A o leʻi lele se pepe lele, e faavevela muamua i le māfanafana o le lā ona maso ia e faaaogā e lele ai. Ae e muamua lele le cabbage white nai lo o isi pepe pe a oo i aso puaoa. Aiseā?

 Ia Mātau: E faalalā muamua le tele o ituaiga pepe eseese a o leʻi felelei. O isi pepe e faamoe o latou apaʻau a o isi e faaloloa i le taimi e faalalā ai. Peitaʻi, e tū faa-V le cabbage white i le taimi e faalā ai. Na faaalia e suʻesuʻega e faapea, ina ia lelei ma vave vevela maso o le cabbage white, e tatau ona tū ma faamatala ona apaʻau i le pe ā ma le 17 tikerī, e pei o se mataʻitusi V. O le tū faa-V a le cabbage white, ua mafai ai ona alu saʻo le tele o le vevela o le lā i ona maso e lele ai, ia e i le vaega o lona tino lea e pipii ai ona apaʻau. O lea ua mafai ai ona vave vevela ona maso e lele ese ai.

 Na suʻesuʻeina e tagata suʻesuʻe mai i le Iunivesite i Exeter, Egelani pe e mafai ona latou faia ni pusa e sili atu ona lelei e puʻe ai le vevela o le lā, e ala i le fausiaina faa-V o nei pusa, e pei o le tū a le cabbage white. O le faia faapea, na latou iloa ai e toetoe 50% le malosi faaopoopo na puʻeina e nei pusa mai i le vevela o le lā.

 Na iloa ai foʻi e tagata suʻesuʻe, o apaʻau o le cabbage white, e matuā lelei i le faasusulu atu o le malamalama o le lā. O le kopiina o le tū faa-V a le cabbage white ma le auala na fausia ai ona apaʻau lea e mafai ona faasusulu atu ai le malamalama, ua mafai ai e nei tagata suʻesuʻe ona faia pusa e matuā māmā, ma e sili atu ona lelei i le puʻeina o le vevela o le lā. O na suʻesuʻega, na māfua ai ona faaigoa e le Polofesa o Richard ffrench-Constant, o se sui o le vaega e suʻesuʻeina le cabbage white, o le cabbage white “o se pepe e matuā tomai i le puʻeina o le vevela o le lā.”

 O le ā sou manatu? Pe na teʻi lava ua tū faa-V le cabbage white? Pe na foafoaina?