa i le 2 Timoteo 1:8) O lea, e iai māfuaaga lelei e tatou te faapea atu ai na faasino atu Paulo i le Atua “o lē na foaʻi maia iā te aʻu le mana.”

 O le ā na uiga i ai Paulo ina ua ia tusi, o le a ia maua le malosi mo “mea uma lava”? Atonu na faasino atu Paulo i tulaga eseese na ia fesagaʻia a o ia faia le finagalo o le Atua. E tusa pe na tele pe itiiti ana meafaitino, ae na ia faalagolago i le Atua e tausia o ia. Na ia iloa e tatau ona ia maua le faamalieina e tusa po o le ā lona tulaga.—2 Korinito 11:23-27; Filipi 4:11.

 Ua aumaia i upu a Paulo se faamautinoaga mo tagata tapuaʻi o le Atua i aso nei. O le a foaʻi atu e le Atua iā i latou le malosi e latou te manaʻomia, e onosaʻia ai luʻi ma faia ai lona finagalo. O le a faamalosia e le Atua i latou e ala mai i lona agaga paia po o lona mana galue, o ona tagata tapuaʻi, ma lana Afioga le Tusi Paia.—Luka 11:13; Galuega 14:21, 22; Eperu 4:12.

 O nei upu o se vaega faaiʻu o le tusi a Paulo i Kerisiano i Filipi. Na ia tusia lenei tusi i le pe ā o le 60-61 T.A., i le taimi muamua na faafalepuipuiina ai o ia i Roma. Ae e iai se vaitaimi e lē o iloa tonu, e leʻi mafai ai e Kerisiano i Filipi ona lagolagoina le aposetolo o Paulo i le itu faaletino. Peitaʻi, ua mafai nei ona latou auina atu meaalofa iā Paulo e fesoasoani ai i mea e na te manaʻomia.—Filipi 4:10, 14.

 Na faamālō atu Paulo i Kerisiano i Filipi i lo latou limafoaʻi, ma faamautinoa atu iā i latou ua ia maua mea na ia manaʻomia. (Filipi 4:18) Na ia faaaogā foʻi le avanoa e faasoa atu ai se upu moni tāua e faatatau i le olaga faa-Kerisiano: E mafai e Kerisiano uma, e tusa pe mauʻoa pe matitiva ona maua le faamalieina moni pe a faalagolago i le fesoasoani a le Atua.—Filipi 4:12.